სომხეთში საკონტროლო-გამშვები პუნქტის უფროსი და საბაჟო-საბროკერო კომპნიის დირექტორი დააკავეს

სომხეთში  სომხეთი-საქართველოს საბაჟო პუნქტ „ბავრას“ უფროსი და საბაჟო-საბროკერო კომპანიის დირექტორი დააკავეს.

ორგანიზებულ დანაშაულთან ბრძოლის პოლიციის მთავარი სამართველოს მიერ გატარებული ღონისძიებების მეშვეობით, გამჟღავნდა ინფორმაცია, რომ რიგი კომპანიების ხელმძღვანელები და თანამშრომლები, ასევე ფიზიკური პირები სახელმწიფო შემოსავლების კომიტეტის საბაჟო სამსახურის წარმომადგენლებთან გარიგდნენ.

პირადად ან შუამავლების საშუალებით, ისინი საბაჟო სამსახურის თანამშრომლებს ქრთამს აძლევდნენ, და სანაცვლოდ, კანონით გათვალისწინებულზე ბევრად დაბალი ტარიფით იხდიდნენ მოსაკრებელსა და ექსპორტ-იმპორტის გადასახადს.

დანაშაული ხორციელდებოდა კომერციული ორგანიზაციის შუამავლობით, რომელიც საბაჟო პუნქტის ტერიტორიაზე საბაჟო-საბროკერო მომსახურებას სთავაზობდა.

ქრთამის მიცემის, აღებისა და შუამავლობის ფაქტზე აღძრულია სისხლის სამართლის საქმე.