მალაიზიური ბოინგის მსხვერპლთა ნათესავებს 400 მილიონი დოლარის კომპენსაცია გამოუყვეს

აშშ-ის სასამართლომ დონეცკის ოლქის თავზე 2014 წელს მომხდარი ავიაკატასტოფის დროს დაღუპულთა თვრამეტი ნათესავის სარჩელი დააკმაყოფილა. ამის შესახებ „ნოვაია გაზეტა“ იუწყება:

სასამართლომ თვითგამოცხადებული „დონეცკის სახალხო რესპუბლიკის“ ყოფილი თავდაცვის მინისტრი იგორ სტრელკოვი მალაიზიური ბოინგის  MH-17 რეისის დაღუპვაში დამნაშავედ ცნო. ახლა სტრელკოვმა დაღუპულთა თითოეულ ნათესავს, რომლებმაც სასამართლოს მიმართეს, 20 მილიონი დოლარის ოდენობის კომპენსაცია უნდა გადაუხადოს.

სტრელკოვმა უკვე განაცხადა, რომ არ ცნობს ამერიკული სასამართლოს გადაწყვეტილებას და კომპენსაციის გადახდას არ აპირებს. „თუკი ეს ადამიანები რაიმე გზით მაიძულებენ, რომ ეს ფული გადავიხადო, მაშინ კიდევ მომდევნო ათას წელიწადს მომიწევს ცხოვრება“, –  ასეთი იყო ამ სიტუაციასთან დაკავშირებით სტრელკოვის კომენტარი, რითაც, როგორც ჩანს, იმას გულისხმობდა, რომ ის კომპენსაციის გადასახდელად საკამარის ფულად სახსრებს არ ფლობს.

2017 წლის 17 ივლისს კომპანია „MalaysiaAirlines“-ის სამგზავრო თვითმფრინავი, რომელიც ამსტერდამი-კუალუ-ლუმპურის მიმართულებით მიფრინავდა, დონეცკის თავზე გადაფრენისას ჩამოვარდა. როგორც მოგვიანებით საერთაშორისო გამოძიების შედეგად დადგინდა, თვითმფრინავის ჩამოვარდნის მიზეზი რაკეტა „დედამიწა-ჰაერი“ გახდა, რომელიც „ბუკის“ კომპლექსის რუსული საზენიტო-სარაკეტო დანადგარიდან იქნა გაშვებული. რუსეთის ხელისუფლება საკუთარ ბრალს არ აღიარებს. საერთაშორისო გამოძიება, რომელშიც ნიდერლანდები, უკრაინა, მალაიზია, ბელგია და ავსტრალია მონაწილეობენ, გრძელდება. მოსალოდნელია, რომ ის უახლოეს თვეებში დასრულდება და  საერთაშორისო ტრიბუნალი დაიწყება.