ევროპაში საქართველოდან პირველი უვიზო მგზავრები ჩავიდნენ
საქართველოს პირველი მოქალაქეები, რომლებმაც ევროკავშირთან უვიზო რეჟიმით ისარგებლეს, თბილისის საერთაშორისო აეროპორტიდან, 28 მარტს 04:55 საათზე, ვარშავის მიმართულებით გაემგზავრნენ. დილის განმავლობაში ევროკავშრის ქვეყნების მიმართულებით თბილისიდან და ქუთაისიდან კიდევ რამდენიმე რეისი შესრულდა.
“უცნაური შეგრძნებაა, რომ ვიზის აღება არ დამჭირდა. მხოლოდ საბუთები შეამოწმეს. ბევრად ხელსაყრელია, რომ საელჩოში არ მომიწია საათების გატარება. ვულოცავ ყველას ამ ისტორიულ დღეს,” – უთხრა ტელეკომპანია “რუსთავი 2”-ის ჟურნალისტებს თბილისი-ვარშავას რეისის ერთ-ერთმა მგზავრმა თამთა მუმლაძემ. იგი ჰამბურგში ტურისტად გაემგზავრა და ერთ კვირაში საქართველოში ბრუნდება.
დილის 7 საათზე კი საქართველოს პრემიერ-მინისტრი გიორგი კვირიკაშვილი სამთავრობო დელეგაციასთან, სტუდენტებთან, მეცნიერებთან და მედიის წარმომადგენლებთან ერთად თბილისის შოთა რუსთაველის სახელობის საერთაშორისო აეროპორტიდან ათენში, შემდეგ კი, ბრიუსელში უვიზოდ გაემგზავრა.
“დღეს ისტორიული დღეა – საქართველოს მოქალაქეებისთვის უკვე საბოლოოდ იხსნება უვიზო მიმოსვლა ევროკავშირის/შენგენის წევრს ქვეყნებში. ეს არის ძალიან დიდი მიღწევა, და კარგი შესაძლებლობა საქართველოს მოქალაქეებისთვის, უკეთ გაიცნონ ევროკავშირი, უკეთ შეიცნონ ის ღირებულებები, რაზეც დგას ევროკავშირი. ეს არის ჩვენი სტუდენტებისთვის ძალიან კარგი შესაძლებლობა, ჩაერთონ სხვადასხვა საგანმანათლებლო პროგრამებში”, – განაცხადა გიორგი კვირიკაშვილმა.
მისი თქმით, საქართველოს დელეგაცია შეხვედრებს ათენში გამართავს, შუადღით კი ევროპის პოლიტიკურ დედაქალაქში – ბრიუსელში გაემგზავრება , “სადაც ვიზეიმებთ ამ დიდ მიღწევას, რომელიც არა მხოლოდ საქართველოს ხელისუფლების თანმიმდევრული, ინტენსიური შრომის შედეგია, არამედ საქართველოს მოქალაქეების უდიდესი ჩართულობით გახდა შესაძლებელი. მინდა, მოგილოცოთ ეს დიდი, ისტორიული დღესასწაული”.
28 მარტიდან საქართველოს მოქალაქეებისთვის შენგენის ზონაში უვიზოდ მიმოსვლის რეჟიმი ამოქმედდა. ბიომეტრული პასპორტების მქონე საქართველოს მოქალაქეები შენგენის ზონის ქვეყნებში უვიზო მიმოსვლით 180 დღის განმავლობაში მაქსიმალური, 90 დღის ვადით ისარგებლებენ. უვიზო რეჟიმი გულისხმობს თავისუფალ გადაადგილებას შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას და შენგენის 4 კანდიდატ ქვეყანას. გამონაკლისს წარმოადგენს: დიდი ბრიტანეთი და ირლანდია, რომლებთანაც სავიზო რეჟიმი შენარჩუნდება.
უვიზო რეჟიმის ამოქმედებასთან დაკავშირებით გუშინვე შსს მინისტრმა ხელი მოაწერა ბრძანებას,რომლის მიხედვით მესაზღვრე კონტროლიორები დღეიდან შენგენის ზონის ქვეყნებში მოგზაურობამდე ყველა მოქალაქეს დეტალურად გაესაუბრებიან.
