Gürcüstanın baş naziri: Rusiya Tbilisinin sülhməramlı təşəbbüslərinə mane olur

“Gürcüstan hökuməti qəti şəkildə münaqişələrin sülh yolu ilə həllinin tərəfdarı kimi çıxış edir. Rusiya isə təəssüf ki, yenə bizim sülhməramlı təşəbbüslərimizə mane olmağa çalışır”, – bu haqda baş nazir Mamuka Baxtadze Fox telekanalının efirində Spesial Reports verilişində Bret Bayerə bildirib.

Gürcüstanın hökumət rəhbərinin sözlərinə görə, Rusiya Gürcüstan ərazisinin 20 faizini işğal edib və hələ də öz təcavüzkar siyasətini davam etdirir.

“Çox sayda gürcü işğal olunmuş ərazilərdə öz evlərini tərk etməli olub. Rusiya Gürcüstanın iki tarixi regionunu işğal edib. Gürcüstan hökuməti əlbəttə ki, qəti şəkildə münaqqişələrin sülh yolu ilə nizamlanması prinsiplərinə sadiqdir. Təəssüf ki, Rusiya yenə də bizim sülhməramlı təəşəbbüslərimizə mane olmağa çalışır”, – baş nazir bildirib.

“Prezident Trampın tənqidçiləri hesab edir ki, o, Rusiyaya qarşı özünü kifayət qədər sərt aparmır. Siz necə hesab edirsiz?” – verilişin aparıcısı baş nazirdən soruşub.

Baxtadze bildirib ki, o, prezident Trampın Putinlə dialoq aparmaq qərarını sadəcə alqışlayır, çünki onun sözlərinə görə, dialoqun alternativi yoxdur.

“Hərçənd regional konteksti də diqqətə almaq lazımdır, çünki qeyri-stabillik və müvafiq olaraq yaratdığı maneələr problemi kəskinləşdirir. Amma bütün bunlarla yanaşı Rusiya ilə ən yüksək səviyyədə birbaşa dialoq məhsuldar və müsbət addımdır”, – Mamuka Baxtadze vurğulayıb.

•   Gürcüstanın baş baziri Mamuka Baxtadze sentyabrın 16-da ABŞ-a iş səfərinə yollanıb. Bu onun ABŞ-a ilk səfəridir.

•  36 yaşlı Mamuka Baxtadze özündən əvvəlki baş nazir Giorgi Kvirikaşvili iqtidarda olan “Gürcü arzusu” partiyasının sədri və faktiki olaraq ölkəni idarə edən Bidzina İvanişvili ilə aralarındakı ziddiyət üzündən istefa verəndən sonra, 2018-ci il iyunun 20-də hökumətin başına keçib.