Azərbaycanda məktəblər açılır, amma hamı üçün yox
2021-ci il fevralın 1-dən Azərbaycan məktəblərində əyani təhsil bərpa olunur. Hələlik bu, ancaq ibtidai sinif şagirdlərinə aiddir. Yuxarı sinif şagirdləri və ali məktəb tələbələri nə etməlidir? Tələbələr təhsil haqqının azaldılmasına ümid edə bilərmi? Ölkənin təhsil naziri bu suallara cavab verib.
Azərbaycanın təhsil naziri Emin Əmrullayev brifinqdə bildirib ki, dörd aylıq lokdaundan sonra ölkədə ənənəvi təhsil prosesi bərpa olunur.
11 aylıq lokdaun
İbtidai sinif şagirdləri həftədə üç dəfə məktəbə gələcəklər. Həftənin qalan günlərində təhsil prosesi onlayn rejimdə davam edəcək.
Dərs ilinin əvvəlində, 2020-ci il sentyabrın 15-də eyni prinsip tətbiq edilmişdi. Amma bir ay sonra ölkədə koronavirusa yoluxma hallarının artması səbəbilə yenidən onlayn tədrisə keçmək qərarı alındı.
Yuxarı sinif şagirdlərinə və tələbələrə dərslərə getməyə icazə verilməyib. Onlar üçün 2020-ci ilin martından lokdaun davam edir.
Lokdaun qayıda bilər
Əyani tədrisə keçilməsi prosesi mərhələli şəkildə həyata keçiriləcək. Nazirin sözlərinə görə, ənənəvi tədris prosesinin hamı üçün qəfil bərpa olunması COVID-19 virusuna yoluxma hallarının artması riskini daşıyır.
“Bu halda biz lokdauna qayıtmağa məcbur olacağıq”, – Əmrullayev əlavə edib.
Ali məktəb tələbələri nə edəcək?
Fevralın ilk iki ayı ərzində yuxarı sinifərdə və ali məktəblərdə tədris prosesi ilə bağlı qərar qəbul ediləcək.
“Bakıda hələ də metro işləmir. Yuxarı sinif şagirdlərinin və tələbələrin çoxu, o cümlədən də müəllimlər məhz bu ictimai nəqliyyat nöündən istifadə edir”, – nazir qərarın ertələnməsini belə arqumentləşdirib.
Müəllimlərin vaksinasiyası haqda
Təhsil Nazirliyibirinci növbədə vaksinasiyadan keçəcək müəllimlərin siyahısını da hazırlayıb.
Bakıda 16.698 müəllim, ölkənin regionlarında isə 32.600 müəllimə peyvənd vurulacaq.
Təhsil haqqının baha olması haqda
Nazir ali məktəblərdə təhsil haqqının baha olması məsələsinə də toxunub. Bu məsələ zaman-zaman sosial şəbəkələrdə müzakirə mövzusuna çevrilir. İnsanlar karantinə görə təhsil haqqının azaldılmasını tələb edirlər. Onların arqumentləri sadədir: tədris onlayn rejimdə aparılır, universitetlərin xərcləri də, tələbələrin valideynlərinin gəlirləri də azalıb.
Emin Əmrullayevin sözlərinə görə, hazırda Azərbaycan universitetlərində illik təhsil haqqının orta həcmi 2500 manata [1470 ABŞ dolları] bərabərdir. “Hətta regionumuzun digər ölkələrinin universitetləri ilə müqayisədə də bu, o qədər də böyük məbləğ deyil”, – nazir vurğulayıb.
Qeyd edək ki, ölkədə aylıq minimum əmək haqqı 250 manat [147 ABŞ dolları] təşkil edir.
