Gürcüstanda iki dəfə peyvənd vurduranlar üçün komendant saatı ləğv edilə bilər
Gürcüstanda koronavirusa qarşı peyvəndin hər iki dozası vurulan insanlar müəyyən üstünlüklər əldə edə bilər, o cümlədən də onlar komendant saatında azad hərəkət edə biləcəklər – Xəstəliklərə Nəzarət Milli Mərkəzinin direktoru Amiran Qamkrelidze Koordinasiya Şurasının iclasından sonra bildirib.
Qamkrelidzenin sözlərinə görə, bu təşəbbüsün məqsədi vətəndaşların vaksinasiya prosesinə daha fəal qatılması üçün stimul yaratmaqdır.
“4400 nəfərə yaxın insan ölkəmizdə iki dəfə Pfizer peyvəndi ilə vaksinasiyadan keçib. Xəstəliklərə Nəzarət Milli Mərkəzi gələn həftə Koordinasiya Şurasına müvafiq təşəbbüslə müraciət etmək istəyir ki, bu insanlar məhdudiyyətlər dövründə müvafiq məhdudiyyətlərə sahib olsunlar”, – Qamkrelidze deyib.
O həmçinin qeyd edib ki, beynəlxalq təcrübə ilə təsdiqlənən bir neçə maddə də nəzərdən keçirilir. Bu, komendant saatında azad hərəkət etməyə, o cümlədən də xaricə gedən zaman müvafiq sənədin verilməsinə aiddir:
“Əvvəldən səsləndirə bilməyəcəyim başqa təşəbbüslər də var, biz onlardan bəziləri üzərində işləyirik ki, bu insanlar və əhali ümumilikdə sürətli və tam vaksinasiyada maraqlı olsun”.
Onun sözlərinə görə, iki dəfə peyvənd vurulan insanlar bir neçə ölkədə artıq güzəştlərdən yararlanırlar.
“Bir sıra ölkələrdə iki dəfə vaksinasiyadan keçənlərdən açıq havada maska ilə gəzmək tələb olunmur, onlar həmçinin komendant saatı və digər məhdudiyyətlər baxımından da üstünlüyə sahibdirlər”, – Amiran Qamkrelidze deyib.
Qamkrelidzenin sözlərinə görə, mayın 15-ə qədər 14 minə yaxın insan artıq tam vaksinasiyadan keçmiş olacaq.
Səhiyyə naziri Yekaterina Tikaradze də vaksinasiya prosesini şərh edib.
“Vaksinasiya gözlənilən templə davam edir. Əhaliyə peyvəndin təhlükəsiz olduğunu anlamaq üçün vaxt lazımdır, çünki təkcə Gürcüstan yox, həm də xarici medai vaksinin etibarlılığı və ziyanı ilə bağlı birmənalı olmayan məlumatlar yayır.
Mən əminəm ki, Gürcüstan xalqı tezlikdə vaksinin üstünlüklərinin nə qədər böyük olduğunu anlayacaq və bu prosesdə daha fəal iştirak edəcək”, – nazir deyib.
Son məlumatlara görə Gürcüstanda koronavirusa qarşı 41801 nəfər vaksinasiyadan keçib.
Hazırda ölkədə iki növ peyvənddən istifadə olunur – Pfizer və AstraZeneca, bir də Çinin SinoVac vaksini.
Aprelin 27-dən Gürcüstanda 18 yaş və yuxarı vətəndaşların SinoVac preparatı ilə vaksinasiyası üçün qeydiyyat başlayıb. Xəstəliklərə Nəzarət Milli Mərkəzinin məlumatına əsasən, 6700 nəfərdən çox insan artıq qeydiyyatdan keçib.
Çinin SinoVac peyvəndinə Ümumdünya Səhiyyə Təşkilatı hələ icazə verməyib, amma Macarıstan nizamlayıcısının icazəsinə sahibdir.
Aprelin sonuna qədər lisensiya alacağı və yalnız bundan sonra vaksinasiya prosesinə daxil ediləcəyi şərtilə aprelin əvvəlində Gürcüstana 100 000 doza SinoVac gətirilib.
Bununla belə, Gürcüstan hökuməti peyvəndi avtorizasiyadan əvvəl vaksinasiya prosesinə daxil etmək qərarı alıb. Səhiyyə nazirinin müavini Tamar Qabuniyanın sözlərinə görə, bunun səbəbi 55 yaşa qədər insanlar arasında “AstraZeneca” peyvəndinin istifadəsinin məhdudlaşdırılması və epidemioloji vəziyyətin ağır olmasıdır.
Gürcüstanda koronavirusa yoluxma halları çoxalıb. Son 24 saat ərzində ölkədə 1551 nəfərdə COVID-19 aşkarlanıb, 17 nəfər vəfat edib.
