კიდევ ერთხელ გადაიდო ბაქო-თბილისი-ყარსის სარკინიგზო მაგისტრალის გახსნა

ბაქო-თბილისი-ყარსის მარშრუტით სარკინიგზო მაგისტრალის გახსნა პირველი კვარტალიდან 2017 წლის შუა თვეებამდეა გადატანილი. ამის შესახებ განაცხადა თურქეთის ტრანსპოტის, ზღვაოსნობისა და კავშირგაბმულობის მინისტრმა ახმეტ არსლანმა ყარსის სამეცნიერო-სამრეწველო გაერთიანების წარმომადგენლებთან შეხვედრისას.

არსლანმა სარკინიგზო ხაზის გახსნის მორიგი გადავადების მიზეზად დიდთოვლობა დაასახელა. „მარტში-აპრილში რკინიგზა გამოიცდება და მიმდინარე წლის შუა თვეებში ბაქო-თბილისი-ყარსის მაგისტრალი ექსპლუატაციაში გადაეცემა. … მეორე ეტაპზე ვგეგმავთ მაგისტრალის გაგრძელებას ნახიჭევანამდე,ირანამდე, პაკისტანამდე და ინდოეთამდეც კი“, – თქვა მინისტრმა.

სარკინიგზე მაგისტრალი, უკვე მათე წელია, იგება. თავდაპირველად მისი გახსნა 2011 წელს იგეგმებოდა. მას შემდეგ სულ ცოტა სამჯერ მაინც გადაიდო ამ გზაზე პირველი მატარებლის გამგზავრება.

2015 წლის ოქტომბერში „აზერბაიჯანული რკინიგზების“ ხელმძღვანელი ჯავიდ გურბანოვი პრესას არწმუნებდა, რომ 2016 წელს მაგისტრალი ექსპლუატაციაში გადაეცემოდა. თუმცა, დეკემბერში რკინიგზის ამოქმედება 2017 წლის პირველი მეოთხედისთვის გადაიდო.

2016 წლის იანვარში სააქციო საზოგადოება „ქართული რკინიგზის“ გენერალურმა დირექტორმა მამუკა ბახტაძემ სააგენტო „ტრენდს“მაგისტრალის ქართული მონაკვეთის მშენებლობის დასრულების შესახებ აცნობა.

• ბაქო-თბილისი-ყარსის მთლიანი სიგრძე 826 კილომეტრს შეადგენს. სავარაუდო
• გამტარუნარიანობა – 1 მილიონ მგზავრსა და 6,5 მილიონ ტონა ტვირთს უდრის. სამომავლოდ ბაქო-თბილისი-ყარსის გამტარუნარიანობა, შესაძლოა, სამ მილიონ მგზავრამდე და 20 მილიონ ტონა ტვირთამდე გაიზარდოს.
• პროექტის თავდაპირველი ფასი 422 მილიონ დოლარს შეადგენდა, აქედან 202 მილიონი დოლარი ქართული მონაკვეთის მშენებლობას უნდა მოხმარებოდა, 220 მილიონი დოლარი – თურქულს, თუმცა მოგვიანებით ღირებულება გადაიხედა და გაიზარდა. 2008 წლის ბოლოსთვის პროექტის საერთო ღირებულება, სხვადასხვა შეფასების მიხედვით, 600 მილიონ ამერიკულ დოლარს აჭარბებს.