ეროვნული უსაფრთხოების საკითხებში აშშ-ის პრეზიდენტის მრჩეველი რუსეთთან კონტაქტების გამო გადადგა

ეროვნული უსაფრთხოების საკითხებში აშშ-ის პრეზიდენტის მრჩეველი მაიკლ ფლინი მას შემდეგ გადადგა, რაც  აღიარა, რომ სრულ სიმართლეს არ ამბობდა რუსეთის ელჩთან საკუთარი ურთიერთობის შესახებ. ფლინმა ბოდიში მოუხადა დონალდ ტრამპსა და ვიცე-პრეზიდენტ მაიკ პენსს.

ფლინი რუსეთის ელჩს ვაშინგტონში დეკემბერში ესაუბრა. თავდაპირველად ყოფილი   გენერალი უარყოფდა, რომ საუბრის თემა სანქციებს შეეხებოდა, რის შესახებაც შემდეგ ვიცე-პრეზიდენტი აცხადებდა. მოგვიანებით ფლინმა შეატყობინა თეთრ სახლს, რომ სანქციების საკითხი, შესაძლოა,  ამ საუბრისას მაინც განიხილებოდა.

ეროვნული უსაფრთხოების საკითხებში მრჩეველმა გადადგომის შესახებ თავის განცხდებაში აღიარა, რომ ტრამპის ინაუგურაციის წინა პერიოდში მან „გაუფრთხილებლობით ვიცე-პრეზიდენტს და სხვებსაც არასრული ინფორმაცია მიაწოდა რუსეთის ელჩთან თავის სატელეფონო საუბრების შესახებ“, – იტყობინება ВВС.

ფლინის გადადგომა პრესაში გამოქვეყნებულ იმ ცნობას მოჰყვა, რომლის თანახმადაც, აშშ-ის იუსტიციის სამინისტრომ რამდენიმე  კვირით ადრე გააფრთხილა თეთრი სახლი იმის თაობაზე, რომ შესაძლოა  ფლინი შანტაჟის ობიექტი გამხდარიყო ტრანპის ინაუგურციამდე რუსეთის სახელმწნიფო მოხელეებთან  მისი კონტაქტების გამო, რაც კანონის დარღვევაა.

რუსეთის პრეზიდენტის პრესმდივანმა დმიტრი პესკოვმა ორშაბათს ჟურნალისტებს განუცხადა, რომ ფლინი და რუსეთს ელჩი კისლიაკი სანქციების გაუქმების საკითხს არ განიხილავდნენ.

მაიკლ ფლინი 2012-2014 წლებში სამხედრო დაზვერვის ხელმძღვანელი იყო, გადადგომის შემდეგ ის არაერთხელ იმყოფებოდა რუსეთში ჩასული და სხვადასხვა ღონისძიების ფარგლებში რუსული ელიტის წარმომადგენლებს ხვდებოდა. 2015 წელს  ტელეკომპანია Russia Today-ს 10 წლისადმი მიძღვნილ წვეულებაზე ფლინი უშუალოდ პუტინის მარჯვნივ იჯდა.

ფლინის გადადგომის შემდეგ ეროვნული უსაფრთხოების მრჩევლის მოვალეობებს გენერალი ჯოზეფ კიტ კელოგი შეასრულებს, რომელსაც ადრე აშშ-ის  ეროვნული უსაფრთხოების საბჭოს აპარატის ხელმძღვანელის თანამდებობა ეკავა. მან ჯარში 30 წელიწადზე მეტი გაატარა, მსახურობდა ვიეტნამში, კამბოჯაში, პანამასა და სპარსეთის ყურეში.