Turistlərin üçdə biri Azərbaycana rəsmən qapalı olan quru sərhədləri vasitəsilə gəlib
Azərbaycanın quru sərhədlərinə dair statistika
Azərbaycanın quru sərhədləri üç ildən çoxdur ki, bağlıdır. Buna baxmayaraq, ölkənin Dövlət Sərhəd Xidməti Azərbaycana gələn əcnəbilərin üçdə birindən çoxunun dəmir yolu və avtomobil yolu ilə gəldiyinə dair statistik məlumatları açıqlayıb. İqtisadçı ekspert Natiq Cəfərli rəqəmləri “absurd” adlandırıb. “Bu, ayıbdır, quru sərhədləri açılmalıdır, bu qadağanın rəsmi elan edilmiş səbəblə heç bir əlaqəsi yoxdur”, – ekspert bildirib.
- Azərbaycan-Ermənistan sərhədində nə baş verib? Bakıdan şərh
- Qaranlığı udan işıq – Foto-hekayə
- “Qulağı, zövqü şikəst nəsil yetişdiriblər”. Cavanşir Quliyev “arzuolunmaz” mahnılar siyahısı haqda – VİDEO
2020-ci ilin mart ayında Azərbaycanın quru sərhədləri o vaxtlar tüğyan edən koronavirus pandemiyası səbəbindən bağlanıb. Pandemiya faktiki olaraq başa çatıb, Azərbaycanın bütün qonşu ölkələri çoxdan sərhədlərini açıb, lakin Azərbaycan hakimiyyətinin elan etdiyi xüsusi karantin rejimi davam edir.
Rəsmi olaraq sonuncu dəfə karantin rejimi 2023-cü il mayın 1-dək uzadılıb. Adətən, xüsusi rejimin növbəti dəfə uzadılması ilə bağlı qərar əvvəlki müddətin bitməsinə bir neçə gün qalmış elan edilir. Bu dəfə uzadılıb-uzadılmayacağı hələ məlum deyil.
Naxçıvan Muxtar Respublikasının Azərbaycanın əsas hissəsindən təcrid olunduğunu nəzərə alaraq, ölkə hökumətinin qərarı ilə muxtariyyətin ərazisində yaşamaq icazəsi olan vətəndaşların Türkiyə ilə quru sərhədindən keçməsinə icazə verilir.
Statistika nə deyir?
2023-cü ilin ilk iki ayında Azərbaycana dünyanın 148 ölkəsindən 232,5 min əcnəbi gəlib. Bu, ötən ilin eyni göstəricisindən bir yarım dəfə çoxdur. Bu barədə ölkənin dövlət sərhəd xidmətinin statistik məlumatında deyilir.
Gələnlərin böyük hissəsi (32,4 faiz) Rusiyadan, 21 faizi Türkiyədən, 9,2 faizi İrandan, 5,7 faizi Gürcüstandan, 3,8 faizi Hindistandandır.
Gələnlərin sayına görə növbəti yerləri Birləşmiş Ərəb Əmirlikləri, Pakistan, Küveyt, Səudiyyə Ərəbistanı tutur.
Məlumatda bildirilir ki, Azərbaycana gələnlərin 35,1 faizi dəmir yolu və avtomobil, 63,4 faizi hava, 1,5 faizi isə dəniz nəqliyyatından istifadə edib.
Ötən ilin ilk iki ayı ilə müqayisədə xarici ölkələrə gedən Azərbaycan vətəndaşlarının sayı da artıb – 18,3 faiz (218 min nəfər). Ölkə vətəndaşları daha çox Türkiyəyə (39,7 faiz), Rusiyaya (22,8 faiz), Gürcüstana (9,9 faiz), İrana (8,4 faiz) səfər edib.
Diqqət çəkən məqamlardan biri – İrana gedənlərin sayı isə 15,5 faiz azalıb.
Ölkədən gedənlər ən çox hava nəqliyyatından (67,8 faiz) istifadə edib. Dəmir yolu və avtomobillə gedənlər 29,7 faiz, dəniz nəqliyyatı ilə gedənlər isə 2,5 faiz təşkil edib.
Statistik göstəricilərdə həmçinin əcnəbilərin ölkəyə qatarla gəldiyi də qeyd olunur, halbuki Naxçıvandakı yeganə açıq sərhəd-keçid məntəqəsində dəmir yolu əlaqəsi yoxdur.
Şərh
İqtisadçı ekspert, Respublikaçı Alternativ Partiyasının liderlərindən biri Natiq Cəfərlinin sözlərinə görə, Azərbaycana gəlib-gedənlərin üçdə birindən çoxunun dəmir yolu və avtomobil yolundan istifadə etmiş olması ilə bağlı rəsmi statistika absurddur:
“Rəsmi qurumlar deyir ki, Azərbaycanın quru sərhədləri ilə ölkəyə gəlib, ölkədən gedənlər idxal (ixrac) yüklərini daşıyan avtomobillərin sürücüləri və yükləri müşayiət edən şəxslərdir. Bu izah inandırıcı deyil.
Bizim vətəndaşların çoxu, çox güman, Naxçıvan sakinləridir, onlara sərhəd açıqdır. Xaricdən gələnlərin bəzilərinə isə, çox güman, özəl şərait yaradılır. Yəqin ki, şəhərdə Rusiya nömrəli bahalı maşınlar görmüsüz”.
İqtisadçı Facebook səhifəsində bildirib ki, quru sərhədləri qanunsuz, məntiqsiz olaraq bağlı saxlamaq Konstitusiyanı pozur:
“Əvvəla, ölkə vətəndaşlarına bərabər münasibət pozulub, Naxçıvan qeydiyyatı ilə, məsələn, Kürdəmir qeydiyyatı olan vətəndaşlar arasında nədən fərq qoyulmalıdır ki?!
İkincisi, bu mənasız qadağa bəziləri üçün, deyəsən, qazanc yerinə çevrilib, kimlərisə ölkəyə/ölkədən müəyyən maraqlar müqabilində buraxırlar. Bu biabırçılıqdır. Quru sərhədlər mütləq açılmalıdır, bu qadağanın rəsmi səbəb olan “pandemiya” ilə heç bir əlaqəsi yoxdur, digər məsələlər isə, sadəcə bəhanədir”.
