იან კელი: გამშვები პუნქტების დახურვის საკითხს ეუთო-ს და ჟენევის მოლაპარაკებების ფარგლებში დავაყენებთ

აშშ-ის ელჩი საქართველოში იან კელი 26 იანვარს აფხააზეთის ადმინისტრაციულ საზღვარზე, ხურჩა-ნაბაკევის, ასევე ორსანტია-ოტობაიას მონაკვეთებზე იმყოფერბოდა. სოხუმის მიერ გამშვები პუნქტების დახურვის გადაწყვეტილებასთან დაკავშირებულ ვითარებას დიპლომატი ადგილზე გაეცნო.

იან კელიმ ამ ფაქტის გამო შეშფოთება გამოხატა. კელის განცხადებით, სასაზღვრო-გამშვები პუნქტის დახურვა ადგილობრივ მცხოვრებთა გადაადგილებას შეზღუდავს.

„ ჩვენ არ ვაღიარებთ აფხაზეთის დამოუკიდებლობას და შესაბამისად, არ ვაღიარებთ არანაირ ხაზს, ადმინისტრაციულ საზღვარს და შესაბამისად, არანაირ სასაზღვრო გამშვებ პუნქტებს. ამერიკის შეერთებული შტატების მთავრობის დამოკიდებულება არის ის,რომ საქართველო არსებობს საერთაშორისოდ აღიარებული საზღვრების ფარგლებში.რაც შეეხება მექანიზმს, თუ როგორ შეიძლება ეს გადაწყვეტილება იყოს შეცვლილი, ჩვენ ამ საკითხებს წინ წამოვწევთ ეუთო-ს ფარგლებში. რასაკვირველია,  ჟენევის მოლაპარაკებების ფარგლებშიც“- განაცხადა იან კელიმ.

მდინარე ენგურზე გამშვები პუნქტების დახურვასთან დაკავშირებით აფხაზეთის ხელისუფლების გადაწყვეტილებას განცხადებით გამოეხმაურა გაერო-ს მუდმივი კოორდინატორი და გაეროს განვითარების პროგრამის მუდმივი წარმომადგენელი საქართველოში, ნილს სკოტი.  განცხადებაში ნათქვამია, რომ ხურჩა-ნაბაკევისა და ორსანტია-ოტობაიას გამშვები პუნქტების დახურვა ნეგატიურ გავლენას იქონიებს საზღვრისპირა სოფლების მოსახლეობაზე და ხელს შეუწყობს მათ იზოლაციას.

გაეროს კოორდინატორი მოუწოდებს შესაბამის მხარეებს, უზრუნველყონ ადამიანების უფლებების დაცვა და ამ გადაწყვეტილებით მიღებული პოტენციური შედეგები განიხილონ.

ქართული მხარე აპირებს,  ამ საკითხზე ინფორმაცია საერთაშორისო საზოგადოებას მიაწოდოს.

“ჩვენ გვაქვს კომუნიკაცია ყველა მხარესთან, პარტნიორებთან და  ყველაფერს გავაკეთებთ, რომ მოსახლეობას გადაადგილების შესაძლებლობა არ შეეზღუდოს.საზღვრის ჩაკეტვის შემთხვევაში ადგილობრივი მოსახლეობისთვის გვექნება მძიმე ჰუმანიტარული გამოწვევა. საზღვრის ჩაკეტვასთან დაკავშირებით ხელისუფლების დამოკიდებულება კი ცალსახად ნეგატიურია,“- აცხადებს შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი.

ოპოზიციას კი ხელისუფლების რეაქცია დაგვიანებულად მიაჩნია და მმართველ გუნდს მოუწოდებს პარტნიორები და მოკავშირეები საქმის კურსში დროულად ჩააყენოს.

„გამშვები პუნქტის დახურვა აუცილებლად გასაპროტესტებელია ყველა დიპლომატიურ დონეზე,თუმცა საერთაშორისო თანამეგობრობაში ქართული დიპლომატიური მისიები საკმაოდ პასიურები არიან,“- განაცხადა „ნაციონალური მოძრაობის“ წევრმა ნიკა რურუამ.

აფხაზეთი ადმინისტრაციულ საზღვარზე, სოხუმის გადაწყვეტილებთ,  6-დან ოთხი საკონტროლო-გამშვები პუნქტი დაიხურა. სოხუმის ხელისუფლება საბოლოოდ მხოლოდ ერთის  – ენგურის ხიდზე, დატოვებას გეგმავს.

სტატიაში გამოთქმული მოსაზრებები ავტორის ტერმინოლოგიასა და შეხედულებებს გადმოსცემს და აუცილებელი არ არის, რედაქციის  პოზიციას ასახავდეს.