İkinci Qarabağ müharibəsinin hərbdən sonrakı qurbanları

JAMnews

Bakı

2020-ci il noyabrın 10-da Qarabağda hərbi əməliyyatlar dayandırılsa da, indiyə qədər hər iki münaqişə tərəfi qurban verir. Bunlar Dağlıq Qarabağın və ətraf rayonların bütün ərazisində quraşdırılmış minalara düşənlərdir.

İstehkamçı minaya düşüb

2020-ci il noyabrın 14-də axşam saatlarında bundan bir ay öncə Azərbaycan ordusu tərəfindən azad edilən Füzuli rayonunda 41 yaşlı Asif Xudiyev minaya düşüb.

Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) əməkdaşı bədbəxt hadisə nəticəsində ayağını itirib.

Partlayıcı qurğunu tapdalayan qardaşlardan biri həlak olub

Elə həmin gün, noyabrın 14-də Füzuli rayonundan məcburi köçkün olan iki qardaş 26 ildən sonra doğma yerləri görməyə gəldikləri zaman minaya düşüblər.

Azərbaycanın Baş Prokurorluğunun mətbuat xidmətindən bildirilib ki, hadisə nəticəsində 36 yaşlı Yasin Əhmədov həlak olub. 1989-cu il təvəllüdlü qardaşı Asif Əhmədov isə ağır yaralanıb.

Azərbaycan ordusu polkovnikini itirib

2020-ci il noyabrın 23-də Tərtər rayonu ərazisində həlak olanların meyitlərinin axtarışı zamanı Azərbaycan ordusunun polkovniki Babək Səmidli mina partlaması nəticəsində həlak olub.

Zabitlə birlikdə hadisə yerində Rusiyanın sülhməramlı missiyasının zabiti və “Dağlıq Qarabağ FHN-in” dörd əməkdaşı da olub. Onlar müxtəlif dərəcəli xəsarətlər alıblar.

Rusiya hərbçisi müalicə üçün Bakıdakı hospitalların birinə gətirilib.

Bütöv bir ailə yox olub

Noyabrın 28-də Füzuli rayonu ərazisində Toyota Land Cruizer markalı avtomobil yolda quraşdırılmış minaya düşüb. Bir ailənin dörd üzvü həlak olub.

Üç kişi və qadın 1994-cü ildə tərk etməli olduqları doğma yerləri görməyə gəliblər.

Şakir Hacıyev, Firudin Hacıyev, Zülfüqar Hacıyev və Zibeydə Adilzadə ikinci Qarabağ müharibəsinin hərbdən sonrakı növbəti qurbanları olub.

Həlak olan Zibeydə Adilzadə (Hacıyeva) Füzuli rayon İcra Hakimiyyətinin nəşr orqanı olan “Qayıdış” qəzetinin baş redaktoru idi.

Ermənistan ordusunda iki nəfər həlak olub

2020-ci il dekabrın 1-də iki erməni hərbçi Qarabağdakı hərbi hissələrin birində xidməti vəzifəsini icra etdiyi zaman həlak olub.

Sursatlar daşınan zaman baş vermiş partlayış nəticəsində Jirayr Vaçikoviç Matevosyan və Geqam Merujanoviç Hovannisyan (hər ikisi 2001-ci il təvəllüdlü) həlak olub.

Hakimiyyət xəbərdarlıq edib

Baş verən hadisələrdən sonra Azərbaycanın Baş Prokurorluğu və Daxili İşlər Nazirliyi birgə bəyanatla çıxış edib.

Sənəddə güc strukturları ölkə sakinlərini xüsusi icazə olmadan azad edilmiş ərazilərə səfərlərdən çəkinməyə çağırıblar.

İstehkamçılar ərazilərdə minaların zərərsizləşdirilməsi müddətini açıqlayıblar

Azad edilmiş ərazilərdə yaşayış məntəqələrinin minalardan təmizlənməsi yaxın üç-beş il ərzində baş verəcək – ANAMA Operativ Qərargahının rəisi İdris İsmayılov bildirib.

Bütün Qarabağ ərazisində minaların zərərsizləşdirilməsi isə 10-13 il ərzində mümkün olacaq.

İstehkamçılar azad edilmiş ərazilərdə işləməyə başlayandan bəri 750 partlamamış sursat, 4500 piyada əleyhinə və 2000-ə yaxın tank əleyhinə minanı zərərsizləşdiriblər.

İsmayılovun sözlərinə görə, azad edilmiş ərazilərdə yaşayış məntəqələrinin ilk sakinləri minimum üç ildən sonra bura köçə biləcək.