ევროკავშირმა მოლდოვას სასამართლო სისტემის რეფორმისთვის თანხის გამოყოფაზე უარი უთხრა

Ziarul de Gardă-ს მასალების მიხედვით

ევროპის კავშირმა მოლდოვას, სასამართლო სისტემის რეფორმის პროგრამის ფარგლებში, 28 მილიონი ევროს გამოყოფაზე უარი უთხრა. ამ გადაწყვეტილების მიზეზი გახდა ის, რომ კიშინიოვმა დახმარების გაწევისთვის საჭირო პირობები არ შესარულა.   

ეს თანხა მოლდოვის სახელმწიფო ბიუჯეტს არ გადაეცემა და ევროკავშირში დარჩება.

“ევროკავშირი ყურადღებით აკვირდებოდა რეფორმების პროცესს და აღნიშნავს, რომ მოლდოვის ხელისუფლებამ 2014-2015 წლების განმავლობაში სასამართლო სისტემის რეფორმირებისთვის სათანადო მონდომება არ გამოავლინა. სახსრებისა და პერსონალის არასაკმარისი გადანაწილებით რეფორმები გატარებული არ არის. შედეგად, მიღწეული პროგრესი არასაკმარისია“, – ნათქვამია მოლდოვაში ევროპის კავშირის დელეგაციის განცხადებაში.

მოლდოვაში ევროკავშირის დელეგაციის ხელმძღვანელის, პიტერ მიხალკოს სიტყვებით – „ევროკავშირი მოლდოველების უკეთესი მომავლისადმი სწრაფვის მხარდაჭერას აგრძელებს. ჩვენ ახლა ვფიქრობთ, თუ  როგორ უნდა დავეხმაროთ უახლოეს წლებში მოქალაქეებს. გვსურს, იმ პროექტებს მივანიჭოთ უპირატესობა, რაც უშუალოდ მოლდოველების ცხოვრებას  გააუმჯობესებს“.

ამჟამად ევროკავშირმა მოლდოვის ბიუჯეტს ოთხ სხვა სფეროშიც შეუმცირა დახმარება. ჯერჯერობით უცნობია, თუ როდის აღდგება დაფინანსება.

ევროკავშირის მიერ სასამართლო რეფორმისთვის გამოყოფილი დახმარების შეჩერებასთან დაკავშირებით სახელმწიფოს ბიუჯეტში 30 მილიონი ევროს ოდენობის დეფიციტი გაჩნდება. ამის შესახებ   Ziarul de Gardă-ს მოლდოვის სამართლებრივი რესურსების ცენტრის პრეზიდენტმა, ვლადისლავ გრიბინჩამ განუცხადა. მისი თქმით, სინამდვილეში, ეს თანხა კიშინიოვის ხელისუფლებას უკვე დახარჯული ჰქონდა და ევროკავშირი მხოლოდ მის კომპენსირებას აპირებდა.   

ვლადისლავ გრიბინჩა განმარტავს, რომ სასამართლო სისტემის რეფორმირებისთვის ფინანსური დახმარების ორი მორიგი ტრანში ევროკავშირს წლევანდელი გაზაფხულის რეფორმების შედეგების შეფასების მიხედვით უნდა გამოეყო.   

„ის ფაქტი, რომ ამ გადარიცხვებიდან არც ერთი არ მიგვიღია, ვფიქრობ, იმაზე მეტყველებს, რომ სასამართლო სისტემის რეფორმის გავლენა არასაკმარისი იყო, მიუხედავად იმისა, რომ მიღებული იყო საკანონმდებოლო ზომები – ადამიანები ვერანაირ ცვლილებას ვერ გრძნობენ“, – დაასკვნა ექსპერტმა.