Bakıda siyasi məhbuslara dəstək məqsədilə mitinq keçirilib - fotoreportaj
Bakıda Demokratik Qüvvələrin Milli Şurasının təşkil etdiyi mitinq baş tutub. Mitinq iştirakçıları cəzası sona çatmaqdaykən yeni ittihamla üzləşdiyi üçün aclıq elan edən bloger Mehman Hüseynovun və digər siyasi məhbusların azad edilməsini tələb ediblər.
Bu mitinq dekabrın sonunda Hüseynov aclıq elan edəndən sonra müxalifətin və vətəndaş cəmiyyəti fəallarının başlatdığı etiraz aksiyaları zəncirinin bir həlqəsidir. Bütün bu zaman ərzində penitensiar xidmətdən bildirilib ki, bloger aclıq etmir, bir neçə yüksək vəzifəli məmur isə bloger və etiraz edən insanlar haqda alçaldıcı fikirlər səsləndirib.
Yanvarın 17-də Avropa Parlamenti Azərbaycan hakimiyyətinə qarşı “Mehman Hüseynovun dərhal azad edilməsi və yeni ittihamların onun üzərindən götürülməsi” tələbi ilə qətnamə qəbul edib.
Polis stadiona girişi mitinqin başlanmasından 15 dəqiqə sonra bağlayıb, stadionun ərazisində isə mobil internet söndürülüb ki, heç kim sosial şəbəkələrdə canlı efirə qoşula bilməsin.
Rəsmi məlumatlara görə, mitinqdə 2800 nəfər iştirak edib. Müxalifətin bildirdiyinə əsasən, mitinq iştirakçılarının sayı 20 min nəfər olub. JAMnews-un müxbirlərinin qiymətləndirməsinə görə, mitinqə təxminən 7 min nəfər toplaşıb. Polis girişdə bəzi mitinq iştirakçılarının əlindən onların gətirdiyi siyasi məhbusların portretlərini alıb.
Tribunada müxalif Müsavat, Respublikaçı Alternativ və Azərbaycan Xalq Cəbhəsi partiyalarının nümayəndələri, həmçinin siyasi fəallar olublar. Öz çıxışlarında onlar ölkə hakimiyyətini tənqid edərək, korrupsiyadan, pis iqtisadi vəziyyətdən və insan haqlarının pozulmasından danışıblar. Bundan əlavə, Dağlıq Qarabağ mövzusunda Azərbaycan hökumətinin sülhsevər mövqeyi onları hiddətləndirən səbəblərdən olub.
Xalq Cəbhəsi Partiyasının sədri Əli Kərimli toplaşanları bir həftədən sonra – yanvarın 26-da növbəti mitinqə gəlməyə çağırıb.
Mehman Hüseynov kimdir?
26 yaşlı Mehman Hüseynov populyar video blogerdir. Öz video-süjetlərində o, hakimiyyəti və korrupsiyaya bulaşmış məmurları tənqid edir.
Hüseynov 2017-ci ilin martında Bakının rayon polis idarələrindən birinin rəisinin böhtan iddiası ilə iki il müddətinə azadlıqdan məhrum edilib. O, bildirib ki, polis idarəsində işgəncəyə məruz qalıb və məhkəmə bunu böhtan kimi dəyərləndirib.
Amnesty International beynəlxalq hüquq müdafiə təşkilatı Hüseynovu “vicdan məhbusu” elan edib.
Mehman Hüseynovun cəza müddəti bu ilin martında bitir, amma dekabrın sonunda ona qarşı mühafizəçini döyməsi ilə bağlı yeni ittiham irəli sürülüb. Bu ittihamla o, daha bir neçə ilini həbsdə keçirə bilər.
Mehman Hüseynov ətrafında hadisələrin xronologiyası
- 26 dekabr – Mehman Hüseynov yeni ittihamların üzərindən götürülməsi tələbi ilə aclıq elan edib;
- 3 və 6 yanvar – Mehman Hüseynova dəstək məqsədilə iki razılaşdırılmamış mitinq keçirilib, aksiya iştirakçılarının çoxu iyirmi sutka inzibati həbs və ya cərimə ilə cəzalandırılıb;
- 5 yanvar – Mehmanla həmrəylik əlaməti olaraq Müsavat Partiyasının ofisində müxtəlif müxalif partiyaların təmsilçiləri aclıq aksiyasına başlayıb;
- 7 yanvar – Mehmanın vəkili bildirib ki, müvəkkili aclığı davam etdirir, amma süd içməyə başlayıb;
- 7 yanvar – parlament deputatı Siyavuş Novruzov mətbuata bildirib ki, Mehman Hüseynov cinayət törədib və cəzalandırılmalıdır;
- 10 yanvar – mətbuatda Mehmanın əllə yazılmış məktubunun fotosu dərc olunub, məktubda deyilir ki, öz ətrafında ajiotaj yaratmaq istəməyib, aclığı dayandırıb, səhhəti də normaldır;
- 11 yanvar – Mehmanı istintaq təcridxanasında Aİ-nin Azərbaycandakı nümayəndəsi və müxtəlif Avropa ölkələri səfirliklərinin təmsilçiləri ziyarət edib;
- 14 yanvar – beş siyasi məhbus “həmrəylik aclığı” elan edib;
- 15 yanvar – tanınmış jurnalist Xədicə İsmayılova aclıq aksiyasına qoşulub;
- 16 yanvar – bəzi müxalifətçilər aclıq aksiyasını dayandırıb, onların yerini digərləri tutub;
- 17 yanvar – blogerin qardaşı, İsveçrədə yaşayan hüquq müdafiəçisi Emin Hüseynov Avropa Parlamenti üzvlərinə açıq məktub göndərərək, onları Mehman və digər siyasi məhbusların xilasına səs verməyə çağırıb;
- Yanvarın 17-də axşam saatlarında Avropa Parlamenti Azərbaycan hakimiyyətinə qarşı “Mehman Hüseynovun dərhal azad edilməsi və yeni ittihamların üzərindən götürülməsi” tələbi ilə qətnamə qəbul edib.
