აზერბაიჯანის ოპოზიციამ წელს ბოლო მიტინგი გამართა

ოპოზიური დემოკრატიულ ძალთა ეროვნული საბჭოს მიერ შაბათს გამართული მიტინგის მონწილეებმა აზერბაიჯანის ხელისუფლება კორუფციაში დაადანაშაულეს, ასევე დემოკრატიული რეფორმების დაუყოვნებლივ ჩატარება და პოლიტპატიმრების გათავისუფლება მოითხოვეს.

ეს წელს მორიგი, რიგით მეხუთე საპროტესტო მიტინგი იყო. წინა აქციების მსგავსად, ის ქალაქ ბაქოს აღმასრულებელ ხელისუფლებასთან იყო შეთანხმებული და საგანგებოდ მისთვის განკუთვნილ ადგილას – ბაქოს გაეუბანში, სტადიონზე, პოლიციის გაძლიერებული დაცვის ქვეშ ჩატარდა.

ახალი მიტინგის დღის წესრიგი წინებისგან თითქმის არაფრით განსხვავდებოდა. გამომსვლელები ტრადიციულად ადანაშაულებდნენ ხელისუფლებას კორუფციაში, პოლიტიკური პატიმრების გათავისუფლებისკენ მოუწოდებდნენ და ყურადღებას ეკონომიკურ პრობლემებზე ამახვილებდნენ. და საბოლოოდ, მთავრობის გადადგომა მოითხოვეს.

დემოკრატიულ ძალთა ეროვნული საბჭოს საკოორდინაციო საბჭოს წევრმა, აგრარული საკითხების ექსპერტმა ვაჰიდ მაგრამლიმ (Vahid Maharramli) განაცხადა, რომ კრიზისის დაწყებიდან აზერბაიჯანის ეკონომიკა ორჯერ შემცირდა.

„ამ აზროვნებით, გონებით, უნარებით ისინი (ხელისუფლება) ვერაფრის მიღწევას ვერ შეძლებენ. ჩვენ მათ გზა უნდა ვუჩვენოთ. მათი გზა გადადგომაა“, – გადმოსცემს მაგერამლის სიტყვებს სააგენტო Turan.

უფლებადამცველმა ოგტაი გიულალიევმა თავის სიტყვაში განსაკუთრებული ადგილი დაუთმო პოლიტიკური პატიმრებისა და სიტყვის თავისუფლების პრობლემას.

„დამოუკიდებელი, ოპოზიციური ვებგვერდები დაბლოკილია, ქვეყანაში 160-ზე მეტი პოლიტპატიმარია. მათ შორის დაახლოებით 20 ჟურნალისტი და ბლოგერია. აზერბაიჯანი, პოლიტპატიმრების რაოდენობის მიხედვით, ევროპაში ლიდერია“, – განაცხადა გიულალიევმა.

პარტია “აზერბაიჯანის სახალხო ფრონტი”-ს ლიდერმა ალი კერიმლიმ ხელისუფლება მკაცრად გააკრიტიკა. კერიმლიმ განაცხადა, რომ 24-წლიანი მმართველობის განმავლობაში ხელისუფლებას ქვეყნის არც ერთი პრობლემა არ გადაუჭრია, არ არსებობს რაიმე წინსვლა ყარაბაღის კონფლიქტის დარეგულირებისა და ოკუპირებული ტერიტორიების დაბრუნების თვალსაზრისით.

ბოლოს კერიმლიმ განაცხადა, რომ დემოკრატიულ ძალთა ეროვნული საბჭო დროებით წყვეტს საპროტესტო აქციებს. თუმცა, მისი თქმით, ეს იმას არ ნიშნავს, რომ მიტინგები შეწყდება – „ჩვენ კიდევ უფრო მასობრივ, ძლიერ აქციებს ჩავატარებთ და ეროვნული საბჭო ამის შესახებ გაცნობებთ“, – განაცხადა კერიმლიმ.

ბაქოს პოლიციის მათავრი სამმართველოს მიერ მიტინგის შემდეგ გავრცელებულ განცხადებაში აღნიშნულია, რომ აქციაში 1000-მა ადამიანმა მიიღო მონაწილეობა – „საზოგადოებრივი წესრიგისა და სამართლებრივი ნორმების უხეშად დარღვევის შემთხვევები არ აღინიშნებოდა“, – განაცხადეს პოლიციაში.