ვინ და როგორ ისარგებლებს უვიზო მიმოსვლით:
- საქართველოს მოქალაქეებს ექნებათ შენგენის ზონაში (და ასევე ამ ზონაში შესვლის ოთხ კანდიდატ ქვეყანაში – რუმინეთი, ბულგარეთი, კვიპროსი, ხორვატია) 180 დღეში 90 დღის განმავლობაში უვიზოდ ყოფნის უფლება და ასევე შეეძლებათ შენგენის ზონის ერთი ქვეყნიდან მეორეში მოგზაურობა;
- იმ შემთხვევაში, თუ 90 დღეზე მეტხანს დარჩება, საქართველოს მოქალაქეს შენგენის ზონიდან გამოაძევებენ. ჯერ დააკავებენ, შემდეგ კი საქართველოში დააბრუნებენ, რის შემდეგაც ის 5 წლის განმავლობაში სავიზო ლიბერალიზაციის ბენეფიტებით ვეღარ ისარგებლებს და დაჯარიდმება 3000 ევროთი.
- იმისთვის, რომ უვიზო მიმოსვლით ისარგებლოს, საქართველოს მოქალაქეს დასჭირდება ბიომეტრიული პასპორტი, ფინანსური უზრუნველყოფის დოკუმენტი, უკან დასაბრუნებელი ბილეთი და სასტუმროს ჯავშანი. ყველა ამ დოკუმენტს საქართველოს მოქალაქე წარადგენს საზღვარზე და არა საკონსულოში;
- ვიზალიბერალიზაცია არ ეხება სამუშაო ან გრძელვადიან სასწავლო ვიზებს. ასეთი ვიზების მისაღებად საქართველოს მოქალაქეებმა საკონსულოებს უნდა მიმართონ.
რა შემთხვევაში შეიძლება შეჩერდეს უვიზო მიმოსვლა?
- თუ არ ვითანამშრომლებთ რეადმისიაზე. შეთანხმება მიგრანტების უკან დაბრუნებაზე;
- თუ საგრძნობლად გაიზარდება თავშესაფრის მაძიებელთა რიცხვი;
- თუ საგრძნობლად გაიზარდება ევროკავშირის ტერიტორიის არალეგალურად გადაკვეთის შემთხვევები.
რა გზა გაიარა საქართველომ ვიზალიბერალიზაციამდე
- საქართველოსა და ევროკავშირს შორის სავიზო დიალოგი 2012 წელს გაიხსნა, რასაც წინ უსწრებდა საქართველო-ევროკავშირს შორის შესაბამისი შეთანხმების საფუძველზე ევროკავშირთან სავიზო რეჟიმის გამარტივება და რეადმისიის შესახებ შეთანხმების წარმატებული იმპლემენტაცია (2011 წლის 1 მარტიდან);
- 2013 წლის თებერვალში საქართველოს მხარეს გადმოეცა სავიზო რეჟიმის ლიბერალიზაციის სამოქმედო გეგმა, რომლის მოთხოვნების შესრულებაც უვიზო მიმოსვლის რეჟიმის შემოღების მთავარ წინაპირობას წარმოადგენდა;
- 2015 წლის 18 დეკემბერს ევროკომისიამ გამოაქვეყნა საქართველოს მიერ სავიზო რეჟიმის ლიბერალიზაციის სამოქმედო გეგმის იმპლემენტაციის შესახებ რიგით მე-4 საბოლოო ანგარიში, რომელიც ადასტურებს, რომ საქართველომ ყველა შესაბამისი მოთხოვნა ზედმიწევნით შეასრულა;
- 2016 წლის 9 მარტს ევროკომისიამ ევროკავშირის საბჭოსა და ევროპარლამენტს წარუდგინა საკანონმდებლო წინადადება საქართველოს მოქალაქეებისათვის შენგენის/ევროკავშირის წევრ ქვეყნებში უვიზო მიმოსვლის შემოღების შესახებ. 2016 წლის 5 სექტემბერს ევროპარლამენტის სამოქალაქო თავისუფლების, მართლმსაჯულების და საშინაო საკითხების კომიტეტმა (LIBE) მხარი დაუჭირა საქართველოსთან სავიზო რეჟიმის ლიბერალიზაციას;
- 13 დეკემბერს ევროკავშირის საბჭოს, ევროპარლამენტსა და ევროკომისიას შორის შეთანხმდა რეგულაციის საბოლოო ტექტსტი, რომელიც 20 დეკემბერს დაამტკიცა ევროკავშირში მუდმივი წარმომადგენლების კომიტეტმა, ხოლო 2017 წლის 12 იანვარს ევროპარლამენტის LIBE კომიტეტმა. 2017 წლის 2 თებერვალს საქართველოს მოქალაქეებისათვის უვიზო მიმოსვლის მინიჭების საკითხს კენჭი ეყარა ევროპარლამენტის პლენარულ სესიაზე.
