არაბეთის ქვეყნები ყატართან ურთიერთობას წყვეტენ

შვიდმა არაბულმა ქვეყანამ ყატართან დიპლომატიური კავშირის გაწყვეტის შესახებ განაცხადა

ასეთი ნაბიჯის გადადგმის მიზეზი გახდა ყატარის ემირის (მონარქის) პუბლიკაცია, რომელშიც მან ირანისადმი ურთიერთობის შერბილებისა და მისი სტრატეგიულ პარტნიორად აღქმისკენ მოუწოდა.

ყატარის საგარეო საქმეთა სამინისტრომ  განაცხადა, რომ ემირის სიტყვა ვიღაც უცნობი ჰაკერების მიერ დამზადებული „ფეიკია“. თუმცა, ამან სკანდალის განვითარება ვერ შეაჩერა, რადგან გამოქვეყნებული სიტყვის შინაარსი ახლახან გაკეთებული ოფიციალური განცხადებებისგან არ განსხვავდებოდა.

შვიდმა არაბულმა ქვეყანამ ყატარი ისეთი ტერორისტული ორგანიზაციების მხარდაჭერაში დაადანაშაულა, როგორებიცაა “ალ-ქაიდა”, “ისლამური სახელმწიფო” და „ძმები-მუსლიმები“. აღნიშნულმა ქვეყნებმა მოითხოვეს, რომ ყატარელ დიპლომატებს მათი ტერიტორია 48 საათის განმავლობაში დაეტოვებინათ.

ყატარი სპარსეთის ყურეში მდებარე პატარა ქვეყანაა ერთ სულ მოსახლეზე მსოფლიოში ერთ-ერთი ყველაზე მაღალი  შიდა მოხმარების პროდუქტის მაჩვენებლით. კეთილდღეობის წყაროა ნავთობისა და ბუნებრივი აირის უზარმაზარი მარაგი (მსოფლიოში ყველაზე დიდი).   

ექსპერტები იმაზე მიუთითებენ, რომ რამდენიმე წლის წინათ ანალოგიური სკანდალი უკვე მოხდა და საქმე მაშინაც დიპლომატიური ურთერთობების გაწყვეტამდე მივიდა. უთანხმოების მთავარი მიზეზი იყო ისლამის ორ მთავარ მიმართულებას – სუნიტებსა და შიიტებს – შორის არსებული უთანხმოება, რაც განსხვავებული დამოკიდებულებებით გამოიხატება; მაგალითად, სირიის, ლიბიისა და იემენის მოვლენებისადმი, ერთი მხრივ – ყატარისა და თურქეთის, ხოლო მეორე მხრივ, საუდის არაბეთის დამოკიდებულებით, სადაც დაპირისპირებულ მხარეს ემხრობიან.  

თუმცა, მოვლენების ისეთი განვითარება, როგორიც არის  ნავთობის მოპოვების შეზღუდვასთან დაკავშირებული შეთანხმებიდან ყატარის გამოსვლა, ან ყატარის მმართველი დინასტიის ძალადობრივი შეცვლა, ექსპერტებს ნაკლებად სარწმუნოდ მიაჩნიათ.