აზერბაიჯანის მცხოვრებლები მტკნარი წყლით ბავშვების მასობრივმა მოწამლვამ ააფორიაქა

ქალაქ სუმგაითსა და მის შემოგარენში ბავშვების მძიმედ მოწამლვა გასულ უქმმეებზე აზერბაიჯანში სოციალური ქსელების მთავარ თემად იქცა.

4 დღის განმავლობაში სუმგაითის საბავშვო საავადმყოფოში პირღებინებისა და კუჭის აშლის სიმპტომებით 139 ადამიანი მიიყვანეს, მათ შორის – 2-დან 7 წლამდე 119 ბავშვი.

ბევრი მშობელი ვარაუდობს, რომ მოწამვლის მიზეზი ონკანის წყალია, რომელსაც ბავშვები ქუჩაში თამაშის დროს სვამდნენ. ერთმა ქალმა ვიდეომიმართვა ჩაწერა, რომელშიც ირწმუნება, რომ ის წყალსატევი, რომლიდანაც, მისი აზრით, სუმგაითსა და უახლოეს დასახლებულ პუნქტებს წყალი მიეწოდება, მოწამლულია. ეს ვიდეო სწრაფად გავრცელდა Whatsapp-ის ქსელით, და ის რამდენიმე ოპოზიციურმა გამოცემამ გააზიარა.

სუმგაითში მასობრივად მოწამლული ბავშვების ჰოსპიტალიზაციის შესახებ ინფორმაციამ ბაქოსა და სუმგაითის მოსახლეობაში პანიკა გამოიწვია. სოციალურ ქსელებში სწრაფად გავრცელდა ხმა რაღაც მოწამლული წყლის და უცნობი ვირუსის შესახებ, და ადამიანებს მოუწოდებენ, რომ ონკანის წყალი არ დალიონ. პანიკა იქამდე მივიდა, რომ ადამიანებმა ბოთლებში ჩამოსხმული წყლის ყიდვა დაიწყეს.

12 ივნისს ჯანდაცვის სამინისტროს პრეს-სამსახურმა გამოაქვეყნა ლაბორატორიული ანალიზების შედეგები, რომელთა თანახმად, მასობრივი მოწამლვის მიზეზი არის ჰაერწვეთოვანი ინფექცია, რომელსაც ხშირად “ნაწლავურ გრიპს” უწოდებენ.

განცხადებაში ასევე ნათქვამია, რომ “ამჯერად 46 ბავშვს სტაციონარული მკურნალობა უტარდება: “მათი მდგომარეობა დამაკმაყოფილებელია, და უახლოეს ხანში მათ სახლებში გაწერენ”. 

წყალმომარაგებაზე პასუხისმგებელი სახლმწიფო უწყება “აზრესუს” პრეს-მდივანი ანარ ჯაბრაილი უარყოფს ინფორმაციას სასმელი წყლის წყალსატევის მოწამლვის შესახებ. მისი თქმით, “აზრესუს” წყლის რეზერვუარებიდან წყლის სინჯები აიღეს. არავითარი წყლის დაბინძურება და მოწამლვა არ არის აღმოჩენილი. “ანალიზი ჩაუტარდა სამი დღის განმავლობაში აღებული წყლის სინჯებს.

წყლის სინჯების ანალიზის შედეგები ადასტურებს, რომ პანიკის არავითარი მიზეზი არ არსებობს. ამჟამად “აზრესუს” სპეციალისტები იმ ადამიანების სახლებში ატარებენ შემოწმებას, რომლებმაც საავადმყოფოებს მიმართეს. ამავე წყალსატევიდან მიეწოდება წყალი ბაქოსაც. მოწამლვა წყალს რომ უკავშირდებოდეს, მაშინ ასეთივე შემთხვევები ბაქოშიც უნდა ყოფილიყო”, – გადმოსცემს ჯიბრაილის სიტყვებს სააგენტო АPА.

ეკოლოგიური პროგნოზირების ეროვნული ცენტრის პრეზიდენტი ტელმან ზეინალოვი ვარაუდობს, რომ გამდინარე წყალი სუფთა წყალს შეერია. მისი თქმით, საკანალიზაციო მილები და წყალსადენები საბჭოთა დროიდან გადის მიწის ქვეშ ერთმანეთის გვერდიგვერდ და პარალელურად. დროთა განმავლობაში ეს მილები ჟანგდება, ცვდება და წყლები ერთმანეთს ერევა.