Azərbaycana səyahət ömrünüz boyu unutmayacağınız və “mən bura əvvəllər niyə gəlməmişdim?” deyəcəyiniz xatirələrlə zəngin olacaq. Təkcə onu demək kifayətdir ki, dünyada mövcud olan 11 iqlim qurşağının 9-na Azərbaycanda rast gəlinir.
Siz burada dəniz kənarında dincələ, qədim və müasir üslubu özündə unikal şəkildə birləşdirmiş Bakıda gəzişə, Azərbaycanın qeyri-adi dadı ilə seçilən mətbəxi ilə tanış ola, ölkənin regionlarındakı dağları, meşələri, Avropanın ən yüksəkdə yerləşən yaşayış məntəqəsi sayılan Xınalığı görə, hələ də Qırmızı kitaba düşmüş vəhşi heyvanların yaşadığı Talış dağlarının meşələrini gəzə, saysız-hesabsız digər məşhur və o qədər də tanınmayan yerlərdə ola bilərsiniz.
