მკვლელობა, სასამართლო, ახალი სასამართლო: აფხაზეთში ხმაურიანი საქმის ირგვლივ ისევ სკანდალია

ფოტო: იბრაგიმ ჭკადუა

აფხაზეთის ერთ-ერთი ყველაზე ხმაურიანი დანაშაულის ახალი სკანდალური განვითარება

2012 წელს ჩადენილმა თვით ამ დანაშაულმა განსაკუთრებული ყურადღება მიიქცია – აფხაზეთის პარლამენტის დეპუტატმა ნოდიკ კვიცინიამ ორგანიზება  გაუწია რუსი ბიზნესმენის სერგეი კლიმანტოვიჩისა და მისი მეგობარი ქალის ოკსანა სკარედნოვას მკვლელობას.

2016 წლის  18 ოქტომბერს ამ საქმის ხუთ ფიგურანტს მიესაჯა 13 და 20 წლით თავისუფლების აღკვეთა.

და აი, მოვლენების ახლებური განვითარება – აფხაზეთის უზენაესი სასამართლოს საკასაციო კოლეგიამ, მოსამართლე თემურ თარბას, ოკსანა ფილიასა და ჰენრი გამისონიას თავმჯდომარეობით, ეს გადაწყვეტილება გააუქმა და დადგინა, რომ  სისხლის სამართლის ეს საქმე სასამართლოს უნდა  გადაეგზავნოს თავიდან განსახილველად.

ფოტო: ანაიდ გოგორიანი

ამას საზოგადოების  დაუყოვნებელი და მრისხანე რეაქცია მოჰყვა.

იმის შესახებ, რომ სასამართლომ ამგვარი გადაწყვეტილება მიიღო, პირველი შეტყობინება ერთ-ერთი სოციალური ქსელის საკუთარ გვერდზე ყოფილმა გენერალურმა პროკურორმა ალექსეი ლომიამ გამოაქვეყნა. ამ თემასთან დაკავშირებული მისი პოსტი უაღრესად ემოციური იყო:

ამ საქმეზე მიღებული ახალი გადაწყვეტილების მთელი კონტექსტი დექტექტიურად გამოიყურება. იმის შესახებ, რომ საკასაციო სარჩელის განსახილველად სასამართლო სხდომა იყო ჩანიშნული, არც ერთი ჟურნალისტი და რედაქტორი არ იყო ინფორმირებული. მეტიც, ძლიერი და ხნგრძლივი თოვის გამო, აფხაზეთში ყველა სასამართლო პროცესი სამომავლოდ გადაიდო.

კლიმანტოვიჩისა და მისი მეგობარი ქალის მკვლელობის საქმეზე საკასაციო კოლეგიის უეცრად მოწვევა ნამდვილი სიურპრიზი აღმოჩნდა. მხოლოდ სულ ბოლო მომენტში მიიწვიეს სახელმწიფო ტელევიზიის გადამღები ჯგუფი, მანამდე კი უკვე მიღებული გადაწყვეტილება წაიკითხეს.

მას შემდეგ, რაც საკასაციო კოლეგიის გადაწყვეტილების სრული ტექსტი გამოქვეყნდება, ბრალდებას ათი დღე ექნება ვერდიქტის გასასაჩივრებლად. იმ შემთხვევაში, თუკი გასაჩივრება შედგება, მას უზენაესი სასამართლოს პრეზიდიუმი განიხილავს.

საზოგადოება განრისხებულია

ასეთი არაპოპულარული გადაწყვეტილების გამოტანის გამო, სოციალურ ქსელებში მოსამართლეებისა და  სასამართლოს ვერდიქტის განხილვამ, უფრო სწორად კი გაკიცხვამ,  რამდენიმე დღით  სრულიად დაჩრდილა ყველაზე პოპულარული თემა მარტის საპარლამენტო არჩევნების შესახებ.

სიტყვა „სირცხვილი“ კომენტარების უმრავლესობის ტონალობის განმსაზღვრელი გახდა.

