მასობრივი დაკავებები რუსეთში, საპენსიო რეფორმის მოწინააღმდეგეთა საპროტესტო აქციებზე
#Москва
Какой-то ужас pic.twitter.com/Ha8qrV2TE1— Новая Газета (@novaya_gazeta) September 9, 2018
2018 წლის 9 სექტემბერს რუსეთის სხვადასხვა ქალაქში საპენსიო ასაკის გაზრდასთან დაკავშირებით გამართულ მასობრივ საპროტესტო აქციებზე 839 ადამიანი დააკავეს.
პროტესტის ინიციატორია რუსეთის ოპოზიციის ლიდერი ალექსეი ნავალნი. მაგრამ თავად მას აქციებში მონაწილეობა არ მიუღია, რადგან ის 2017 წლის დეკემბერში ანალოგიური პროტესტის ორგანიზებისთვის 30 დღე-ღამით პატიმრობაში იმყოფება.
აქციები მთლიანად რუსეთის 81 ქალაქში იმართებოდა, მაგრამ მათი ხელისუფლებასთან შეთანხმება მხოლოდ 11 ქალაქში მოხერხდა.
რუსეთის ქალაქების ქუჩებში ათობით ათასი ადამიანი გამოვიდა და შე,დეგ ლოზუნგებს სკანდირებდა: „ძირს მეფე!“, „პუტინი – ქურდია!“, „პუტინი – ხალხის მტერია!“, „პუტინ, წადი!“
პოლიციამ მომიტინგეების წინააღმდეგ ძალა გამოიყენა, მანიფესტანტებს ხელჯოხებით არბევდნენ და განყოფილებებში მიჰყავდათ.
როგორც რუსული გამოცემა „ОВД-Инфо“ წერს, მთლიანობაში 839 ადამიანი დააკავეს. ყველაზე მეტი დაკავებული სანქტ-პეტერბურგსა და ეკატერინბურგშია.
სანქტ-პეტერბურგში ერთ ადამიანს დაკავებისას მძიმე ტრავმები მიაყენეს.
მოსკოვში კი 50-ზე მეტი დაკავებულია.
რატომ დაიწყო პროტესტი?
პროტესტების უშუალო მიზეზად რუსეთში ამოქმედებული საპენსიო რეფორმა იქცა.
კერძოდ, რეფორმა 2019 წლიდან საპენსიო ასაკის თანდათან გაზრდას ითვალისწინებს: ქალებისთვის – 63 წლამდე, მამაკაცებისთვის – 65 წლამდე.
იგეგმება, რომ საპენსიო ასაკი ამ მაჩვენებლებამდე, შესაბამისად, 2028 და 2034 წლისთვის აიწევს.
კანონპროექტმა ძლიერი კრიტიკა გამოიწვია და ახლახან გაკეთებული ტელემიმართვისას რუსეთის ფედერაციის პრეზიდენტმა ვლადიმირ პუტინმა საპენსიო რეფორმის შერბილების გადაწყვეტილების შესახებ განაცხადა. კერძოდ, მან პირობა დადო, რომ საპენსიო ასაკი ქალებისთვის მოიმატებს არა 63 წლამდე, არამედ მხოლოდ 60 წლამდე.
რას უნდა ველოდეთ
როგორც ბევრი პოლიტიკური მიმომხილველი მიიჩნევს, ეს საპროტესტო აქციები რუსეთის ქალაქებში ზაფხულის სიჩუმის შემდეგ ახალი პოლიტიკური სეზონის დასაწყისია.
ეს სეზონი ალბათ ცხელი იქნება, რადგან ახლა, როგორც ჩანს, გადამწყვეტი პროტესტისთვის ალექსეი ნავალნის არამხოლოდ ახალგაზრდა მიმდევრები არიან მზად, არამედ ისინიც, ვისაც საპენსიო რეფორმა შეეხო – ეს კი ვლადიმირ პუტინის ძირითადი ელექტორატია.
რუსეთის საზოგადოებაში ეკონომიკის კატასტროფული მდგომარეობის ფონზე პროტესტი მატულობს, – ასეთ კომენტარს აკეთებს ბევრი რუსი და დასავლელი ექსპერტი.
რუბლის კურსი მკვეთრად ეცემა, მატულობს ფასები და ინფლაცია, მოსალოდნელია ახალი გადასახადების შემოღება.
ის, რაც ხდება, პირველ რიგში რუსეთის წინააღმდეგ დაწესებული დასავლური სანქციების შედეგია, ყირიმის ანექსიის, დონბასის მოვლენებში ჩარევისა და დიდი ბრიტანეთის ტერიტორიაზე ქიმიური იარაღის გამოყენებისთვის.
წინ ახალი სანქციებია: მალაიზიური ბოინგის ჩამოგდებისა და სირიაში ჩადენილი სამხედრო დანაშაულებისთვის.
