სესხების გადავადება დაიწყო - საშეღავათო პერიოდის დასრულების შემდეგ გადასახდელი თანხა გაგეზრდებათ
სესხების რესტრუქტურიზაცია ეკონომიკის სტიმულირების იმ გეგმის ნაწილია, რომელიც კორონავირუსის გავრცელების გამო შექმნილი მდგომარეობით დაზარალებულ მოქალაქეებს მთავრობის რეკომენდაციით საბანკო სექტორმა შესთავაზა.
სესხებზე საშეღავათო პერიოდი 13 მარტიდან დაიწყო და 30 ივნისის ჩათვლით გაგრძელდება.
რას გულისხმობს საშეღავათო პერიოდი და არის თუ არა რეალურად ეს მართლაც შეღავათი?
მოდით, ეს საკითხი თიბისი ბანკის შეთავაზების მაგალითზე გავარკვიოთ.
1. ვის შეეხება საშეღავათო პერიოდი?
საშეღავათო პერიოდი შეეხება ყველა იმ ფიზიკურ და იურიდიულ პირს, ვინც თიბისი ბანკში საკრედიტო პროდუქტებით ამჟამად სარგებლობს.
2. საშეღავათო პერიოდი რომელ პროდუქტებზე გავრცელდება?
საშეღავათო პერიოდი გავრცელდება შემდეგ საკრედიტო პროდუქტებზე:
• იპოთეკური სესხები
• სამომხმარებლო სესხები
• სასწრაფო სესხი
• ავტო სესხები
• განვადება
• საკრედიტო ბარათები
• ოვერდრაფტი
• ლომბარდი
• სტანდარტული გრაფიკის მქონე ბიზნეს და აგრო სესხები;
3. შეეხება თუ არა საშეღავათო პერიოდი იმ მსესხებლებს, რომლებსაც ვადაგადაცილებული სესხი აქვთ?
დიახ, საშეღავათო პერიოდით სარგებლობა შეუძლიათ იმ მომხმარებლებსაც, რომლებსაც აქვთ ვადაგადაცილებული სესხები. ვადაგადაცილების დღეების რაოდენობიდან გამომდინარე, გარკვეულ შემთხვევებში საჭირო იქნება ინდივიდუალური განხილვა. დეტალურ ინსტრუქციებს მომხმარებლები 16 მარტიდან სმს-ების საშუალებით მიიღებენ.
4. რამდენ ხანს გაგრძელდება საშეღავათო პერიოდი? ანუ რამდენი ხნის განმავლობაში არ უნდა გადავიხადო ბანკში?
საშეღავათო პერიოდი გაგრძელდება 30 ივნისის ჩათვლით – გადავადდება მხოლოდ სამი გადახდა.
5.როდიდან დაიწყება საშეღავათო პერიოდი?
საშეღავათო პერიოდის 2020 წლის 13 მარტიდან დაიწყო.
6. გამეზრდება თუ არა სესხის პროცენტი საშეღავათო პერიოდით სარგებლობის შემთხვევაში?
არა, სესხის საკონტრაქტო განაკვეთი არ შეიცვლება.
7. გამეზრდება თუ არა სესხის ვადა?
დიახ, გაგეზრდებათ. სესხის ვადას დაემატება საშეღავათო პერიოდი, ანუ 3 თვე.
8. გამეზრდება თუ არა ყოველთვიურად გადასახდელი თანხა?
დიახ, საშეღავათო პერიოდის გასვლის შემდეგ ყოველთვიური გადასახდელი თანხა გაიზრდება. საშეღავათო პერიოდის განმავლობაში დარიცხული პროცენტი სესხის დარჩენილ ვადაზე გადანაწილდება.
9. საშეღავათო პერიოდის განმავლობაში სესხზე პროცენტი დამერიცხება?
დიახ, საშეღავათო პერიოდის განმავლობაში, სესხის ძირითად თანხაზე გაგრძელდება პროცენტის დარიცხვა და ის საშეღავათო პერიოდის დასრულების შემდეგ სესხის დარჩენილ ვადაზე გადანაწილდება.
10. პროცენტზე პროცენტი ხომ არ დამერიცხება?
არა, პროცენტზე პროცენტის დარიცხვა არ ხდება.
11. რამდენიმე სესხი თუ მაქვს, შემიძლია თუ არა ავირჩიო რომელზე გავრცელდეს საშეღავათო პერიოდი და რომელზე არა?
ფიზიკური პირის შემთხვევაში არ იქნება შესაძლებელი სესხების არჩევა, საშეღავათო პერიოდი ჩაირთვება ან ყველა საკრედიტო პროდუქტზე ან მომხმარებლის უარის შემთხვევაში – არც ერთზე.