ყოფილი გენერალური პროკურორის ალექსეი ლომიას პოსტის ქვეშ არის კლემანტოვიჩის ქვრივის ნატალიას კომენტარი:

განაჩენის გამაუქმებელი მოსამართლე თემურ თარბა – სოციალური ქსელების აქტიური მომხმარებელია. ის რეგულარულად პოსტავს საკუთარ ლექსებს, რომლებიც საკმაოდ პოპულარულია. სასამართლოს გადაწყვეტილების შემდეგ მოსამართლეებისადმი ბრალდებების ნაკადს თარბას კომენტარი მოჰყვა იმის შესახებ, რომ მიუხედავად განჩენის გაუქმებისა, ბრალდებულები პატიმრობაში დარჩებიან.

რუსი ბიზნესმენი სერგეი კლემანტოვიჩი ხელმძღვანელობდა კომპანიას „ელ პეტროლეუმ – აფხაზეთი“, რომელიც ჯართის დამზადებითა და დამუშავებით, ასევე – ღორღის დამზადებით იყო დაკავებული. 2012 წლის სექტემბრის დასაწყისში კლემანტოვიჩი და მისი თანამგზავრი ოკსანა სკარედნოვა, აფხაზეთის ტერიტორიაზე შესვლის შემდეგ უეცრად გაქრნენ. ერთ წელიწადზე ცოტა მეტი ხნის გასვლის შემდეგ კი, 2013 წლის ოქტომბერში მათი გვამები სოფელ აძუბჟაში, ოჩამჩირეს რაიონში, მიტოვებულ ჭაში აღმოაჩინეს.

გენერალურმა პროკურატურამ მკვლელობაში ბრალი ხუთ ეჭვმიტანილს წაუყენა: პარლამენტის მოქმედ დეპუტატ ნოდიკ კვიცინიას და მის ოთხ თანამზრახველს – რამინ ჰმაილს, აჰრა გოპიას, ჯუმბერ ბიგვავას და ასლან ცვიჟბას. 

დანაშაულის ორგანიზატორად მაშინ კვიცინია აღიარეს. მას კლემანტოვიჩთან საქმიანი ურთიერთობა ჰქონდა. კერძოდ, რუსეთის მოქალაქემ დეპუტატისგან ზღვისპირა ტერიტორიის რამდენიმე ჰექტარი შეიძინა, რომლის საფასურიც, კვიცინიას თქმით, მან სრულად არ გადაიხადა. პირველი ინსტანციის სასამართლო იმ დასკვნამდე მივიდა, რომ დანარჩენი ოთხი ფიგურანტი ნოდიკ კვიცინიამ დაიქირავა. მათ ბიზნესმენი და მისი თანამგზავრი ქალი გაიტაცეს, რამდენიმე დღეში კი მოკლეს და მათი სხეულები ჭაში ჩაყარეს.

თავად დეპუტატი, რომელსაც პირველი ინსტანციის სასამართლომ 16-წლიანი მკაცრი რეჟიმის სასჯელი მიუსაჯა, მოცემულ მომენტში გაქცეულია. ზოგიერთი მონაცემის მიხედვით, კვიცინია საქართველოს ტერიტორიაზე იმალება. ძიებისა და სასამართლო პროცესის მიმდინარეობისას ის  დაკავებული არ იყო, რადგან პარლამენტმა მას, მართალია, იმუნიტეტი  მოუხსნა, მაგრამ მისი დაკავება აკრძალა.

2016 წლის 28 ოქტომბერს, როდესაც რუსი ბიზნესმენისა და მისი მეგობარი ქალის მკვლელობის საქმეზე განაჩენი უნდა გამოცხადებულიყო, ნოდიკ კვიცინია სასამართლო სხდომაზე არ გამოცხადდა. მისმა ადვოკატმა წარადგინა ცნობა, რომ კვიცინია ჰოსპიტალიზებული იყო. თუმცა, მოგვიანებით გაირკვა, რომ კვიცინიამ იცოდა, თუ რა ვერდიქტს გამოიტანდნენ, და წინასწარ მიიმალა. 

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არემთხვეოდეს