ევროკავშირის ქვეყნების ელჩებმა საქართველოსთვის ვიზალიბერალიზაციას მხარი დაუჭირეს

ევროკავშირის წევრი სახელმწიფოების ელჩებმა (COREPER) საქართველოსთვის შენგენის ზონაში უვიზო მიმოსვლის მინიჭებას მხარი დღეს, 22 თებერვალს დაუჭირეს.

ცნობა ამის შესახებ რადიო თავისუფლების ბრიუსელის ბიუროს კორესპონდენტმა რიკარდ იოზვიაკმა ტვიტერის მეშვეობის გაავრცელა. ელჩებმა ასევე მხარი დაუჭირეს უვიზო რეჟიმის დროებით შეჩერების მექანიზმს, რომლის შემოღება საქართელოსთის უვიზო რეჟიმის ამოქმედების წინაპირობაა.

გამოცხადებული მხარდაჭერის შემდეგ, უვიზო რეჟიმის ამოქმედებამდე კიდევ რჩება რამდენიმე პროცედურა:

რეგულაციას ორშაბათს, 27 თებერვალს  ევროკავშირის საგარეო საქმეთა მინისტრების საბჭო დაამტკიცებს.

ამის შემდეგ ევროპარლამენტის პრეზიდენტისა და ევროკავშირის საბჭოს თავმჯდომარე ქვეყნის წარმომადგენლის მიერ საკანონმდებლო ცვლილების ხელმოწერის შემდეგ რეგულაცია ოფიციალურ ჟურნალში გამოქვეყნდება.

ამის შემდეგ საქართველოს მოქალაქეებისათვის უვიზო რეჟიმი ოფიციალურად 20 დღეში ძალაში შევა. თუმცა,  მხოლოდ შეჩერების მექანიზმთან დაკავშირებული რეგულაციის ძალაში შესვლასთან ერთად ამოქმედდება.

რიკარდ იოზვიაკის ინფორმაციით, ევროპარლამენტში შეჩერების მექნიზმზე კენჭისყრა და მისი დამტკიცება ევროკავშირის საბჭოში თებერვლის ბოლომდე დასრულდება. საქართველოსთვის უვოზო რეჟიმის ამოქმედებას მარტის ბოლოს – აპრილის დასაწყისში ელოდებიან.

2 თებერვალს 553 ხმით ევროპარლამენტარებმა საქართველოს ვიზალიბერალიზაციას მხარი დაუჭირეს.

ვინ და როგორ ისარგებლებს უვიზო მიმოსვლით:

• საქართველოს მოქალაქეებს ექნებათ შენგენის ზონაში (და ასევე ამ ზონაში შესვლის ოთხ კანდიდატ ქვეყანაში – რუმინეთი, ბულგარეთი, კვიპროსი, ხორვატია) 180 დღეში 90 დღის განმავლობაში უვიზოდ ყოფნის უფლება და ასევე შეეძლებათ შენგენის ზონის ერთი ქვეყნიდან მეორეში მოგზაურობა;

• იმ შემთხვევაში, თუ 90 დღეზე მეტხანს დარჩება, საქართველოს მოქალაქეს შენგენის ზონიდან გამოაძევებენ. ჯერ დააკავებენ, შემდეგ კი საქართველოში დააბრუნებენ, რის შემდეგაც ის 5 წლის განმავლობაშისავიზო ლიბერალიზაციის ბენეფიტებით ვეღარ ისარგებლებს;

• იმისთვის, რომ უვიზო მიმოსვლით ისარგებლოს, საქართველოს მოქალაქეს დასჭირდება ბიომეტრიული პასპორტი, ფინანსური უზრუნველყოფის დოკუმენტი, უკან დასაბრუნებელი ბილეთი და სასტუმროს ჯავშანი. ყველა ამ დოკუმენტს საქართველოს მოქალაქე წარადგენს საზღვარზე და არა საკონსულოში;

• ვიზალიბერალიზაცია არ ეხება სამუშაო ან გრძელვადიან სასწავლო ვიზებს. ასეთი ვიზების მისაღებად საქართველოს მოქალაქეებმა საკონსულოებს უნდა მიმართონ.

რა შემთხვევაში შეიძლება შეჩერდეს უვიზო მიმოსვლა?

• თუ არ ვითანამშრომლებთ რეადმისიაზე. შეთანხმება მიგრანტების უკან დაბრუნებაზე.

• თუ საგრძნობლად გაიზარდება თავშესაფრის მაძიებელთა რიცხვი.

• თუ საგრძნობლად გაიზარდება ევროკავშირის ტერიტორიის არალეგალურად გადაკვეთის შემთხვევები.