საპრეზიდენტო არჩევნები რუსეთში: მთავარი ინტრიგა საარჩევნო აქტივობაა

18 მარტის საპრეზიდენტო არჩევნებზე, რუსეთის მოქალაქეები პრეზიდენტს 6 წლიანი ვადით ირჩევენ. მანამდე ვადა 5 წელი იყო, მაგრამ 2008 წელს რუსეთის კონსტიტუციაში შესაბამისი ცვლილება შევიდა და ვადა ერთი წლით გაიზარდა.

წინასაარჩევნო პროგნოზების დროს ეჭვი არავის ეპარებოდა მოქმედი პრეზიდენტის, ვლადიმირ პუტინის გამარჯვებაში.

გამარჯვების შემთხვევაში, პუტინი პრეზიდენტის თანამდებობას მეოთხედ დაიკავებს. არჩევნების პირველადი შედეგები 19 მარტს დილით გახდება ცნობილი.

ამომრჩეველთა აქტივობა ნებისმიერ არჩევნებზე მნიშვნელოვანია, მაგრამ ამ არჩევნებზე აქტივობას განსაკუთრებული მნიშვნელობა აქვს. მთავარი რუსი ოპოზიციონერი ალექსეი ნავალნი რამდენიმე თვის განმავლობაში რუსეთის რეგიონებში მიტინგებს ატარებდა, სადაც ხალხს არჩევნების ბოიკოტისკენ მოუწოდებდა.

ნავალნიმ ეს გრძელვადიანი აქცია მას შემდეგ დაიწყო, რაც ცესკომ უარი უთხრა საპრეზიდენტო კანდიდატად რეგისტრაციაზე.

[su_quote]რა იყო მოსალოდნელი მთავარი რუსი ოპოზიციონერი ალექსეი ნავალნისგან, თუკი ის რუსეთის პრეზიდენტი გახდებოდა?JAMnews მოკლედ მისი ბიოგრაფიისა და პოლიტიკური შეხედულებების შესახებ[/su_quote]

ალექსეი ნავალნი ერთი წლის განმავლობაში ატარებდა ფართომასშტაბიან კამპანიას, მოგზაურობდა მთელი ქვეყნის მასშტაბით, აწყობდა მიტინგებს და საკუთარ Youtube-არხზე მაღალი თანამდებობის მქონე კორუმპირებული ჩინოვნიკების შესახებ გამოძიებებს აქვეყნებდა.

მას არაერთხელ განუცხადებია, რომ ამ არჩევნებზე კრემლის მთავარი მიზანია ამომრჩეველთა რაც შეიძლება მაღალი აქტივობის მიღწევა, რადგან სწორედ ეს ხდის არჩევნებს ლეგიტიმურს. ამიტომ, ნავალნის ბევრი მომხრე არჩევნებზე დამკვირვებლად ჩაეწერა და ამომრჩეველთა აქტივობას აკვირდებოდა.

დღეს, არჩევნების დღეს, ჟურნალისტებმა ნავალნის ჰკითხეს, ჩაატარებს თუა არა ის მიტინგს საარჩევნო უბნების დახურვის შემდეგ.

„დღეს ღამით გადაწყდება, იქნება თუ არა რაიმე, რადგან დარღვევების შესახებ ძირითადი მონაცემები უბნების დახურვის შემდეგ გაჩნდება“, – უპასუხა პოლიტიკოსმა.

რა მდგომარეობაა ამ მომენტში ამომრჩეველთა აქტივობის მხრივ?

„ნოვაია გაზეტას“ ინფორმაციით, 15.00 (მოსკოვის დროით) ამომრჩეველთა ყველაზე დაბალი აქტივობა იყო პეტერბურგში, ყველაზე მაღალი – ჩუვაშეთში.

პეტერბურგში 15.00 ხმის მისაცემად ამომრჩეველთა მოსალოდნელი რაოდენობის 38.99 პროცენტი მივიდა;

მოსკოვში — 40.06 პროცენტი;

ლიდერებს შორის კი აღმოჩნდა:

ჩუვაშეთი  — 71.76 პროცენტი;

იამალო-ნენეცკის ავტონომიური ოლქი – 69.93 პროცენტი;

ჩეჩნეთი — 68.56 პროცენტი.

ა

მ საპრეზიდენტო არჩევნებში რუსეთში წარმოდგენილია რვა კანდიდატი – ბოლო 18 წლის განმავლობაში კანდიდატების ყველაზე დიდი რაოდენობა. სტანდარტული კანდიდატებიდან სიაში ორი კანდიდატია – ვლადიმირ პუტინი და ვლადიმირ ჟირინოვსკი. ჟირინოვსკი რუსეთის ისტორიაში არსებულ ყველა საპრეზიდენტო არჩევნებში მონაწილეობდა.

მისულებს ასევე შეუძლიათ ხმა მისცენ გრიგორი იავლინსკის, რომელსაც 2000 წლის შემდეგ არჩევნებში მონაწილეობა არ მიუღია. თავის პროგრამაში მან პირობა დადო, რომ სირიასა და აღმოსავლეთ უკრაინაში ომს შეწყვეტს, ყირიმის სტატუსის თაობაზე საერთაშორისო კონფერენციის ინიცირებას მოახდენს, რუსეთის ბიუჯეტს გადახედავს და განათლებისა და მედიცინისთვის განკუთვნილ ხარჯებს გაზრდის. თუმცა, იავლინსკი ღიად აცხადებდა, რომ ის ამ არჩევნებში ვერ გაიმარჯვებდა, და მისი მიზანი 10 მილიონი ხმის მიღება იყო.

მსგავსი პროგრამა წარადგინა ქსენია სობჩაკმაც, რომელმაც ნახევარი წლის წინ მოულოდნელად განაცხადა არჩევნებში თავისი მონაწილეობის შესახებ. ის თავს „ყველას მოწინააღმდეგე კანდიდატად“ წარმოგვიდგენდა. ქსენია – საკტ-პეტერბურგის ყოფილი მერის, ანატოლი სობჩაკის ქალიშვილია. 90-იან წლებში სობჩაკის უახლოესი თანაშემწე ვლადიმირ პუტინი იყო.

ქსენია სობჩაკი არაერთხელ გამოსულა პირადად ვლადიმირ პუტინისა და რუსეთის ახლანდელი ხელისუფლების წინააღმდეგ მკვეთრი კრიტიკით. თუმცა, ბევრ ავტორიტეტულ ექსპერტს მიაჩნია, რომ სობჩაკის საპრეზიდენტო კამპანია კრემლთან არის შეთანხმებული და ალექსეი ნავალნისგან ყურადღების გადატანის საშუალებას წარმოადგენს.

ამ არჩევნებზე კიდევ ერთი პრეზიდენტობის კანდიდატია – პაველ გრუდინინი, ის რუსეთის ფედერაციის კომუნისტური პარტიის მიერ არის წამოყენებული. მან შეცვალა რუსეთის ფედერაციის კომუნისტური პარტიის მეთაური გენადი ზიუგანოვი, რომელიც აქამდე ოთხჯერ მონაწილეობდა არჩევნებში.

ბიულეტენში კიდევ რამდენიმე გვარია – სურაიკინი, ტიტოვი და ბაბურინი, მაგრამ ექსპერტები პრაქტიკულად ერთხმად ამბობენ, რომ ისინი ხმათა უმნიშვნელო რაოდენობას დააგროვებენ.