Qafqazda Koronavirus. 20-23 mart, 2020

Azərbaycanda daha 7 koronavirusa yoluxma halı qeydə alınıb.

Beləliklə, yoluxanların ümumi sayı 72 nəfərə çatıb.

Bir nəfər ölüb, on nəfər sağalıb.

Ermənistana daha 25 ölkədən gəliş qadağan edilib. İndi bu ölkələrin sayı 41 olub. Qərar koronavirusun yayılmasının qarşısının alınması məqsədilə qəbul edilib.

Ermənistanda martın 16-dan fövqəladə vəziyyət elan olunub. Ümumilikdə 194 nəfərin virusa yoluxduğu təsdiqlənib, onlardan ikisi sağalıb və xəstəxanadan evə buraxılıb.

Martın 24-ə keçən gecə koordinasiya şurasının qərarı ilə Gürcüstanda ictimai nəqliyyatın hərəkəti dayandırılacaq. Şəhərlərarası sərnişin daşıyan vasitələr – avtobuslar və mikroavtobuslar da qadağan edilir. Dəmiryolu nəqliyyatına da məhdudiyyət tətbiq edilir. Şəxsi nəqliyyat vasitələrinin hərəkətinə hələlik icazə verilir.

Gürcüstanda koronavirusa yoluxanlardan 8 nəfər sağalıb, onlardan 5 nəfər artıq evə buraxılıb.

Gürcüstanın Kvemo Kartli regionunda iki şəhər – Marneuli və Bolnisi martın 23-dən karantin zonası elan edilib. Oraya gedən bütün yollar dünən axşamdan polis tərəfindən bağlanıb.

Ekstremal tədbirlərə 62 yaşlı yerli sakinin koronavirusa yoluxması səbəb olub. Daha sonra onlarla insanın iştirak etdiyi ayin mərasimində də yoluxmanın baş verdiyi ehtimal edilir.

• “Bacısı Azərbaycanda olub və bunu gizlədib” – Gürcüstanda iki şəhər niyə təcrid edilib

Prezident İlham Əiyev koronavirus pandemiyasının Azərbaycan iqtisadiyyatına mənfi təsirini yumşaltmaq məqsədilə 1 milyard manat [600 milyon dollara yaxın] ayırıb. Yerli iqtisadçılar bu tədbiri qeyri-səmərəli hesab edir.

Onların fikrincə, biznesi vergidən azad etmək və kreditlərin ödənişini yüngülləşdirmək daha doğru olardı.

• 600 milyon dollar nəyə xərclənəcək? 

Ermənistanda daha 4 koronavirusa yoluxma halı qeydə alınıb. Ümumilikdə yoluxanların sayı 194 nəfərə çatıb

Azərbaycanda daha 12 koronavirusa yoluxma halı qeydə alınıb.

Beləliklə, yoluxanların ümumi sayı 65 nəfərə çatıb.

Gürcüstanda beş yeni koronavirusa yoluxma halı qeydə alınıb. Beləliklə 54 yoluxma halı artıq təsdiqlənib, onlardan üçü sağalıb və xəstəxanadan evə buraxılıb.

Ermənistanda daha 30 koronavirusa yoluxma halı qeydə alınıb. Ümumilikdə yoluxanların sayı 190 nəfərə çatıb

Azərbaycanda  daha 9 koronavirusa yoluxma halı qeydə alınıb.

Beləliklə, yoluxanların ümumi sayı 53 nəfərə çatıb.

Bir nəfər ölüb, on nəfər sağalıb.

Müəyyən müddətdir ki, hakimiyyət yeni yoluxma hallarının ölkə daxilində baş verdiyi, yoxsa xaricdən gətirildiyi haqda məlumat vermir.

Gürcüstan hökuməti prezidentə bütün ölkə ərazisində bir aylıq, yəni aprelin 21-nə qədər koronavirus pandemiyasına qarşı durmaq məqsədilə  fövqəladə vəziyyət tətbiq etmək təklifi ilə müraciət edib.

