Görkəmli alimlər və iş adamları qatil robotların yaradılmasının təhlükəsi haqda xəbərdarlıq edirlər
Robototexnika və süni intellekt sahəsində ixtisaslaşmış 116 şirkət banisi BMT-ə müraciət edərək bu texnologiyaların hərbi məqsədlə istifadəsini qadağan etməyə çağırıb.
Müraciəti imzalayanlar sırasında Tesla və SpaseX şirkətlərinin banisi Elon Mask, Apple şirkətinin yaradıcılarından biri Stiv Voznyak, müasir dövrün ən görkəmli fiziki Stiven Hokinq də var.
Human Rights Watch təşkilatının məlumatına görə, bu gün 10-dan çox ölkə süni intellektdən istifadə etməklə silah hazırlayır. Onların sırasında ABŞ, Böyük Britaniya, İsrail, Çin, Cənubi Koreya və Rusiya da var.
“Əgər belə silah hazırlansa, hərbi əməliyyatlar indiyə qədər görülməmiş miqyasda və insan dərrakəsinə sığmayan sürətlə həyata keçirilə bilər. Bu silah həm despotlar, həm də terrorçular tərəfindən dinc sakinlərə qarşı istifadə oluna bilər”, – müraciətdə bildirilir.
Ekspertlər ehtimal edirlər ki, bu sahədə iş artıq çox uzağa gedib və dünya belə sistemlərin ortaya çıxması ilə bağlı real perspektivlə üz-üzədir.
“Süni intellektdən istifadə təhlükəsizliyi ilə bağlı düşünmək zamanı yetişib. Bu, özündə Şimali Koreyadan daha böyük təhlükəni daşıyır”, – Elon Mask öz twitter-ində yazıb.
