თბილისთან ორი ახალგაზრდა კაცი ხანჯლით მოკლეს

წავკისში (თბილისის შემოგარენი) ახალ­გაზ­რდებს შო­რის და­პი­რის­პი­რე­ბის შედეგად ორი მა­მა­კა­ცი მოკ­ლეს.

მოკლულები ბიძაშვილები – 26 წლის ლექსო და 28 წლის დავით ფეიქრიშვილები არიან. ასევე დაჭრილია ორი ახალგაზრდა. ერთ-ერთს მძიმე ოპერაცია ჩაუტარდა. ექიმები ამბობენ, რომ მის სიცოცხლეს საფრთხე არ ემუქრება.

სავარაუდო დამნაშავეები პოლიციას უკვე იდენტიფიცირებული ჰყავს, თუმცა ისინი ჯერ დაკავებულები არ არიან.

რა გახდა სისხლიანი გარჩევის მიზეზი უცნობია.

ჭრილობები ცივი იარაღითაა მიყენებული, როგორც წავკისელები ამბობენ, სავარაუდოდ, ხანჯლით.

თვითმხილველთა თქმით, სავარაუდო მკვლელები წავკისში სამი მანქანით მივიდნენ და ისინი ადგილობრივი მაცხოვრებლები არ არიან.

“ვიღაც გადმოვიდა მანქანიდან ხანჯლით და მან დაჩეხა ყველაო. ერთმაო, ერთმა დაჩეხა სულ ყველაო”, –  უთხრა რუსთავი 2-ს ერთი-ერთი დაჭრილი ახალგაზრდის მამამ თემურ დორეულმა.

მისი თქმით, წავკისში უცხო მანქანა მივიდა, საიდანაც “ვიღაც გადმოვიდა ხანჯლით და მან დაჩეხა ყველა“.

შსს-ში აცხადებენ, რომ გა­მო­ძი­ე­ბა სსკ-ის 109-ე მუხ­ლის მე­ო­რე ნა­წი­ლის “ე” ქვე­პუნ­ქტით დაიწყო, რაც და­მამ­ძი­მე­ბელ გა­რე­მო­ე­ბა­ში ჯგუ­ფუ­რად ჩა­დე­ნილ გან­ზრახ მკვლე­ლო­ბას გუ­ლის­ხმობს.

2018 წელს საქართველოში კრიმინოგენული ვითარება მკვეთრად გაუარესდა და ამას შინაგან საქმეთა სამინისტროს ოფიციალური სტატისტიკა მოწმობს. 

შსს-ს 2018 წლის პირველი ათი თვის სტატისტიკა ამბობს, რომ რეგისტრირებული დანაშაული 60 პროცენტით არის გაზრდილი.

2018 წლის ათ თვეში სულ რეგისტრირებულია 49 057 დანაშაული, როცა 2017 წელს, დროის იმავე მონაკვეთში, რეგისტრირებული დანაშაულის რაოდენობა 30 659 იყო.

სტატისტიკის თანახმად, დანაშაულის ზრდის პარალელურად შემცირებულია მისი გახსნის მაჩვენებელიც. თუ 2017 წელს შსს-მ რეგისტრირებული დანაშაულის 53.56 პროცენტის გახსნა შეძლო, ეს მონაცემი 2018 წლისთვის 35.29 პროცენტამდე შემცირდა.