ნატო აფხაზეთს მოუწოდებს, გამშვები პუნქტების დაკეტვის შესახებ გადაწყვეტილებას გადახედოს

ნატო აფხაზეთს მოუწოდებს, ენგურზე გამშვები პუნქტების დახურვის შესახებ თავის გადაწყვეტილებას გადახედოს.

„საქართველოს რეგიონის, აფხაზეთის ადმინისტრაციულ საზღვარზე ორი გამშვები პუნქტის დაკეტვა, რომლითაც ყოველდღიურად ასობით მოქალაქე სარგებლობს, უარყოფითად აისახება ადგილობრივ სიტუაციასა და რეგიონის სტაბილურბაზე“, – განაცხადა 28 თებერვალს ნატოს ოფიციალურმა წარმომადგენელმა ოანა ლუნგესკუმ.

მისი თქმით, ეს ნაბიჯი თავისუფალ გადაადგილებას შეზღუდავს და ნეგატიურად აისახება ადგილობრივი მოსახლეობის ცხოვრებაზე, რასთან დაკავშირებითაც ლუნგესკუმ აფხაზეთის ხელისუფლებას მოუწოდა, საკუთარ გადაწყვეტილებას გადახედოს.

ამავე საკითხთან დაკავშირებით 25 თებერვალს განცხადებით გამოვიდა  საგარეო პოლიტიკის დარგში ევროკავშირის უმაღლესი წარმომადგენელი ფედერიკა მოგერინი.

„ამგვარი ცალმხრივი გადაწყვეტილება ეწინააღმდეგება იმ ვალდებულებებს, რომლებიც კონფლიქტით დაზარალებული მოსახლეობის საცხოვრებელი პირობების გაუმჯობესებასა და მათი უსაფრთხოების დონის გაზრდას ითვალისწინებს… იქმნება ატმოსფერო, რომელიც ხელს არ უწყობს კონფლიქტის ხანგრძლივად დარეგულირებასა და რეგიონში საერთო სტაბილურობის შენარჩუნებას“, – ნათქვამია მოგერინის სახელით გავრცელებულ განცხადებაში.

ევროკავშირი მოუწოდებს, არ დაკეტონ გამშვები პუნქტები, რათა უზრუნვეყოფილ იქნას გადაადგილების თავისუფლება, მათ შორის ჰუმანიტარული მიზნებითაც.

ევროკავშირის წარმომდგენლის განცხადებას გამოეხმაურა აფხაზეთის საგარეო საქმეთა სამინისტრო, რომელმაც განაცხადა, რომ მოგერინის სიტყვები „ცინიზმის მწვერვალად“ გამოიყურება – იმის გათვალისწინებით, რომ გასული წლის დეკემბერში აფხაზურმა მხარემ, ჟენევის დისკუსიების თანათავმჯდომარეთა დახმარებით, მოგერინის გადასცა მისადმი დაწერილი წერილი, რომელიც ეხებოდა იმ შეზღუდვებსა და წინააღმდეგობებს, რაც აფხაზეთის მოქალაქეებს ხვდებათ, მათ შორის – თავიანთი გადაადგილების უფლების რეალიზაციისას. კერძოდ, ლაპარაკი იყო აფხაზეთის მოქალაქეებისთვის ევროკავშირის ქვეყნებში გასამგზავრებელი ვიზების მიღებასთან დაკავშირებულ სირთულეებზე.

აფხაზეთის საგარეო საქმეთა უწყებაში უფრო გონივრულად მიაჩნიათ „თუკი ევროკავშირის ხელმძღვანელობა აფხაზეთის მოქალაქეების საერთაშორისო იზოლაციის პრობლემას უფრო ფართო კონტექსტში განიხილავს, და არა მხოლოდ აფხაზეთის გალის რაიონთან მიმართებით“.

აფხაზეთის ხელისუფლების გადაწყვეტილებით, ენგურის გასწვრივ საზღვარზე ყველა გამშვები პუნქტი უნდა დაკეტოს, ენგურის ხიდზე მდებარე საკონტროლო გამშვები პუნქტის გარდა. ამის გამო, ბევრ მაცხოვრებელს შეექმნება პრობლემა, რადგან საქართველოს მხარეს მოსახვედრად ამიერიდან ზედმეტი ათეულობით კილომეტრის გავლა მოუწევთ.

სტატიაში გამოთქმული მოსაზრებები, მხოლოდ ავტორის შეხედულებებსა და ტერმინოლოგიას გადმოსცემს, და აუცილებელი არ არის, რომ რედაქციის პოზიციას ასახავდეს.