აზერბაიჯანის პრეზიდენტმა ბლოგერი ლაპშინი შეიწყალა
აზერბაიჯანის პრეზიდენტმა ილჰამ ალიევმა 11 სექტემბერს ხელი მოაწერა განკარგულებას მოგზაური ბლოგერის ალექსანდრ ლაპშინის შეწყალების შესახებ, რომელიც ბაქოს სასამართლოს მიერ სახელმწიფო საზღვრის უკანონოდ გადაკვეთისა და მთიან ყარაბაღში ჩასვლისთვის იყო დაპატიმრებული.
“ისრაელის მოქალაქე, ალქსანდრ ლაპშინი (1976 წელს დაბადებული), რომელსაც პატიმრობა ჰქონდა მისჯილი, სასჯელის მოხდისგან თავისუფლედება“, – ნათქვამია ქვეყნის მეთაურის განკარგულებაში მის ოფიციალურ ვებგვედზე.
საგულისხმოა, რომ ამ განკარგულებაში ლაპშინის მეორე (რუსეთის) მოქალაქეობა ნახსენები არ არის.
განკარგულება მისი ხელმოწერის დღიდან შედის ძალაში.
ბაქოს სისიხლის სამართლის განსაკუთრებით მძიმე დანაშაულებათა სასამართლომ 2 ივლისს ბლოგერს სამწლიანი პატიმრობა მიუსაჯა. სასმართლოს გადაწყვეტილებით, მას სასჯელის ვადა საერთო რეჟიმის ციხეში უნდა მოეხადა. ლაპშინს განაჩენი არ გაუსაჩივრებია, თუმცა განაცხადა, რომ ისრაელში ექსტრადიციის უფლების მოპოვებას შეეცდებოდა. ისრაელის სახელმწიფოს მხრიდან ექსტრადიციის შესახებ რაიმე შეთავაზება არ ყოფილა.
სასამართლოში თავის საბოლოო სიტყვაში ლაპშინმა თქვა, რომ წუხს, თუკი თავისი საქციელით ყარაბაღიდან დევნილებს ტკივილი მიაყენა, თუმცა იმავდროულად მან ისიც თქვა, რომ მის მოგზაურობას წმინდად ტურისტული ხასიათი ჰქონდა და პოლიტიკური ქვეტექსტი არ გააჩნდა. ამიტომაც, მას მიაჩნია, რომ მხოლოდ მორალური პასუხისმგებლობა უნდა დაეკისროს, და არა იურიდიული.
ლაპშინი 2016 წლის 16 დეკემბერს მინსკში აზერბაიჯანის მოთხოვნით დააკავეს, რადგან ის აზერბაიჯანის მხარესთან შეუთანხმებლად მთიან ყარაბაღში ჩასვლისთვის „შავ სიაში“ იყო შეყვანილი. ასეთ პირებს აზერბაიჯანში ჩასვლა ეკრძალებათ. 7 თებერვალს ბლოგერი ბაქოში სპეციალური რეისით ჩაიყვანეს.
აზერბაიჯანის გენერალური პროკურატურის მძიმე დანაშაულებათა სამძებრო განყოფილებამ ბლოგერის წინააღმდეგ თავიდან აზერბაიჯანის სისხლის სამართლის კოდექსის ორი მუხლით აღძრა საქმე: აზებაიჯანის სახელმწიფოს წინააღმდეგ მიმართული არაერთგზის გაკეთებული საჯარო მოწოდებები, და აზერბაიჯანის სახელმწიფო საზღვრის უკანონო გადაკვეთა. თუმცა, სასამართლომ ის მხოლოდ მეორე, უფრო რბილი მუხლით ცნო დამნაშავედ და სამი წელი მიუსაჯა.
