ინგუშეთში ძალოვანებს ადამიანების წამებისთვის ასამართლებენ

 „ნოვაია გაზეტას“ მასალების მიხედვით 

ინგუშეთში რუსეთისთვის უპრეცედენტო სასამართლო პროცესი მიმდინარეობს. ექსტრემიზმის აღმკვეთი ცენტრის ხელმძღვანელს, 45 წლის ტიმურ ხამხოევსა და მის ხელქვეითებს დაკავებულების მიმართ ძალადობისთვის ასამართლებენ.

მომდევნო კვირიდან პროცესი ყოველდღიურ რეჟიმში წარიმართება. მოსალოდნელია, რომ ის სკანდალური და მძიმე აღმოჩნდება. სასამართლოს დაწყებამდე ორი დღით ადრე მოხდა თავდასხმა პროკურორზე, რომელიც ამ საქმეში ბრალმდებლად გამოდის – გამთენიისას უცხო პირებმა მის ეზოში ხელყუმბარა შეაგდეს; მძიმედ დაიჭრა მისი დაცვის წევრი, თავად პროკურორი არ დაზარალებულა.

რუსეთის კანონმდებლობაში წამების განსაზღვრება არ არსებობს, ამიტომ მთავარი მუხლი, რომელსაც ბრალდება ეყრდნობა,  ეს არის 286-ე – „სამსახურებრივი უფლებამოსილების გადამეტება ძალადობის გამოყენებით“.

„კავკაზსკი უზელის“ ვიდეო:

ხამხოევი 2017 წლის დეკემბერში გამოძალვისთვის დააპატიმრეს: გამომძიებლებმა დაადგინეს, რომ ის და ინგუშეთის „ფეესბეს“ თანამშრომელი მუსტაფა ცოროევი აზერბაიჯანელ ბიზნესმენ ამალ ნაზაროვს მილიონ რუბლს სძალავდნენ. ბიზნესმენმა განცხადებით მიმართა „ფეესბე“-ს, რომელიც, რაოდენ გასაკვირიც უნდა იყოს, საქმის გამოძიებას ენთუზიაზმით შეუდგა. საქმეში ერთმანეთის მიყოლებით გაჩნდა წამებასთან დაკავშირებული ეპიზოდები. მათ შორის ერთ-ერთი მთავარი 50 წლის მაგომედ დოლიევის შემთხვევაა.

2016 წლის 11 ივნისს უცნობმა პირებმა ინგუშეთის ქალაქ სუნჟაში ბანკის განყოფილება გაძარცვეს. ამ ბანკში მოლარედ მუშაობდა დოლიევის ცოლი – მარემი, რომელიც ქალაქის პოლიციის განყოფილებაში დაკითხვაზე გამოიძახეს.

„მათ თავზე შავი პაკეტი ჩამომაცვეს, პაკეტს ზემოდან მთლიანად “სკოჩი” გადააკრეს და ჰაერისთვის ერთი ბეწო ნაპრალი დატოვეს – ასე აღწერდა მარემი მოგვიანებით დაკითხვის მეთოდს, – თავიდან იქ მცემდნენ, შემდეგ კი  ექსტრემიზმის აღმკვეთ ცენტრში გადამიყვანეს. იქ სკამზე დამსვეს, ხელები “სკოჩით” დამიბეს და თავში რაღაც მძიმე საგანს მირტყამდნენ.

ხელის თითებზე მავთულებს მიკეთებდნენ და დენს უშვებდნენ, მუცელზე ელექტროშოკერს მადებდნენ. მოითხოვდნენ, რომ ძარცვა მეღიარებინა“.

თითქმის მარემთან ერთად დააკავეს მისი ქმარიც. ის ექსტრემიზმის აღმკვეთ ცენტრში მიიყვანეს, აწამებდნენ და ბანკის გაძარცვის აღიარებას სთხოვდნენ. მარემი გვერდით ოთახში იჯდა და მას ქმრის ყვირილის მოსმენას აიძულებდნენ. მაგომედ დოლიევი წამების შედეგად იქვე, ექსტრემიზმის აღმკვეთი ცენტრის შენობაში იმავე საღამოს დაიღუპა. ნაცემი მარემი სახლში გაუშვეს და გაჩუმება უბრძანეს.

დოლიევის სიკვდილის მიზეზად გულის შეტევა დაასახელეს. თუმცა, ნათესავებმა ექსტრემიზმის აღმკვეთი ცენტრის თანამშრომლები მაშინვე საჯაროდ დაადანაშაულეს მკვლელობაში. მიუხედავად ამისა, არც მარემის ჩვენებებს, რომელიც წამებას დაწვრილებით აღწერდა და ტიმურ ხახმოევსა და სხვა მონაწილეებზე მიუთითებდა, არც სამედიცინო მოწმობას, რომელიც ქალის სხეულზე მისი დენით წამების კვალს ადასტურებდა, არც ნათესავების მიერ პროკურატურაში შეტანილ განცხადებას არავითარი შედეგი არ მოჰყოლია. ამგვარი შემთხვევების გამო, რუსეთში სისხლის სამართლის საქმის აღძვრა ძალიან რთულია, და თუკი ეს მაინც შესაძლებელი გახდა, საქმე იმ ადამიანების წინააღმდეგ კი არ აღიძვრება, ვისზეც მსხვერპლი მიუთითებს, არამედ „დაუდგენელი პირების“ მიმართ.

ბევრი დაზარალებული და მოწმე წამებაში მხოლოდ მათ არ ადანაშაულებს, ვინც დღეს საბრალდებო სკამზე ზის. ისინი ასახელებენ პოლიციის რიგ სხვა თანამშრომლებსაც, რომლებიც საქმეში ეჭვმიტანილებადაც კი არ ფიგურირებენ.