Ermənistanda koronavirusa yoluxanların sayı kəskin artır, xəstəxanlarda yer çatmır. Səbəblər və proqnozlar – təfərrüatlar
Ermənistanda koronavirusa yoluxanların sayı sürətlə artır.
Son sutka ərzində 92 yeni yoluxma halı qeydə alınıb – bu, Ermənistan üçün bir gün ərzində üzə çıxarılan ən çox yoluxma halıdır.
Ümumilikdə aprelin 2-ə qədər Ermənistanda artıq 663 nəfərdə koronavirusa yoluxma halı qeyd edilib, onlardan 33 nəfəri sağalıb, altı nəfər ölüb.
Ölkədə xəstələrin sayının artması fonunda paytaxtın idman komplekslərində hospital yaradılır.
Ehtimal olunur ki, regionlarda da idman zallarından xəstəxana kimi istifadə etmək lazım gələ bilər.
Bütün təfərrüatlar – virusla bağlı vəziyyət, Ermənistanda yoluxmanın pik həddi nə zaman olacaq və niyə Gürcüstanda yoluxanların sayı burdakından daha azdır.
Xəstəxanalarda çarpayılar çatmır
Yerevanda Dəmirçiyan adına İdman-Konsert Kompleksinin hollunda düzülən xəstəxana çarpayılarının əks olunduğu fotolar artıq martın 31-dən Facebook-un Ermənistan seqmentində yayılıb.
Məlum olub ki, ölkə hakimiyyəti burada koronavirusa yoluxanların sayının kəskin artacağı ehtimalını nəzərdən keçirir.
“İdman-Konsert Kompleksində çarpayıların olması infeksiyanın yayılmasının yeni mərhələsinin planlaşdırıldığı haqda yox, bunun proqnozlaşdırıldığı haqda xəbər verir… Çarpayıların yaınız İKK-də yox, həm də bütün vilayətlərdə ayrılmış idman zallarında düzülməsi planlaşdırılıb. Lazım olduğu təqdirdə bu zallar orta ağır xəstələr üçün hospitala çevriləcək, amma ağır xəstələr üçün də ola bilər”, – aprelin 2-də səhiyyə naziri Arsen Torosyan bildirib.
Onun sözlərinə görə, hökumət hadisələrin istənilən ssenari ilə inkişafına hazırlaşır:
“Hətta ən pis ssenarilər də müzakirə olunur, bəzi ölkələrdə olduğu kimi bu durumda pasiyentlərin müalicəsi üçün nəinki xəstəxanada, hətta idman zallarında da çarpayı çatmaya bilər”.
Yoluxma piki nə zaman olacaq?
Ermənistanda koronavirusa yoluxma pikiistənilən an qeyd oluna bilər, səhiyyə naziri bildirib:
“Bu, həmişə postfaktum qeyd olunur, hər gün yoluxanların sayı azaldığı zaman. Və əgər hər kəs qaydalara və tövsiyələrə əməl etsə, bu, xəstəliyin piki və geriləməsi olacaq. Yaxın zamanda gündə 400-500 test keçiriləcək, yeni apparatlar gələndən sonra isə gündə 1500-ə yaxın test”.
Tibb işçiləri arasında xəstələr
Ermənistanda tibb işçiləri arasında yoluxanlar çoxalıb.
“Bu gün yoluxmuş həkimlərin dəqiq sayını deyə bilmərəm, amma təəssüflə xəstələnən həkimlərin çoxaldığını bildirmək istəyirəm. Yoluxmuş vətəndaşlarla təmas zamanı bu cür təcrübə qaçılmazdır”, – səhiyyə naziri bildirib.
Üstəlik tibb personalı öz vəzifəsini yerinə yetirərkən yoluxmayıb:
“Həkimlərin xidməti məkanda yox, məişət şəraitində yoluxmuş vətəndaşlarla ünsiyyətdə olduğu hallar olub. bütün bu hallar tədqiq olunur, tibb işçilərinin təcridi həyata keçirilir. Qeyd etmək istəyirəm ki, bu şərtlər altında bizim üçün bütün həkimlər və biz tibb personalımızı qorumaq üçün mümkün olan hər şeyi edirik”.
Yeri gəlmişkən, nazir koronavirusla mübarizə məqsədilə 55 yaşına qədər əlavə tibb personalının toplandığını elan edib.
Nazirin çağırışına 22 həkim, 8 tibb bacısı və 1 kiçik tibb işçisi cavab verib.
“Bizim qəhrəman həkimlərimiz” – bu videonu baş nazir Nikol Paşinyan bu sözlərlə paylaşıb. O, bu paylaşımı Favebook səhifəsində edib.
Niyə Gürcüstanda yoluxanların sayı burdakından daha azdır? – jurnalistlər maraqlanıblar
Ermənistanın səhiyyə naziri onun fikrincə qonşu Gürcüstanda koronavirusa yoluxanların sayının Ermənistanla müqayisədə niyə xeyli az olduğunu izah edib:
“Xoşbəxt təsadüfdən Gürcüstanda 500 nəfərə yaxın insanın işlədiyi müəssisədəvə ya 100 nəfərin iştirak etdiyi banketdə yoluxma qeyd olunmayıb. Buna görə də onlarda rəqəmlər daha aşağıdır. Ümid edirəm ki, dost ölkədə eyni temp saxlanılacaq, həmçinin ümid edirəm ki, biz rəqəmləri hazırda mövcud həddə saxlaya biləcəyik”.
Torosyanın bu izahı hamını təmin etməyib.
“Təsəvvür edirsiz?! Xoşbəxt təsadüfdən Gürcüstanda, məsələn, bir yoluxmuş italyan gəlib 500 nəfərə yaxın insanın işlədiyi tikiş müəssisəsinə girməyib, o səbəbdən ki, reyslər zamanında təxirə salınmayıb və ya sərhəddə normal yoxlama aparılmayıb… Əgər infeksiyanı nəzarətdə saxlaya bilmirsizsə, bunu etiraf edin”, – Facebook səhifəsində politoloq Qrant Melik-Şahnazaryan yazıb.
