"მერკელმა და ღარიბაშვილმა პარკში გაისეირნეს?"
საქართველოს პრემიერისა და გერმანიის კანცლერის შეხვედრის ფოტოებმა ინტერნეტმომხმარებლები ხუმრობის ხასიათზე დააყენა
პრემიერ ღარიბაშვილისა და გერმანიის კანცლერის – ანგელა მერკელის ეს ფოტო, რომელიც პრემიერის ოფიციალურ გვერდზე დევს, ქართული ფესბუკის ჰიტად იქცა.
ფოტოს მინაწერი გვატყობინებს, რომ: “გაეროს გენერალური ასამბლეის ფარგლებში, საქართველოს პრემიერ-მინისტრი გერმანიის ფედერალური რესპუბლიკის კანცლერს, ანგელა მერკელს შეხვდა. კანცლერმა საქართველოს მთავრობის მეთაური მოიკითხა და წარმატება უსურვა.”
ფესბუკელთა მხიარულება გამოიწვია იმ ატმოსფერომ, რომელშიც შეხვედრა შედგა.
“ამათ რა, პარკში ისეირნეს?”
“ისე, კანცლერ მერკელს შარშან პურის რიგში შევხვდი გალერი ლაფაეტში და საგარეოპოლიტიკურ მიღწევად ჩამეთვლება?”
“შეხვედრა ორღობეში”;
“მგონი, გარეთ დაელოდა და რომ გამოვიდა, გამოეკიდა”;
“ეტყობა, რომ კარგად დაგეგმილი შეხვედრა იყო, და მხარეებმა ბევრ საკითხზე იმსჯელეს”, – წერდნენ ფესბუკმომხმარებლები.
პრემიერი ღარიბაშვილი ნიუ იორკში გაეროს გენერალურ ასამბლეას ესწრებოდა. მერკელისა და საქართველოს პრემიერის შეხვედრის ამსახველი სხვა ფოტოები ირაკლი ღარიბაშვილის პრეს-ცენტრს არ გაუვრცელებია.
