სირიაში დაბომბვას 200-ზე მეტი ადამიანის სიცოცხლე შეეწირა
ამ კვირაში რამდენიმე დღის განმავლობაში გრძელდებოდა დამასკოს მახლობლად მდებარე სირიის ქალაქის – აღმოსავლეთ გუტას დაბომბვა. ეს არის უკანასკნელი დიდი რაიონი, რომელზეც კონტროლს ამბოხებულები ინარჩუნებენ, – იუწყება BBC.
სამართალდამცავთა ინფორმაციით, აღმოსავლეთ გუტას დაბომბვისას დაახლოებით 250 ადამიანი დაიღუპა. მათ შორის – 58 ბავშვია.
ადამიანის უფლებათა მონიტორინგის სირიის ცენტრის ინფორმაციით, აღმოსავლეთ გუტას დაბომბვის დროს ბაშარ ასადის ჯარს რუსული ავიაცია ეხმარებოდა. სამართალდამცავები ასევე ირწმუნებიან, რომ 5-დან 9 თებერვლამდე სამთავრობო ჯარმა აღმოსავლეთ გუტაზე უკვე მიიტანა შეტევა, რის შემდეგაც დაახლოებით ამდენივე მსხვერპლი იყო.
„ჩვენზე ყოველ წუთს 10-დან 20 საავიაციო შეტევას ახორციელებენ“, – უამბო BBC-ის ამ რაიონში მომუშავე ექიმმა – „ისინი ყველაფერს ბომბავენ: მაღაზიებს, ბაზრებს, საავადმყოფოებს, სკოლებს, მეჩეთებს, – ამბობს ექიმი ბასამი, – ვინმეს დახმარებას რომ აღმოვუჩენ, ერთ-ორ დღეში ისევ დაჭრილი მოჰყავთ ჩემთან“.
გაეროს წარმომადგენელმა პანოს მუმცისმა განაცხადა, რომ ბოლო რამდენიმე დღის განმავლობაში აღმოსავლეთ გუტაში ექვსი საავადმყოფო დაიბომბა. მისი თქმით, ამგვარი ქმედებები შეიძლება სამხედრო დანაშაულად შეფასდეს.
ბავშვთა უფლებების დამცველი ორგანიზაცია UNICEF-ის წარმომადგენლებმა სირიის მოვლენებთან დაკავშირებით მიმართვა გამოაქვეყნეს, და განაცხადეს, რომ მათ „სიტყვები აღარ ყოფნით“.
მიუხედავად იმისა, რომ ბოლო დღეებში მომხდარ დაბომბვებში რუსული ავიაციის მონაწილეობის დამადასტურებელი პირდაპირი საბუთები არ არსებობს, ამერიკულმა მხარემ უკვე მოუწოდა მოსკოვს, შეწყვიტოს ასადის რეჟიმის მხარდაჭერა და განაცხადა, რომ რუსეთის მთავრობა პასუხისმგებელია აღმოსავლეთ გუტაში მომხდარზე.
სამშაბათს, 20 თებერვალს აღმოსავლეთ გუტადან საპასუხო დარტყმა განხორციელდა: დაიბომბა დამასკო. ამის შედეგად დაპირისპირებულ მხარეთა შერიგების ცენტრი დაზარალდა. რამდენიმე ადამიანი დაიღუპა, დაჭრილია დაახლოებით ათი ადამიანი.
