Azərbaycandakı əməliyyatda İsrail də iştirak edib: "SEPAH-ın BTC neft kəmərinə hücum planı ifşa edilib"
Mossad Bakı əməliyyatı
Azərbaycan DTX-nin martda “SEPAH-ın terror şəbəkəsini ifşa etdiyi əməliyyatda” İsrailin Mossad, Şin Bet və IDF qurumlarının birgə iştirak etdiyi açıqlanıb.
Azərbaycan Dövlət Təhlükəsizlik Xidməti (DTX) martın 6-da İran İslam İnqilabı Keşikçiləri Korpusu (SEPAH/IRGC) tərəfindən ölkədə planlaşdırılan genişmiqyaslı terror və kəşfiyyat əməliyyatlarının qarşısını aldığını açıqlamışdı.
Bu gün isə İsrailin əsas təhlükəsizlik qurumları – Mossad, Şin Bet (İç Təhlükəsizlik Xidməti) və İsrail Müdafiə Qüvvələri (IDF) qeyri-adi birgə bəyanatla qlobal İran terror şəbəkəsini, o cümlədən Azərbaycandakı hücrəni çökdürdüklərini elan ediblər.
İsrail mediası bu məlumatı geniş işıqlandırıb və Azərbaycan əməliyyatının İsrail tərəfinin dəstəyi ilə həyata keçirildiyini vurğulayıb.
DTX-nin əməliyyatı: SEPAH-ın konkret hədəfləri və saxlanılanlar
DTX bildirib ki, kompleks əks-kəşfiyyat tədbirləri nəticəsində SEPAH-ın Azərbaycanda terror-təxribat aktlarının qarşısı alınıb. Məqsəd əhali arasında vahimə yaratmaq, ölkənin beynəlxalq nüfuzuna zərbə vurmaq və strateji obyektlərə ziyan vurmaq olub.
Hədəf obyektlər:
- Bakı-Tbilisi-Ceyhan (BTC) neft boru kəməri (strateji enerji infrastrukturu);
- İsrailin Bakıdakı səfirliyi;
- Dağ Yəhudiləri Dini İcmasının rəhbərlərindən biri;
- Ölkədəki Aşkenazi sinaqoqu (yəhudi məbədi).
DTX əməliyyat zamanı 8 Azərbaycan vətəndaşını saxlayıb, 4 İran vətəndaşı barədə axtarış elan edib.
Saxlanılanlardan bəziləri artıq məhkəmə qərarı ilə 6 il 6 ay müddətinə azadlıqdan məhrum edilib. Digərləri barədə həbs qətimkan tədbiri seçilib. İstintaq davam edir.
Əməliyyat zamanı aşkarlanan maddi sübutlar arasında C-4 tipli partlayıcı maddə (7 kq 730 qram) xüsusi qeyd olunub. Bu partlayıcı Səbail rayonunun Şıxov qəsəbəsi yaxınlığındakı “Hamam Bath” sağlamlıq kompleksinin ərazisində yerləşdirilmiş konteynerdə gizlədilib.
DTX-nin videoçəkilişlərində şübhəlilərin konteyneri götürməsi və Bakının Nəsimi rayonunda gizlətməsi görüntülənib. İran vətəndaşları Rustamzada Behnam Sahibali və Zandkian Yaser Rahim, eləcə də Azərbaycan vətəndaşı Quliyev Tərxan Tərlan oğlu və Ağayev Nicat Zaman oğlu ilə bağlı cinayət əlaqələri müəyyən edildiyi açıqlanıb.
SEPAH bu iddialara hələlik rəsmi cavab verməyib.
İsrailin bəyanatı: “Terror şəbəkəsi ifşa edilib”
Bu gün Mossad, Şin Bet və IDF qeyri-adi birgə bəyanat yayaraq bildiriblər ki, son aylarda İranın qlobal terror şəbəkəsi ifşa olunub. Şəbəkə İsrail və yəhudi hədəflərinə, eləcə də Qərb hərbi obyektlərinə qarşı yönəlib. Azərbaycandakı hüceyrə bu şəbəkənin bir hissəsi kimi təqdim olunub.
İsrail tərəfinin verdiyi əlavə detallar:
- SEPAH-ın 4000-ci bölməsi (xüsusi əməliyyatlar şöbəsi) rəhbərliyi altında fəaliyyət göstərən hücrə partlayıcı dronları qaçaqmalçılıq yolu ilə Azərbaycana gətirib və potensial hədəflər haqqında kəşfiyyat məlumatları toplayıb.
- Hədəflər arasında BTC neft boru kəməri (İsrailin neft idxalının təxminən üçdə birini daşıyan strateji boru), İsrail səfirliyi, Bakıdakı sinaqoq və yəhudi icma rəhbərləri var.
- Hücrə üzvləri İranın birbaşa tapşırığı ilə fəaliyyət göstəriblər.
Şəbəkənin rəhbərləri və taleyi:
- Rəhman Moqadam (və ya Makadam) – IRGC Kəşfiyyat Aparatının 4000-ci bölməsinin rəhbəri, xaricdə terror əməliyyatlarını idarə edən əsas şəxs. İsrail-ABŞ əməliyyatları zamanı (İsraildə “Kükrəyən Şir” əməliyyatı adlandırılır) vurulub.
- Mohsen Suri – 4000-ci bölmənin üzvü, xarici hücrələrlə görüşlər keçirib – vurulub.
- Məcid Xadəmi – yüksək rütbəli IRGC kəşfiyyat rəsmisi, şəbəkənin ümumi rəhbərliyində iştirak edib.
- Məhdi Yekə-Dehqan (“Doktor”) – Azərbaycan və digər ölkələrdəki əməliyyatları bilavasitə idarə edib. Türkiyədə həbs olunan şəxslərlə bağlı olub.
İsrail qurumları iddia edir ki, bu şəbəkə ABŞ-İsrail İranla müharibəsindən (fevralın 28-dən sonra) sonra daha da aktivləşib və xarici ölkələrdə yeni hüceyrələr yaratmağa çalışıb.
Niyə 6 həftəlik fərq?
“Yerusəlim Post” və digər İsrail nəşrləri də qeyd edirlər ki, Azərbaycan DTX martın 6-da açıqlama verib, İsrail isə 20 apreldə detallı məlumat yayıb. Bu vaxt fərqinin səbəbi rəsmi olaraq açıqlanmayıb.
Lakin İsrail tərəfi vurğulayır ki, Azərbaycanla əməkdaşlıq nəticəsində qlobal şəbəkənin çox hissəsi ifşa olunub və bir sıra yüksək rütbəli İran rəhbərləri məhv edilib.
İsrail mediası bildirir ki, Tel-Əviv əvvəllər də Azərbaycan kimi ölkələrə İran terror təhdidlərinə qarşı kömək göstərib, lakin xarici əməliyyatlarda IDF-nin adı nadir hallarda çəkilir.
Bu dəfəki birgə bəyanatda IDF-nin də iştirakı qeyd olunması hadisənin daha əhəmiyyətli olmasına işarə hesab edilir.
İsrail qurumları bəyan ediblər ki, beynəlxalq tərəfdaşlarla əməkdaşlığı davam etdirəcək və oxşar təhdidlərin qarşısını almaq üçün çalışacaqlar.
Mossad Bakı əməliyyatı