ბიზნეს სესხების და სტატუს მომხმარებლების შემთხვევაში ბანკი ყველა შემთხვევას ინდივიდუალურად განიხილავს.
12. თუ არ მინდა საშეღავათო პერიოდით სარგებლობა და სესხის ვადის გახანგრძლივება, მაშინ რა ხდება?
თქვენ გაქვთ უფლება, საშეღავათო პერიოდით არ ისარგებლოთ.
შეგიძლიათ ისარგებლოთ დისტანციური მომსახურებით და ბანკს სმს-ის საშუალებით მისწეროთ, რომ საშეღავათო პერიოდით სარგებლობა არ გინდათ, მას შემდეგ, რაც ბანკისგან მიიღებთ შესაბამის შეტყობინებას.
13. გავრცელდება თუ არა საშეღავათო პერიოდი მათზე, ვინც საშეღავათო აქციით უკვე სარგებლობს?
თუ მიმდინარე სესხზე საშეღავათო პერიოდი გრძელდება ივნისის ჩათვლით, ამ შემთხვევაში საშეღავათო პერიოდით ვერ ისარგებლებთ. მაგალითად, თუ თქვენ სესხი აიღეთ 2020 წლის თებერვალში და გქონდათ 6-თვიანი საშეღავათო პერიოდი, ანუ პირველი გადასახადი ივლისში უნდა შეგეტანათ, ასეთ შემთხვევაში დამატებითი საშეღავათო პერიოდით ვერ ისარგებლებთ.
თუ მიმდინარე სესხზე საშეღავათო პერიოდი აპრილში ან მაისში სრულდება, ასეთ შემთხვევაში საშეღავათო პერიოდი 30 ივნისამდე გაგრძელდება.
14. როგორ გაიგებს მომხმარებელი თარიღის გადაწევის შესახებ?
16 მარტიდან მომხმარებლები მიიღებენ შეტყობინებას საშეღავათო პერიოდის ჩართვის თაობაზე. 20 მარტამდე მომხმარებლებს ექნებათ შესაძლებლობა, რომ უარი თქვან საშეღავათო პერიოდით სარგებლობაზე. მას, ვინც უარის თაობაზე ბანკს არ მიმართავს, ავტომატურად ჩაერთვება საშეღავათო პერიოდი.
15. ვრცელდება თუ არა საშეღავათო პერიოდი 16 მარტიდან გაცემულ ახალ სესხებზე?
დიახ, 16 მარტიდან გაცემულ სესხებზე გავრცელდება საშეღავათო პერიოდი ინდივიდუალური განხილვის საფუძველზე;
16. იქნება თუ არა შესაძლებელი, მომხმარებელმა ინტერნეტბანკიდან დაფაროს წინსწრებით სესხი თუ სარგებლობს საშეღავათო პერიოდით?
დიახ, ბანკის დისტანციური არხებიდან შესაძლებელი იქნება სესხების წინსწრებით დაფარვა.
მოდით, ახლა გავარკვიოთ, რამდენით და როგორ იზრდება სესხი. ამისთვის ჩვენ თიბისი ბანკს ჩვენს რესპონდენტთან ერთად მივმართეთ.
თეონას თიბისი ბანკიდან 15-წლიანი იპოთეკური სესხი აქვს გამოტანილი – 76 000 ლარი. სესხის აღებიდან 3 წელია გასული, დარჩენილია კიდევ 147 თვე. თეონა თვეში 968 ლარს იხდის.
თეონას ბანკში უთხრეს, რომ თუ საშეღავათო პერიოდით ისარგებლებს, დარჩენილი 147 თვე 150 თვემდე გაიზრდება და ივლისიდან ყოველთვიურად დამატებით კიდევ 25 ლარის გადახდა მოუწევს.
“მეც ბევრის მსგავსად მეგონა, რომ სამი თვის განმავლობაში არაფერს გადავიხდიდი და ივლისიდან სესხის დაფარვას ჩვეულებრივი გრაფიკით გავაგრძელებდი, მაგრამ შევცდი,” -ამბობს თეონა, – “სესხის ვადა მეზრდება სამი თვით და თითქმის ერთი თვის გადასახადს – 846 ლარს კიდევ ზედმეტად ვიხდი. ამიტომ საშეღავათო პერიოდის გამოყენებაზე უარი ვთქვი.”
თუმცა, ტურისტულ ბიზნესში ჩართული ბევრი ადამიანისთვის ასეთი გადავადებაც შეღავათია.
თუ გაინტერესებთ, საშეღავათო პერიოდის გამოყენების შემთხვევაში თქვენი სესხი რამდენით გაიზრდება, ამისთვის ბანკს პირადად უნდა მიმართოთ და დეტალები გაარკვიოთ.
