ერევანში მთიან ყარაბაღის ყოფილი თავდაცვის მინისტრი სამველ ბაბაიანი დააკავეს

ფოტო: Pastinfo.am

თავიდან სომხეთის ახალი ამბების სააგენტოები  ერევანში ყარაბაღის თავდაცვის ჯარის ყოფილი მეთაურის, მთიანი ყარაბაღის თავდაცვის სამინისტროს ყოფილი მინისტრის სამველ ბაბაიანის დაპატიმრების შესახებ იუწყებოდნენ, და ამ  ფაქტის დასტურად, მხოლოდ ბაბაიანის მეგობრის აიკ ხანუმიანის სიტყვებს ეყრდნობოდნენ.

შემდეგ გაჩნდა ეროვნული უსაფრთხოების სამსახურის ოფიციალური დასტური. იტყობინებიან, რომ „ქვეყანაში საზენიტო-სარაკეტო კომპლექს „იგლას“ კონტრაბანდული შეტანისთვის აღძრული სისხლის სამართლის საქმის ფარგლებში, ამ მომენტისთვის დაპატიმრებულია სამი ადამიანი, მათ შორის – სომხეთის რესპუბლიკის მოქალაქე სამველ ბაბაიანი“.

ეროვნული უსაფრთხოების სამსახურის პრეს-სამსახურის ცნობით, ოპერატიულ-სამძებრო  ღონისძიებების შედეგად, მიღებულია სარწმუნო მონაცემები იმის შესახებ, რომ ის პირები, რომლებმაც შეიძინეს და გადაიტანეს საზენიტო-სარაკეტო კომპლექსის ნაწილები, წინასწარი შეთანხმების მიხედვით და სამველ ბაბაიანის შეკვეთით მოქმედებდნენ.

მოყვანილია ექსპერტის აზრიც იმის თაობაზე, რომ გამოძიების მიერ აღმოჩენილი საბრძოლო რაკეტა 9М39″, რომელიც საზენიტო-სარაკეტო კომპლექსის ნაწილია, ექსპლუატაციისთვის ვარგისია.

ახლა გამოძიება ცდილობს, გამოიკვლიოს საზენიტო-სარაკეტო კომპლექსის შეძენის მოტივები, მათი შესაძლო გამოყენების მიზანი და დაფინანსების წყაროები. წინასწარი გამოძიება გრძელდება.

ეროვნული უსაფრთხოების სამსახურის სამძებრო სამართველოში 235-ე მუხლის მეორე ნაწილის მიხედვით, აღძრულია სისხლის სამართლის საქმე (იარაღის, საბრძოლო მასალების, ფეთქებადი ნივთიერებების ან ასაფეთქებელი დანადგარების უკანონო შეძენა, გასაღება, შენახვა, გადატანა ან ტარება, რაც პირთა ჯგუფის მიერ წინასწარი შეთანხმებით არის ჩადენილი).