Ermənistan prezidenti “İngiltərə kraliçası” olmaq istəmir? O, ilk dəfə parlamentin qəbul etdiyi qanun layihəsini imzalamayıb
Ermənistan prezidneti Armen Sarkisyan faktiki olaraq ölkə parlamentinə meydan oxuyub. Fevralın 6-da prezident Milli Məclisin qəbul etdiyi qanunları imzalamaqdan imtina edib.
Armen Sarkisyan iki qanuna edilən dəyişikliklərin Konstitusiyaya uyğun olub-olmadığından şübhələnib və bu məsələnin aydınlaşdırılması üçün Konstitusiya Məhkəməsinə müraciət edib.
Bu, kifayət qədər gözlənilməz olub – həm parlament üzvləri, həm də cəmiyyət üçün.
Məsələ orasındadı ki, ölkə parlament idarə üsuluna keçəndən sonra prezident artıq əvvəlki səlahiyyətlərə sahib deyil, artıq dövlət başçısı baş nazirdir. Prezident vəzifəsi isə daha çox təmsili xarakter daşıyır.
2019-cu ilin sonunda “GALLUP International” şirkətinin apardığı sosioloji sorğu nəticələrinə əsasən, prezident Sarkisyan ən populyar siyasətçilərdən biri elan olunub.
Bu reytinqi JAMnews üçün şərh edərkən politoloq Hrant Mikaelyan bunları deyib:
“O [Armen Sarkisyan], heç bir siyasi məsələ ilə bağlı öz fikrini açıqlamır, heç kimlə qarşıdurmaya girmir və heç kimə ilişmir. Müvafiq olaraq, onu sevməmək üçün səbəb azdır”.
Nə baş verib?
• Ermənistanın Konstitusiya Məhkəməsi ətrafındakı qalmaqal beynəlxalq arenaya çıxır
Ermənistan prezidenti Armen Sakisyan ilk dəfə öz hüququndan yararlanaraq parlamentin “Bank sirri haqda” qanuna və “Cinayət Prosessual Məcəllə”yə etdiyi əlavə və dəyişiklikləri imzalamayıb. Bu haqda onun rəsmi saytında məlumat verilib.
İndiyə qədər qanun yalnız şübhəli şəxslərin və təqsirləndirilən vətəndaşların bank məlumatlarını əldə etməyə imkan verirdi. Əgər parlamentin təklif etdiyi dəyişikliklər qanuniləşsə, istintaq orqanları üçün şübhəli şəxslərlə əlaqəsi olan insanların da bank hesabları açılmış olacaq.
Prezident bu cür dəyişikliklərin Konstitusiyaya uyğun olduğuna şübhə edir. bu məsələnin aydınlaşdırılması üçün o, Konstitusiya Məhkəməsinə müraciət edib.
Ekspertlər: “Prezident haqlıdır, dəyişikliklər iqtisadiyyat üçün təhlükəli ola bilər”
Parlamentdə müzakirə əsnasında bir çox iqtisadçılar bu dəyişikliklərin qanuna daxil edilməsinin əleyhinə çıxış ediblər, çünki bu, maliyyə-iqtisadi sistem üçün təhlükəlidir.
“Əgər qanun həmişə qüvvədə olsa, onsuz da zəifləmiş investisiya axınını daha da azalda bilər”, – Avrasiya Əməkdaşlıq üzrə Maliyyə-Bank Assosiasiyasının sədr müavini, Ermənistan Banklar İttifaqının keçmiş rəhbəri Samvel Çzmaçyan belə hesab edir.
Ermənistan Milli Məclisinin keçmiş deputatı, iqtisadçı Vardan Bostancanyanın fikrincə, təklif olunan dəyişikliklər ölkədən kapital axınına səbəb olacaq.
Başqa fikir də mövcuddur. İqtisadçı, “Alternativ” Tədqiqat Mərkəzinin rəhbəri, professor Tatul Manaseryan hesab edir ki, bank sirrinin açılması üçün ciddi əsaslandırmalar lazımdır, amma bəzi hallarda bu tam açıqdır, məsələn, “problemin başqa həll yolları artıq mümkün olmayanda”.
“Əgər ciddi dəlillər olduğu halda bank hesablarının açılması mümkün olmasaydı heç bir ölkə korrupsiya ilə mübarizə üzrə aparıcı ölkələrin onluğuna, hətta iyirmiliyinə də daxil ola bilməzdi”, – Manaseryan deyib.
