Yerevanda tələbələr hərbi xidmətdən möhlət hüququnun məhdudlaşdırılmasına etiraz edir

Yerevanda tələbələrin bir qismi bu gün aksiya keçirərək təhsil aldıqları ali məktəblərin auditoriyalarına girməyiblər. Gənclər hərbi xidmətdən möhlət hüququnun məhdudlaşdırılması ilə bağlı etiraz aksiyası təşkil ediblər.

Ermənistan Parlamenti tələbələrin narazılığına səbəb olan “Hərbi xidmət və hərbçi statusu haqda” qanun layihəsini artıq müzakirə edib və birinci oxunuşda təsdiqləyib. Qanun layihəsinin ikinci oxunuşu gələn həftə baş tutacaq.

Tələbələr tələb edirlər ki, qüvvədə olan qanun dəyişiklik edilmədən qalsın və onlardan 18 yaşı tamam olanlar və ödənişsiz əsasda təhsil alanlar (yəni yüksək göstəricilərə sahib olanlar) yalnız təhsilini başa vurandan sonra hərbi xidmətə çağırılırdı. Hökumətin təklif etdiyi yeni qanun layihəsinə əsasən möhlət hüququndan yalnız Müdafiə Nazirliyi ilə təhsili bitirəndən sora xidmətə gedəcəyi haqda müqavilə imzalayanlar yararlana biləcəklər.

Layihə tərəfdarları qeyd edirlər ki, bəzi gənclər ali məktəbdə təhsil almağı ordudan yayınmaq vasitəsi kimi istifadə edirlər. Etiraz aksiyasında iştirak edən tələbələr isə bildirirlər ki, bu qanun layihəsi orduda xidmət etmək istəməyənlər üçün maneə olmayacaq.

“Onlar deyirlər ki, bu qanun sosial ədaləti təmin edəcək, amma biz bunun aydın əsaslandırılmasını görə bilmirik. Səhiyyə sistemində mövcud olan dəlmə-deşik yenə də qalacaq, statistika isə göstərir ki, gənclərin çoxu məhz səhiyyə sistemindən yararlanaraq ordudan yayınır. Bu layihə nəinki fasiləsiz təhsilə, eyni zamanda elmə ziyan vuracaq. Təhsil cəlbediciliyini itirəcək”, – gənc fəal Vahan Kostanyan deyir.

“Təhsil sistemini təmsil edən biri kimi etiraf edirəm ki, bəli, bəzən təhsili ordudan yayınma vasitəsi kimi istifadə edirlər. Təhsil sistemimizdə korrupsiya mövcuddur, korrupsiya riski var, amma biz həmçinin hesab edirik ki, özünü elmə həsr etmək və elmi fəaliyyətlə məşğul olmaq istəyənləri bu imkandan məhrum etməməliyik”, – digər aksiya iştirakçısı bildirir.

“Tədris tətilində” iştirak edənlər Yerevanın demək olar ki, bütün ali məktəblərini gəzib, tələbələri onlara qoşulmağa çağırıblar, amma bəzi təhsil müəssisələrinin qapıları bağlı olub: tələbələrə binadan çıxıb aksiyaçılara qoşulmağa icazə verməyiblər. Nümayişə qoşulmaq istəyənlər pəncərələri açıb, aksiya iştirakçıları ilə birlikdə şüar səsləndiriblər: “Möhlət olacaq”, “Müəllimlər, qoşulun”.

Tələbələrin onlara qoşulmaq çağırışına çox az müəllim müsbət cavab verib.

“Bu qanun layihəsi təhsilə ziyan vurmur. Ermənistan gəncləri orduda xidmət etməmək üçün nümayiş keçirir. Bu biabırçılıqdır, bu, erməni gənclərinə başucalığı gətirmir. Bu ədalətin pozulmasıdır, biri xidmət etməlidir, biri isə yox”, – Yerevan Dövlət Universitetinin Coğrafiya və Geologiya Fakültəsinin dekanı Marat Qriqoryan deyib.

Tələbələr isə bildirirlər ki, onların etirazı orduda xidmətə qarşı deyil. Onların tələbləri hərbi xidmətin tədrisə mane olmaması, təhsil almağa mane olmamasından ibarətdir.

“Qeyd etmək lazımdır ki, mövcud problemlər haqda tələbələr danışır, müəllimlərin çoxu, yetkin insanlar isə dəstəkləmək, ya da heç olmasa neytral mövqe tutmaq əvəzinə daha da təxribata gedirlər. Biz artıq təzyiqlərin şahidi olmuşuq. Sistem stabil olmadığı üçün təhdid cəhdləri də ola bilər”, – aksiya və “Elmin inkişafı naminə” təşəbbüsünün iştirakçılarında biri deyir.

Tələbələr bəyan ediblər ki, tətil müddətsiz olacaq. Onlar müdafiə və təhsil nazirləri ilə görüş-diskussiya tələb edirlər.

Daha əvvəl JAMnews tələbələrin narazılıqları və ilk etiraz aksiyası haqda məlumat vermişdi.

https://jam-news.net/?p=65675&lang=az-AZ