Gürcüstanın baş naziri Giorqi Qaxariya bildirib ki, fövqəladə vəziyyət şəraitində hökumət bir sıra əlavə hüquqlar əldə edir:

• Təcridolunma qaydalarının pozulduğu halda pozuntuya yol verən şəxsi məcburi karantinə gətirmək və ona qarşı bu halda nəzərdə tutulan sanksiyalar tətbiq etmək;

• Yükdaşımaları xaric hava, dəniz, quru sərhədlərinin keçilməsi ilə bağlı məhdudiyyət qoymaq;

• İctimai xidmət və inzibati fəaliyyətə xüsusi müddət və qaydalar tətbiq etmək;

• Hökumətə karantin, təcridolunma, tibbi tapşırıqlarla bağlı xüsusi hallarda hüquqi və fiziki şəxslərin mülkiyyəti və başqa maddi vəsaitlərindən istifadə hüququ verilir;

• 10 nəfərdən artıq insanın eyni vaxtda bir yerə toplaşması qadağan edilir;

Hökumət özəl qurum və təşkilatların fəaliyyətinə məhdudiyyət qoymaq və ya onlara konkret fəaliyyətlə məşğul olmaq göstərişi vermə hüququ əldə edir;

• Zərurət yarandığı halda hökumət dərman, tibbi xidmət və ilkin tələbat mallarına qiymətlərin nizamlanmasını öz üzərinə götürür;

• Hökumət təhsil sahəsində, qanunvericilikdə təsdiq olunmuş qaydalardan fərqlənən  müvəqqəti qaydalar qoya bilər;

• Zərurət yarandığı halda hökumət tibbi təhsilli və ya tibb sahəsində işləmə hüququ olan şəxslərin səfərbərliyini elan edə bilər;

• Məhkəmə iclasları məsafədən keçirilə bilər;

Bütün fiziki və hüquqi şəxslər fövqəladə vəziyyətin qaydalarına riayət etməyə borcludurlar. Əks təqdirdə inzibati tədbirlər tətbiq olunacaq. Fiziki şəxslər üçün 3 min lari (təxminən min dollar) və hüquqi şəxslər üçün 15 min lari cərimə tətbiq olunacaq. Eyni pozuntular təkrar olunduqda bu cinayət məsuliyyəti – 3 ilə qədər azadlıqdan məhrumetmə cəzasına qədər gətirib çıxara bilər.

Martın 20-nə olan məlumatlara görə, Gürcüstanda koronavirusa yoluxanların sayı 48 nəfərdir, karantində 1966, stasionar müşahidə altında 259 nəfər var.

300-500 minimal əməkhaqqı, bu da ekvivalentdə 600-1000 dollar edir – Ermənistanda koronavirus epidemiyası səbəbilə martın 16-dan qüvvəyə minən fövqəladə vəziyyət şəraitində təcrid və ya özünütəcrid tələblərini pozanlar üçün bu həcmdə cərimə nəzərdə tutulub.

Eyni pozuntu təkrarlanarsa və əgər bu əməl “ehtiyatsızlıqdan insanların kütləvi xəstələnməsinə” səbəb olarsa, cəza daha da sərtləşdiriləcək.
Bu halda neçə insanın zərər çəkməsindən asılı olaraq 3 aydan 5 ilə qəbər azadlıqdan məhrumetmə cəzası nəzərdə tutulub.

Ermənistanın Milli Məclisi martın 20-də növbədənkənar iclasda Cinəyət Məcəlləsinə və İnzibati Xətalar Məcəlləsinə belə dəyişikliklər edilməsini təsdiqləyib.

102 deputat təcrid rejimini pozanların cəzalandırılmasına dair dəyişiklikləri yekdilliklə qəbul edib. Bu, qanun layihəsinin ilk oxunuşu olub, ikinci, yekun oxunuş bazar ertəsi, martın 23-də səhər baş tutacaq.
Amma media və sosial şəbəkələrdə dərc olunanlarla bağlı digər məhdudiyyət parlamentdə mübahisələrə səbəb olub.

Ermənistanda fövqəladə vəziyyət elan olunandan sonra koronavirus epidemiyası ilə bağlı durum haqda yalnız rəsmi informasiyanı yaymaq olar. Hökumətin izahatına görə, bu, xəstələrə qarşı nifrətə və əhali arasında təşvişə yol verməmək üçün lazımdır.

Bəzi deputatlar jurnalistlərin və refaktorların tənqidi ilə razıdır. Hansı materialların təşviş doğurduğu, hansıların doğurmadığı ilə bağlı ölçü vahidi yoxdur. Amma artıq bu əmələ görə cəza nəzərdə tutulub – bu tələbin pozulması minimum əməkhaqqının 30-500 qatı, yəni 60-1000 dollar həcmində cərimələnəcək.

Azərbaycanda 44 koronavirusa yoluxma halı qeydə alınıb. Onlardan 10 nəfər sağalıb, 1 nəfər ölüb.

Ermənistanda 160 koronavirusa yoluxma halı təsdiqlənib. Bir nəfər sağalıb.

Gürcüstanda 47 nəfər koronavirusa yoluxub. Bir nəfər sağalıb.