აფგან მუხტარლის საქმე - ქართველი ჟურნალისტები ევროკავშირის ელჩს შეხვდნენ

ქართველი ჟურნალისტები ევროკავშირის ელჩს, იანოშ ჰერმანს შეხვდნენ. მათ თბილისიდან გაუჩინარებული კოლეგის, აფგან მუხტარლის საქმეზე ისაუბრეს.

ჟურნალისტებს იანოშ ჰერმანმა განუცხადა, რომ დაინტერესებულია ამ საქმით. იანოშ ჰერმანმა და ჟურნალისტებმა განაცხადეს, რომ შეშფოთებული არიან მომხდარით.

ჟურნალისტებმა შეხვედრაზე აღნიშნეს, რომ მუხტარლის გაუჩინარებამ დაანგრია მითი, თითქოს, საქართველოში მეზობელი ქვეყნებისგან განსხვავებით დაცულია სიტყვის თავისუფლება. თუმცა, მედიის წარმომადგენელთა გადმოცემით, იანოშ ჰერმანმა ეს მოსაზრება არ გაიზიარა.

“მან გვითხრა, რომ დიდი განსხვავებაა საქართველოსა და აზერბაიჯანს შორის და ისინი ვერ გააიგივებენ ამ ორ ქვეყანას”, – თქვა საგამოძიებო სტუდია “მონიტორის” ჟურნალისტმა ნანა ბიგანიშვილმა.

ჟურნალისტური ეთიკის ქარტიის აღმასრულებელმა დირექტორმა, ნატა ძველიშვილმა კი აღნიშნა, რომ საქართველოს ხელისუფლებისგან განსხვავებით, დიპლომატიური კორპუსი ხვდება საკითხის მნიშვნელობას.

ევროკავშირის წარმომადგენლობა ინფორმაციას აგროვებს მომხდარზე ადგილობრივი ხელისუფლების, პოლიტიკური პარტიებისა და პრეზიდენტისგან და დასკვნების გაკეთებას ამის შემდეგ გეგმავს.

ევროკავშირის ელჩის შემდეგ ჟურნალისტები საქართველოში ამერიკის შეერთებული შტატების ელჩს ხვალ, 6 ივნისს შეხვდებიან.

თუმცა ამ ფონზე ჟურნალისტები ვერ ახერხებენ საქართველოს პარლამენტის თავმჯდომარესთან შეხვედრას. უკვე მესამე დღეა, რაც მათ პარლამენტის თავმჯდომარეს ოფიციალური წერილით მიმართეს, თუმცა პასუხი არ მიუღიათ. მედიის წარმომადგენლები ამბობენ, რომ ისინი შეხვდებიან ყველას, ვისაც შეიძლება რამე უნარი შესწევდეს გავლენა მოახდინოს საქართველოს ხელისუფლებაზე.

ბოლო დღეების მანძილზე აფგან მუხტარლის საქართველოდან გაუჩინარებისა და აზერბაიჯანში დაკავების საქმეზე განცხადებები უკვე გაავრცელეს აშშ-ს სახელმწიფო დეპარტამენტმა და ევროკავშირის წარმომდგენლობამ. განცხადება გააკეთა ევროკავშირის უმაღლესმა წარმომადგენელმა ფედერიკა მოგერინიმაც.

ყველა მათგანმა საქართველოს მთავრობას მოუწოდა, რომ მიმდინარე გამოძიება იყოს დროული და გამჭვირვალე. მათ აზერბაიჯანის მთავრობასაც მიმართეს და მოუწოდეს – საერთაშორისო და ეუთოს დონეზე ნაკისრი ვალდებულებების შესაბამისად, გაათავისუფლოს ყველა ის პირი, რომელიც საკუთარი ფუნდამენტური თავისუფლებით სარგებლობის გამო დააკავეს.

“საქართველოში მცხოვრები აზერბაიჯანის მოქალაქეების, მათ შორის, ადამიანის უფლებების დამცველების გატაცება და თვითნებურად, უკანონოდ დაკავება, როგორც ეს იყო გაცხადებული და რასაც მოჰყვა მათი აზერბაიჯანში დაპატიმრება და სისხლისსამართლებრივი დევნა, სწრაფ, სიღრმისეულ და გამჭვირვალე გამოძიებას მოითხოვს. მივესალმებით ამგვარი გამოძიების დაწყებას საქართველოში, რის შესახებაც ქვეყნის ხელისუფლებამ განაცხადა. ველით, რომ დაცული იქნება სამოქალაქო და პოლიტიკური უფლებები, ასევე, უზრუნველყოფილი იქნება უცხო ქვეყნის იმ მოქალაქეთა უფლებები, რომლებიც ქვეყანაში კანონიერად ცხოვრობენ. ევროკავშირი ყურადღებით დააკვირდება ამ საქმეს,“ – ნათქვამია ფედერიკა მოგერინის განცხადებაში.

ჟურნალისტი აფგან მუხტარლი აზერბაიჯანიდან 2014 წელს გაემგზავრა. ის აზერბაიჯანის ხელისუფლების მხრიდან ხშირად განიცდიდა სხვადასხვა სახის ზეწოლას. მისი რამდენიმე სარჩელი ევროპის ადამიანის უფლებათა სასამართლოში კომუნიკაციის პროცესშია. ბოლო დროს ის თანამშრომლობდა საერთაშორისო მედიასა და ორგანიზაციებთან – IWPR და Meydan.tv

მუხტარლი თბილისიდან 2017 წლის 29 მაისს გაუჩნარდა. მოგვიანებით გაირკვა, რომ ის აზერბაიჯანელი სამართალდამცავების ხელში იყო. თავად მუხტარლის თქმით, ის საქართველოდან ადგილობრივი სპეცსამსახურების თანამშრომლებმა გაიტაცეს, ტომარა ჩამოაცვეს და აზერბაიჯანელ სამართალდამცავებს გადასცეს. მუხტარლის აზერბაიჯანის სასამართლომ 3-თვიანი წინასწარი პატიმრობა შეუფარდა საზღვრის უკანონო კვეთისა და კონტრაბანდის ბრალდებით. მუხტარლის თქმით, მას საზღვარზე 10 ათასი ევრო ჩაუდეს.