Jurnalist DTX-da hədələndiyini bildirib
Ermənilərə işləməkdə ittiham olunanlar
Sentyabrın 13-də jurnalist Nurlan Qəhrəmanlı (Libre) Dövlət Təhlükəsizlik Xidmətinə (DTX) çağırılıb. Bu barədə Amerikanın Səsinə jurnalistin özü məlumat verib.
Nurlan Qəhrəmanlı bildirib ki, o, DTX-da sosial şəbəkələrdəki paylaşımlarına görə zorlama ilə təhdid olunub:
“Dedilər ki, müharibə əleyhinə paylaşımlarına davam eləmə. Konkret olaraq orada iki DTX əməkdaşı ilə danışdım, biri mülayim, digəri isə zorakı dillə danışırdı. İki saata yaxın orada oldum. Tələb bu idi ki, müharibə əleyhinə heç nə yazmayım. Dedilər ki, biz müharibə şəraitindəyik, sənin yazdıqların bizim ümumi işimizə ziyandır, paylaşımların Ermənistanın xüsusi xidmət orqanlarına xidmətdir”.
- “Rusiyanın Azərbaycanla münasibətləri bəzən müttəfiqlik səviyyəsində olur, bəzən də olmur”. Bakıdan baxış
- Elmar Məmmədyarov: “Sülh sazişinin imzalanması üçün hərbi toqquşma olmalıdır”
- “Pərdəarxası intensiv danışıqlar gedir və biz yalnız nəticələri görürük”. Bakıdan şərh
Jurnalist bildirib ki, Dövlət Təhlükəsizlik Xidmətinə çağırılması və orada aldığı təhdidə görə məhkəməyə müraciət edəcək.
Nurlan Librenin sözlərinə görə, o, bundan əvvəl də Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən təhdid olunub və zorakılığa məruz qalıb.
“2020-ci ilin oktyabrında özünü şöbə rəisi adlandıran şəxs məni yarım saat dizimin üstə saxladı, zorakılıq göstərdi. Məni erməni xüsusi xidmət orqanlarına, həmçinin Azərbaycan Dövlət Təhlükəsizlik Xidmətinə işləməkdə (ikitərəfli casusluqda) ittiham etdi. Onun sözlərinə görə, mən cəbhədən Ermənistana videogörüntülər ötürmüşdüm”, – deyə, o bildirib.
Jurnalist idarədə zorla üzristəmə videosu çəkdirildiyini, həm də idarənin bu məsələni ictimailəşdirməməsini tələb etdiyini bildirib. O, həmin gün axşam saat 20 radələrində sərbəst buraxılıb.
Bu hadisədən sonra Daxili İşlər Nazirliyindən Nurlan Qəhrəmanlnın MCQMİ-yə dəvət edilməsilə bağlı bildirilmişdi ki, Daxili İşlər Naziriyinin 102 xidmətinə zəng edən şəxs Nurlan adlı sosial şəbəkə istifadəçisinin dövlətin, ordunun əleyhinə paylaşımlar etdiyini, bu adamla bağlı araşdırma apaırlmasını istədiyini bildirib:
“Bununla bağlı oktyabrın 29-da Nurlan MCQMİ-yə dəvət edilib. Orada onun öz razılığı ilə videogörüntülü izahatı alınıb. Ondan sonra sərbəst buraxılıb. Bu, dövlətin təhlükəsilziyi ilə bağlı məsələdir deyə dəvət edilib, görüntülü izahatı alınıb. Özünə də izah edilib ki, nəyə görə, dəvət edilib. Hazırda araşdırmalar davam edir. Nurlanın MCQMİ-də fiziki təzyiqlərə məruz qalması ilə bağlı dedikləri isə əsassızdır”.
Məsələ ilə bağlı Dövlət Təhlükəsizlik Xidməti jurnalistlərin sorğusuna cavab verməyib.
