Merkelin səfərinin iqtisadi yekunları. Tbilisidə hansı müqavilələr imzalandı?

Gürcüstana səfəri çərçivəsində Almaniya kansleri Gürcüstanla iki yeni müqavilə rəsmiləşdirilib.Həmin müqavilələr çərçivəsində Gürcüstan ümumi məbləği 193 milyon avro olan kredit alacaq və həmin kreditin köməyi ilə Tbilisinin yaxınlığında yeraltı qaz anbarı tikiləcək, Acarıstanda isə su təchizatı sistemi yaxşılaşdırılacaq.

_________________

Yeraltı qaz anbarı

Almaniya Yenidənqurma Kredit Bankı (KFW) Gürcüstan Neft və Qaz Korporasiyasına yeraltı qaz anbarının tikintisi üçün 150 milyon avro kredit ayırıb.

Qaz anbarı Tbilisinin yaxınlığında, Samqorinin cənub tağında boşalmış neft yatağında tikiləcək.

Yeraltı qaz anbarı ölkənin enerji müstəqilliyi üçün vacib obyektdir. Bu layihə Gürcüstana imkan yaradır ki, Şahdəniz boru kəməri ilə daxil olan təbii qazdan daha yaxşı istifadə edə bilsin: qaza tələbatın az olduğu yay aylarında Azərbaycandan daxil olan qaz anbara vurulacaq, tələbatın zirvə nöqtəsində – qışda isə ehtiyatdan istifadə başlayacaq. Qaz təchizatının qəza üzündən dayandırılması halında anbar dövlətə imkan yaradacaq ki, istehlakçıları qazla məhdudiyyətsiz təmin edə bilsin.

Tikinti işlərinə 2019-cu ildə başlanacaq. Anbar 2020-ci ildə istifadəyə veriləcək.

Qaz anbarının layihəsini tərəfdaş fond 2014-cü ilin oktyabrında təqdim edib. O vaxtdan bəri Gürcüstan hakimiyyəti layihənin maliyyələşdirilməsi məqsədilə bir çox beynəlxalq investorlarla kredit müqaviləsi bağlamağa cəhd edib.

Qaz anbarının tikintisi üçün cəmi 250 milyon avro tələb olunur. Gürcü tərəfinə 150 milyon avronu kredit şəklində Almaniya ayırıb. Yerdə qalan 100 milyonu isə Gürcüstan Neft və Qaz Korporasiyası kredit şəklində Avropa İnvestisiya Bankından almağa çalışır. Bu məsələ ilə bağlı danışıqlar artıq aparılır.

Acarıstanın su təchizatı üçün 43 milyon

Acarıstan kəndlərində su təchizatı və kanalizasiya sistemləri proqramına Almaniya Federativ Respublikasının hökuməti Gürcüstana güzəştli maliyyə ehtiyatı şəklində 40 milyon avro ayırıb, daha 3 milyon avro isə qrant kimi təqdim edilib.

Bu vəsaitlər Xuloy, Ked, Şuaxev, Xelvaçaur və Kobuleti bələdiyyələrinin kəndlərində su təchizatı və kanalizasiya sistemlərinin bərpasına sərf ediləcək.

Həmin layihə 215 min nəfər üçün su təchizatını yaxşılaşdıracaq.

Bu, Acarıstan üçün Almaniyanın maliyyə dəstəyi ilə həyata keçiriləcək ilk layihədir.

“Gürcüstan dəmir yolları” və “Deutsche Bahn” arasında əməkdaşlıq haqqında müqavilə

Dünyanın aparıcı dəmiryolu şirkətlərindən biri olan “Deutsche Bahn” ilə müqavilə Gürcüstanla Almaniyanın iqtisadi əməkdaşlığının əhəmiyyətli yekunu hesab edilir.

Müqaviləyə əsasən, “Gürcüstan dəmir yolları” və “Deutsche Bahn” strateji tərəfdaşa çevrilirlər və yük sektorunda birgə layihələr üzərində işləyəcəklər.

Tərəfdaşlıq çərçivəsində “Gürcüstan dəmir yolları” Rumıniyanın Konstansa liman şəhərindən Gürcüstandan və Azərbaycandan keçməklə yüklərin Yaxın Şərq və Hindistan istiqamətində, həmçinin Xəzər dənizi vasitəsilə Şərqi Asiya istiqamətində daşınmasının təşkilinə məsul olacaq.

Öz növbəsində, “Deutsche Bahn” Konstansadan Avropa İttifaqı ərazisində avtomobil və dəmiryolu yük daşımalarına görə məsuliyyəti öz üzərinə götürür. Daşımaları “Deutsche Bahn”ın törəmə şirkəti olan “DB Schenker” həyata keçirəcək.

Angela Merkelin sözlərinə görə, “Almaniya biznes əlaqələrinin dərinləşdirilməsinin perspektivlərini görür”, xüsusilə aqrar sektorda istehsal olunmuş məhsulların Gürcüstandan Avropa İttifaqına daşınması perspektivlidir.

Merkelin nümayəndə heyətinə Knauf Gips KG; Ernst Klett AG; Deutsche Bahn AG; Caisley International GmbH; GP Günter Papenburg AG; Cronimet Holding AG/Cronimet Mining AG; Giesecke & Devrient kimi iri alman şirkətlərinin təmsilçiləri daxil idilər.

Onlar Gürcüstanda mövcud olan investisiya mühiti ilə tanış olublar. Gürcüstan hakimiyyəti ümid edir ki, bu görüşlər konkret nəticələrə gətirəcək və Almaniya şirkətləri Gürcüstana investisiya qoyuluşu ilə maraqlanacaqlar.

Almaniyada leqal işədüzəlmə imkanı

Tbilisi Dövlət Universitetinin tələbələri ilə görüşdə Almaniya kansleri Angela Merkel bildirib ki, Almaniya Gürcüstan vətəndaşlarına leqal işədüzəlməyə imkan yaradacaq qanun layihəsi üzərində işləyir. Merkelin sözlərinə görə, Gürcüstan və Balkan ölkələri üçün kvota təsis ediləcək və onlar Almaniyada çatışmazlıq hiss edilən peşələrə leqal işə düzələ biləcəklər.

“Biz sahə mütəxəssislərinin qanun layihəsini hazırlayırıq. Almaniya bazarında böyük çatışmazlıq mövcud olan ayrı-ayrı peşələr üçün, həmçinin Assosiasiya haqqında Müqavilə çərçivəsində, o cümlədən Gürcüstan və Balkan ölkələri üçün bu kvotalar yaradılacaq. Biz leqal və hüquqi cəhətdən düzgün yollar formalaşdıracağıq. O cümlədən peşə məktəbləri vasitəsilə ki, həmin məktəblər güclənsinlər. Bundan başqa, alman dilinin öyrənilməsi dəstəklənəcək”, – Merkel deyib.