Sülhməramlılar Qarabağda postların sayını artırıblar: bu nə deməkdir? Bakıdan şərhlər
Azərbaycan silahlı qüvvələri Qarabağın RF sülhməramlı kontingentinin müvəqqəti yerləşdiyi hissəsində Fərrux kəndi və Daşbaşı yüksəkliyini nəzarət altına alandan sonra regionda vəziyyət gərginləşib. Rusiya Müdafiə Nazirliyinin məlumatına görə, son günlərdə Qarabağda RF sülhməramlı kontingentinin postlarının sayı artırılıb. Bu nə deməkdir? Bakılı ekspertlər şərh edirlər.
- Ermənistanın baş naziri: “DQ statusu məqsəd deyil, ermənilərin təhlükəsizliyini təmin etmək vasitəsidir”
- İlham Əliyev: “Minsk Qrupu 28 il fəaliyyət göstərib. Nəticə göz qabağındadır – sıfır”
- Polis Bakıda Rusiya səfirliyi qarşısında etiraz aksiyasını dağıdıb
2022-ci il martın 24-də Azərbaycanın silahlı qüvvələri Qarabağın Rusiya sülhməramlı kontingentinin müvəqqəti yerləşdiyi hissəsində Fərrux kəndi və Daşbaşı yüksəkliyini nəzarət altına alıb. Azərbaycanın Müdafiə Nazirliyi bunu “mövqelərin dəqiqləşdirilməsi” adlandırıb. Ermənistan tərəfinin fikrincə, Azərbaycan tanınmamış Dağlıq Qarabağ Respublikasının bir hissəsini “işğal edib”. Rusiya tərəfi Azərbaycan ordusunun addımını dəyərləndirməyib, sadəcə “atəşkəs rejiminin pozulması” haqda bildirib.
Sülhməramlılar Qarabağda postların sayını artırıb
Aprelin əvvəlində sülhməramlılar Qarabağda nəzarət etdikləri ərazidə yerdəyişmə edib. Rusiya Müdafiə Nazirliyinin məlumatına əsasən, sülhməramlı kontingentin altı yeni postu yaradılıb və onların sayı 33-ə yüksəlib. Kontingent Qarabağa yeni yerləşdirildiyi zaman 27 post vardı.
RF Müdafiə Nazirliyinin rəsmi saytında yerləşdirilmiş xəritəyə görə yeni postlar qeyd olunmuş nöqtələrdə qurulub:
Post 28. Qubadlı-Laçın yolunda Turşsu bulağı yaxınlığında Ağanus kəndində. Bu kəndin şimal hissəsində Ağdaş strateji yüksəkliyi (1782 metr) yerləşir.
Post 29. Turşsu kəndi yaxınlığında Keçəldağ (2214 metr) və Kiçik Kirs (2346 metr) yüksəklikləri istiqamətində.
Post 30. Tərtər rayonu Çardağlı və Lüləsaz kəndləri istiqamətində.
Post 31. Göyarx kəndi yaxınlığında.
Post 32. Xocavənd rayonunun Qırmızı Bazar qəsəbəsi yaxınlığında.
Post 33. Xocalı rayonunun Fərrux kəndinə birləşən Pirlər kəndi ərazisində.
Bu nə deməkdir? Şərhlər
Hərbi ekspert Ədalət Verdiyevin sözlərinə görə, postların sayının artması 2020-ci il 10 noyabr üçtərəfli bəyanatına ziddir:
“Sənəddə sülhməramlıların harada yerləşəcəyi, hansı texnikadan, texniki vasitələrdən istifadə edəcəyi müəyyənləşdirilib.
Azərbaycan qoşunlarının öz ərazilərində manevrlər həyata keçirdikdən sonra Fərrux dağında yerləşməsindən narahat olan Rusiya sülhməramlılarının 6 yeni post qurması Azərbaycana hörmətsizlikdir.
Müdafiə Nazirliyi gərəkən addımları atmalı, həmin postların ərazidən yığışdırılmasına nail olmalıdır. Sülhəramlıların istənilən fəaliyyəti Azərbaycanla razılaşdırılmalıdır. Əgər yeni postlar razılıq olmadan qurulubsa, bu, Rusiya hərbçilərinin birmənalı olaraq öz səlahiyyətlərini aşması deməkdir”.
Təhlükəsizlik məsələləri üzrə ekspert İlham İsmayıl fərqli düşünür. O qeyd edir ki, sülhməramlıların müşahidə məntəqələrinin artmasını konkret səbəblərlə izah etmək olar:
“Bildiyiniz kimi, Azərbaycan Ordusunun xəbərdarlıqlarına baxmayaraq, Fərrux dağının bəzi yüksəkliklərində erməni silahlı qüvvələri səngər və istehkam qurduqlarına görə hərbçilərimizin adekvat tədbirləri nəticəsində Daşbaşı və bir neçə yüksəkliyə nəzarət bizim əsgərlərin əlinə keçdi.
Rusiya Müdafiə Nazirliyi əvvəlcə bu tədbiri 10 noyabr bəyanatının tərəfimizdən pozulması kimi təqdim etdi, sonra isə guya ermənilərin hay-küyünü sakitləşdirmək məqsədilə bizim həmin yüksəkliklərdən geri çəkilməyimiz haqqında bəyanat yaydı. Azərbaycan Müdafiə Nazirliyinin bunu təkzib edən bəyanatla çıxış etməsi Rusiya siyasi dairələrində qəzəblə qarşılandı, hətta atom bombası ilə hədələndik.
Aprelin 6-da isə Brüssel görüşündə Avropa İttifaqının iki ölkə arasında sülh yaranmasına göstərdiyi təşəbbüslər, sərhədlərin müəyyənləşməsi üçün ikitərəfli komissiyanın yaranmasına konkret zaman göstərilməsi və sülh müqaviləsinin hazırlanması məqsədilə hər iki ölkənin Xarici İşlər nazirliklərinə təlimatların verilməsi də Rusiyanı qıcıqlandıran başlıca amillərdən biri oldu”.
İlham İsmayıl vurğulayır ki, Sergey Lavrovun ermənistanlı həmkarı Ararat Mirzoyanla görüşün yekununda keçirilən mətbuat konfransında səsləndirdiyi Brüsselə ünvanlı qəzəbli mesajlar eyni zamanda Bakıya ünvanlanıb:
“Ukrayna müharibəsinin getdiyi bir vaxtda Avropa İttifaqının təşəbbüsünü, sülh danışıqlarının onun çətiri altında aparılmasını Rusiyanın qəbul etmədiyi ortadadır və nəticədə təzyiq vasitələrini işə salıb.
Qarabağda müşahidə məntəqələrinin sayının artırılması isə sülh missiyasından çox qeyd olunan təzyiqin tərkib hissəsi kimi dəyərləndirilməlidir.
Qarşıdakı günlərdə Qarabağda və dövlət sərhəddində bu təzyiqlər təxribat, atəşkəsin pozulması ilə müşayiət olunsa, təəccüb yaratmayacaq. Azərbaycan bu təxribatlara və təzyiqlərə hazır olmalıdır”.
