ევროკავშირმა რუსეთიდან ელჩი გაიწვია

ბრიუსელში გამართულ ევროკავშირის სამიტზე მიღებულია რუსეთიდან ევროკავშირის ელჩის გაწვევის გადაწყვეტილება. ევროპული ქვეყნების ლიდერებმა ეს გადაწყვეტილება ხანგრძლივი მოლაპარაკებების შემდეგ მიიღეს, – იუწყება BBC.

მოლაპარაკებების შედეგად გაკეთდა განცხადება, რომელშიც ნათქვამია, რომ სერგეი სკრიპალისა და მისი ქალიშვილის მოწამვლის საქმესთან დაკავშირებით ევროკავშირი დიდ ბრიტანეთს მხარს უჭერს და მიაჩნია, რომ ამას არავითარი სხვა ახსნა არ აქვს, გარდა ამ საქმეში რუსეთის მონაწილეობისა. ამასთან დაკავშირებით ევროკავშირი მოსკოვში საკუთარ ელჩს კონსულტაციებისთვის ერთი თვით გაიწვევს.

JAMnews სკრიპალის საქმის შესახებ წერდა:

ევროკავშირის სამიტს ბრიტანეთის პრემიერ-მინისტრი ტერეზა მეიც ესწრებოდა. სწორედ მან მოუწოდა სამიტის მონაწილეებს რუსეთის მისამართით უფრო მკაცრი რიტორიკისკენ. მეიმ იმას მიაღწია, რომ ყოფილი საბჭოთა მზვერავისა და მისი ქალიშვილის მოწამვლის საკითხთან დაკავშირებით საბოლოო ტექსტი ბევრად მკვეთრი იყო, ვიდრე თავდაპირველი ვერსია.

მეიმ ასევე მოუწოდა ქვეყნების ლიდერებს, რომ მოსკოვიდან საკუთარი დიპლომატები გაიწვიონ. საფრანგეთის პრეზიდენტს ემანუელ მაკრონსა და გერმანიის კანცლერს ანგელა მერკელს, რომლებიც მეის ცალკე შეხვდნენ და მხრი დაუჭირეს, რუსეთიდან თავიანთი დიპლომატების გაწვევის თაობაზე ჯერჯერობით საბოლოო გადაწყვეტილება არ მიუღიათ, თუმცა, ასეთ შესაძლებლობას განიხილავენ.

დიდი ბრიტანეთიდან უკვე გააძევეს 23 რუსი დიპლომატი. კრემლი და რუსეთის საგარეო საქმეთა სამინისტრო ინგლისის ქალაქ სოლსბერიში მომხდართან კავშირს უარყოფენ.