ერევანში შარლ აზნავურს მისი სახლ-მუზეუმის გასაღები გადასცეს

ერევანში მსოფლიოში სახელგანთქმული სომხური წარმოშობის შანსონიეს, შარლ აზნავურის სახელობის სახლ-მუზეუმი ამოქმედდება. დღეს სომხეთის პრეზიდენტმა სერჟ სარგსიანმა შარლ აზნავურს მუზეუმის სიმბოლური გასაღები პირადად გადასცა.

მუზეუმი დიდი ხნის წინ აშენდა, ის ერევნის ცენტრში მდებრეობს – დედაქალაქის კომპლექს „კასკადის“  ჩრდილოეთ ნაწილში. ეს ტიპური მუზეუმი არ არის  – ის გათვალისწინებულია საცხოვრებლადაც.

როგორც ფონდ „აზნავურის“  დირექტორმა კრისტინა სარგსიანმა განაცხადა, სახლ-მუზეუმი ინტერაქტიური  და ერთადერთი ისეთი მუზეუმი იქნება, რომლის „ მთავარი გმირი“  მომსვლელებს თავის შესახებ საკუთარი ხმით უამბობს; 3D ფორმატით წარმოდგენილი იქნება აზნავურის კონცერტების ეპიზოდებიც.

„ეს არ არის კლასიკური მუზეუმი. აქ იქნება არანჟირებისა და ხმის ჩაწერის სრულფასოვანი სტუდია, სადაც მომსვლელებს  შარლის სიმღერებიდან მიქსების შექმნა შეეძლებათ. გამოიფინება შანსონიეს პირადი ნივთები: პირველი პიანინო, მისი კოლექციიდან ედიტ პიაფის, სინატრასა და სხვა შემსრულებლების ფირფიტები“, – აღნიშნა კარენ სარგსიანმა.

შარლ აზნავურმა თქვა, რომ ეს ყველაფერი მისთვის ძალიან სასიხარულოა და დიდი პატივია: „მადლობელი ვარ თქვენი გულუხვი საჩუქრისთვის. ეს გადაწყვეტილება ნდობითა და რწმენით მივიღე, და მე და ჩემმა ვაჟმა  ნიკოლა აზნავურმა დავაარსეთ ფონდი „აზნავური“, რომელიც  1988 წლის დამანგრეველი მიწისძვრის შემდეგ ჩემს მიერ  წამოწყებულ საქმიანობას გააგრძელებს.

მინდა მადლობა გადავუხადო მათ, ვინც ამ პროექტს მხარი დაუჭირა: პრეზიდენტ სერჟ სარგსიანს და მის აპარატს, კულტურისა და საგარეო საქმეთა სამინისტროებს. ეს პროექტი ვერ განხორციელდებოდა ჩვენი პარტნიორების გარეშე, მათ შორის ფონდ   IdeA-ს თანადამაარსებლებთან და პირადად რუბენ ვარდანიანთან  ჩვენი სტრატეგიული პარტნიორობის გარეშე, რომელმაც ყველანაირი ღონე იხმარა ჩვენი პროექტების განსახორციელებლად.

აზნავურმა თქვა, რომ სახლ-მუზეუმი არამხოლოდ ინტერაქტიურ, მულტიმედიურ მუზეუმად იქცევა, არამედ ტურისტული თვლსაზრისით – მნიშვნელოვან ახალგაზრდულ ცენტრადაც.

მუზეუმი პირველ დამთვალიერებლებს 2018 წელს მიიღებს.