Gürcüstanın Marneuli şəhərində niyə etiraz edirlər və Gürcüstan müsəlmanlarının rəhbərinin DTX-da dindirilməsi bununla necə bağlıdır?
Aprelin 17-də Gürcüstan Müsəlmanları Ali Ruhani İdarəsinin rəhbəri şeyx Mirtağı Əsədovun Dövlət Təhlükəsizlik Xidmətində dindirilməsi zamanı istintaqçıları ən çox maraqlandıran məsələ Marneulidə az əvvəl karantin rejiminin ləğv olunması, kənd təsərrüfatı məhsullarını satmağa çıxarmalarına icazə verilməsi tələbi ilə keçirilən etiraz aksiyası olub.
Aprelin 16-da elan olunub ki, Əsədova qarşı sabotaj maddəsi ilə cinayət işi qaldırılıb. Səbəblər haqda məlumat verilməyib, Əsəsdovun özü isə ehtimal edib ki, bu, onun müxalif “Mtavari arxi” telekanalına verdiyi müsahibə ilə bağlıdır.
Müsahibəsi zamanı Əsədov baş nazir Giorgi Qaxariyanın koronavirus epidemiyası təhlükəsinə baxmayaraq, Gürcüstanda Pasxa vaxtı kilsələrin açıq qalacağı ilə bağlı bəyanatını şərh edib.
Şeyx ritorik sual verib: “Biz də Ramazan vaxtı məscidləri açsaq, necə olar, görəsən, bizə də kilsəyə olduğu kimi anlayışla yanaşarlar?”
- Mirtağı Əsədov: “Gürcüstanın baş nazirinin sözləri diskriminasiya xarakteri daşıyır, bu doğru deyil”
- Gürcüstanda artıq ancaq piyada gəzmək olar, qapalı məkanlarda maska taxmaq da mütləqdir
Əsədovun dindirilməsi dörd saat çəkib. Onun daha sonra jurnalistlərə bildirdiyinə görə, müstəntiqlər ondan Facebook-da paylaşılan Marneulidə etiraz çağırışı ilə bağlı statusu niyə bəyəndiyini və niyə bu statusu təkrar paylaşdığını soruşublar.
“Bu statusda çağırış var idi: evində qal və maşının siqnalını bas. Məgər bunda hər hansı qanun pozuntusu var?”, – Mirtağı Əsədov deyir.
Martın 25-dən iki qonşu rayon – Marneuli və Bolnisi lokal koronavirus epidemiyası təhlükəsinə görə karantin altına alınıb. Bolnisidə həmin vaxtdan 22 nəfər xəstələnib, aprelin 17-də isə yerli “təcili yardım” şöbəsi bağlanıb, çünki orada çalışan yeddi həkim və onların ailə üzvlərində yoluxma təsdiqlənib.
Martın 17-ə olan məlumata əsasən, epidemiya başlanandan bəri Gürcüstanda ümumilikdə 370 koronavirusa yoluxma qeydə alınıb, onlardan üç nəfər ölüb, 76 nəfər sağalıb.
Bütün ölkə martın 21-dən fövqəladə vəziyyət rejimində yaşayır. Amma təcrid, həm də öz rayonlarının daxilində, yerli sakinləri iqtisadi və sosial cəhətdən xüsusilə ağır vəziyyətə salıb – Əsədov deyir.
“Hər gün bizə zəng vurub, kömək istəyirlər. Hökumət isə hələ kömək etmək üçün heç bir tədbir görməyib. Facebook statusunda məhz bu haqda yazılmışdı, onun məqsədi hakimiyyətin diqqətini çəkmək, xalqın səsinin eşidilməsinə şərait yaratmaq idi”, – Mirtağı Əsədov bildirib.
O deyib ki, həmin aksiya haqda elan olunandan hələ əvvəl o, Facebook statusu vasitəsilə hakimiyyətə yerli sakinlərə kömək edilməsi üçün müraciət edib.
“Düşünürəm ki, onlar indi məni qorxutmaq və danışmaq hüququmdan məhrum etmək istəyirlər”, – Mirtağı Əsədov söyləyib.
Marneulidə nə baş verib?
Aprelin 14 və 15-də Marneulidə “Siqnal ver, etiraz elə” şüarı altında aksiya baş tutub. Aksiya bütün Gürcüstan ərazisində koronavirus pandemiyası ilə mübarizə vasitələrindən biri kimi martın 31-dən tətbiq edilən komendant saatının başladığı saata – 21:00-a təyin edilib.
Marneuli sakinləri bildirirlər ki, onlar karantin rejiminə görə xüsusi ağır vəziyyətdədirlər.
Marneuli və ətraf kəndlər aqrar region hesab edilir, burada böyük azərbaycanlı icması kompakt şəkildə yaşayır. Onlar üçün əsas qazanc vasitəsi kənd təsərrüfatı məhsullarıdır.
Onlara şəxsi təcrid tədbirlərini gözləmək şərtilə sahələrdə və fermalarda işləmək qadağan edilməsə də, bu, problemi heç cür həll etmir. Məhsulu əsasən Tbilisi və digər iri şəhərlərdə satırlar. Bu imkandan məhrum olandan sonra yerli əhalinin dolanışıq imkanı qalmayıb.
Mirtağı Əsədovdan başqa, Gürcüstan Müsəlmanları Ali Ruhani İdarəsinin daha üç təsisçisi də Dövlət Təhlükəsizliyi İdarəsinə ifadə verməyə çağırılıb.
Onların hər biri bildirir ki, bu etirazın nə lideri olublar, nə təşkilatçısı, nə də iştirakçısı.
Əsədovun vəkili Keti Çutlaşvili hesab edir ki, bu işdə heç bir cinayət əməlinin tərkibi yoxdur. Onun fikrincə, cinayət işi böyük ehtimalla müsəlman liderlərin fəaliyyəti ilə əlaqəlidir.
Əsədovun dindirilməsi sosial şəbəkələrdə xüsusi mənfi reaksiya doğurub.
“Dövlət Təhlükəsizliyi Xidmətinə keşişlərdən də kimisə dindirməyə çağırıblar? Hökumət dünyəvi hakimiyyət olduqları haqda öz bəyanını pozur?” – Facebook paylaşımlarının müəllifləri sual edirlər.
