Rusiyanın Suriyada həyata keçirdiyi hava zərbəsi nəticəsində Türkiyənin üç hərbçisi həlak olub

Suriyada “İslam dövləti” silahlılarına qarşı aparılan əməliyyatlar gedişatında Rusiya hərbi hava qüvvələrinin endirdiyi zərbə nəticəsində Türkiyənin üç hərbçisi həlak olub, 11 nəfər yaralanıb. Moskva artıq rəsmi Ankaraya başsağlığı bildirib.

Faktın araşdırılması ilə Rusiya və Türkiyə birgə məşğul olur – Reuters Türkiyə Müdafiə Nazirliyinə istinadən xəbər verir.

Rusiya rəsmiləri baş vermiş hadisə ilə bağlı Türkiyəyə başsağlığı verib, Rusiya prezidenti Vladimir Putin Türkiyə prezidenti Rəcəb Tayib Ərdoğanla telefonla danışıb. “Vladimir Putin Əl-Bab şəhəri ətrafında bir neçə Türkiyə hərbçisinin ölümünə səbəb olmuş faciəvi insidentlə bağlı başsağlığı diləyib”, – Kremlin saytında yerləşdirilmiş məlumatda bildirilir.

Rusiya və Türkiyə yanvar ayında Qazaxıstanın paytaxtında Suriya prezidenti Bəşər Əsədin qüvvələri ilə döyüşən müxalifət təmsilçiləri və Dəməşqin nümayəndə heyəti arasında baş tutmuş sülh danışıqlarının təşkilatında vasitəçi olublar.

Bununla belə Rusiya və Türkiyə Əsədin taleyi kimi fundamental məsələlərdə (Suriyada sülh prosesinin bir hissəsi olaraq Əsədin hakimiyyətdə qalması və ya onun istefası) yenə də fikir ayrılığı yaşayırlar.