სოხუმი აღარ იძიებს გიგა ოთხოზორიას მკვლელობის საქმეს

სოხუმში შეწყდა სისხლის სამართლის საქმე რაშიდ კანჯი-ოღლის წინააღმდეგ, რომელსაც 14 წლიანი პატიმრობა აქვს მისჯილი საქართველოს მოქალაქის, გიგა ოთხოზორიას მკვლელობის გამო.

ამის შესახებ ცნობილი გახდა ინციდენტების პრევენციისა და მათზე რეაგირების მექანიზმის მორიგ შეხვედრაზე, რომელიც გალში 31 მაისს გაიმართა.

სოხუმში ადასტურებენ, რომ კანჯი-ოღლის წინააღმდეგ სისხლის სამართლებრივი დევნა შეწყდა. აფხაზეთის პროკურატურაში აცხადებენ, რომ ამის მიზეზი ქართული მხარეა, რომელმაც “ოფიციალურად არ მიაწოდა აფხაზურ მხარეს ოთხოზორიას მკვლელობის საქმეთან დაკავშირებული მასალები”.

“ოთხოზორიას მკვლელობასთან დაკავშირებული საქმე მართლაც დაიხურა 2017 წლის 21 აპრილს, რადგან არ გამოიკვეთა დანაშაულის შემადგენლობა. ეს საქმე ჩვენ წინასწარ ძიებაში გვქონდა, მაგრამ ქართულმა მხარემ არ მოგვაწოდა საჭირო მასალები,” – განუცხადა აფხაზ ჟურნალისტებს 1 ივნისს აფხაზეთის სამხედრო პროკურორმა ადგუნ აგრბამ.

გიგა ოთხოზორიას 2016 წლის 19 მაისს ზუგდიდის რაიონის სოფელ ხურჩასთან ესროლეს.

ოთხოზორიას მკვლელობა იქვე მდებარე სათვალთვალო კამერებზეა აღბეჭდილი. ვიდეომასალაში ჩანს, რომ აფხაზეთის ე.წ. სასაზღვრო სამსახურის წარმომადგენელმა რაშიდ კანჯი-ოღლიმ და ოთხოზორიამ იკამათეს რადგან, ზუგდიდის მოქალაქე გალის რაიონში პროდუქტის გაგზავნას ცდილობდა. ამის შემდეგ კანჯი-ოღლიმ დატოვა საკონტროლო პუნქტი დატოვა, გადავიდა სოფელ ხურჩის მხარეს და რამდენჯერმე ესროლა შეუიარაღებელ ოთხოზორიას.

თბილისმა არაერთხელ დააყენა კანჯი-ოღლის ქართული მართლმსაჯულებისთვის გადაცემის საკითხი.  მასზე ძებნა მთელი ქვეყნის მასშტაბით გამოცხადდა, 2017 წლის მარტიდან კი კანჯი-ოღლი ინტერპოლით ძებნილთა სიაშია. თუმცა, სოხუმში განაცხადეს, რომ კანჯი-ოღლი თანამდებობიდან გათავისუფლდა და შინა პატიმრობაში იმყოფება.

გალში მიმდინარე შეხვედრაზე კი ცნობილი გახდა, რომ კანჯი-ოღლი საერთოდ გათავისუფლდა სისხლის სამართლებრივი პასუხისმგებლობისგან.

საქართველოს სახელმწიფო უშიშროების სამსახურის საინფორმაციო-ანალიტიკური დეპარტამენტის ხელმძღვანელის მოადგილემ კახაბერ ქემოკლიძემ შეხვედრის დასრულების შემდეგ ჟურნალისტებს განუცხადა, რომ აფხაზური მხარის გადაწყვეტილება “უკიდურესად საგანგაშო და ერთმნიშვნელოვნად ცინიკურია”.

“საქართველოს უსაფრთხოების სამსახური და მთელი ცენტრალური ხელისუფლების აპარატი აგრძელებს აქტიურ მუშაობას კანჯი-ოღლის დასაკავებლად და მისი ქართული მართლმსაჯულებისთვის გადასაცემად”, – განაცხადა ქემოკლიძემ.

შეხვედრა გალში

კიდევ ერთი საკითხი, რაც შეხვედრაზე განიხილეს, იყო რუსეთის სამხედრო ძალებისათვის ბაზის მშენებლობა სოფელ ხურჩასთან.

“რუსეთის საოკუპაციო ძალები ცდილობენ დაიკავონ 2 ჰექტარი მიწა, რომელსაც ადგილობრივი მოსახლეობა ამუშავებს. ჩვენი ხელისუფლება საკითხს ყველა საერთაშორისო დონეზე დააყენებს”, – განუცხადა ჟურნალისტებს ქემოკლიძემ.

გალში ასევე ისაუბრეს აფხაზური მხრიდან მდინარე ენგურის გავლით გამშვები პუნქტების დახურვაზე.

“საზღვრის გავლების” პროცესი საფრთხეს უქმნის ადგილობრივი მოსახლეობის უსაფრთხოებას და მათ უზღუდავს ფუნდამენტურ უფლებებსა და თავისუფლებას. ამან უკვე გამოიღო პირველი ნეგატიური შედეგი.  მდინარის გადაცურვის დროს ამ თვეში დაიღუპა გალის რაიონის მცხოვრები. ასევე ჩვენ დავუბრუნდით საქართველოს მოქალაქეების მასობრივ დაკავებას აფხაზეთში გადასვლის მცდელობისას. ყველა მათგანი გალის იზოლატორშია განთავსებული”, – აღნიშნა ქემოკლიძემ.

2016 წლის დეკემბრის დასასრულს აფხაზეთის დე-ფაქტო ხელისუფლებამ გადაწყვიტა დაეხურა გალის გამშვები პუნქტები “ნაბაკევი” და “ოტობაია” გალის რაიონისა და ზუგდიდის ადმინისტრაციულ საზღვარზე. თუმცა, სოხუმში განაცხადეს, რომ გაგრძელდება მუშაობა გამშვებ პუნქტზე საბერიოს დასახლებაში, ასევე გამშვებ პუნქტზე, რომელიც გამოიყენება ენგურჰესის ტექნიკური მომსახურებისთვის.