Hamıdan qaçan qəribə musiqiçi: salyanlı gitara ifaçısı Səxavətin ilk və son müsahibəsi
Bu qeyri-adi insanı müsahibə üçün dilə tutmaq asan iş deyil. Uzun illərin dostluğu olmasaydı, baş tutmayacaqdı. Özü də dedi ki, bu, onun ilk və son müsahibəsi olacaq. Hər şeydə unikal olduğu kimi, jurnalistlərlə münasibətində də unikaldır Səxavət.
Səxavət Quiyev 1959-cu ildə Salyan şəhərində anadan olub. Atası Fətalı kişi ailəsini qapılarında kerosin satmaqla dolandırırmış. Ailədə dörd qardaş və bir bacı olublar. Səxavət ailənin sonbeşiyidir.
Taxta gitaradan başlayan uzun yol
Hələ uşaq vaxtlarından özündən böyük qardaşlarında və Səxavətdə gitara ifaçılığına böyük həvəs olub. Valideynləri balaca Səxavətə gitara almağı ciddiyə almadıqları zamanlarda o, taxta parçasına kapron iplər bağlayaraq, özünə gitara düzəldibmiş.
• 11 quberniya – Azərbaycanda ərazi bütövlüyü üçün riskli islahat?
• Niyə Azərbaycanda qohumlar uşaqlarını “bölüşdürür”?
• Azərbaycanda uşaqlar üçün yazılmış kitab qadağan olundu – Dövlət Komitəsi araşdırmalara başladı
Sonralar – 1978-1980-ci illərdə Litvada hərbi xidmətdə olarkən əslən leninqradlı əsgərlərlə birgə özfəaliyyət ansamblında gitara ifa etməyə başlayır. Onun ustalığı hərbi hissənin yerləşdiyi qəsəbənin sakinlərinin də böyük marağına səbəb olur.
Dolanışıq mənbəyi toylar və… caz
Hərbi xidmətini başa çatdıran gənc Səxavət Bakıya qayıdaraq, özünü dolandırmaq üçün toylara getməyə başlayır və on ildən sonra doğulduğu Salyan rayonuna qayıdır. Burada da toylara getməkdə davam edir. Gitaraçı Səxavət qısa vaxt ərzində “Çakqalan” ləqəbi ilə (Səxavəti bu adla ilk dəfə nənəsi taxta gitarada çıxardığı səslərə görə çağırıb) məşhurlaşır.
Onun toylarda ifa etdiyi caz kompozisiyaları böyük maraqla qarşılanır. Ötən əsrin 80-90-cı illərin gəncləri bu ifaları indi də həvəslə dinləyirlər.
Səxavət deyir ki, xaraktercə qapalı və sakit adam olduğu üçün məşhurlaşmağı sevmir, televiziya və radiolara çıxmaqdan bilərəkdən qaçır və bu, hər zaman belə olub.
– Səni karantinə qədər toylarda da görmürdük.
– Hələ 40 yaşım olanda toylara getməyə son qoymağı planlaşdırsam da, bunu özümdən asılı olmayan səbələrdən yalnız 20 il sonra edə bildim. Tanışlar, dostlar evimə gəlib onların toy məclisində ifa etməyimi xahiş edirdilər, sözlərini yerə sala bilmirdim. Bu məsələ 60 yaşıma kimi çəkdi.
Səxavətin davamçıları
Səxavətin iki oğlu da gitarada caz musiqisinin mahir ifaçılarıdır. 35 yaşlı Cəlal ailəsi ilə birgə valideynləri ilə yaşayır. Atasının sənətini davam etdirərək onunla birgə toylara gedib və “Çakqalan”ı müşayiət edib.
Evin böyük oğlu – 36 yaşlı Cəmil isə İspaniyanın paytaxtı Madriddə yaşayır. “Josef” təxəllüsü ilə gitaraçı kimi məşhurdur. Onun da hələ uşaqlıqdan qardaşı Cəlal kimi gitarada caz musiqisi ifa etməyə böyük marağı olub. Cəlal 2018-ci ildə qardaşı Cəmilin yanına – Madridə yollanıb və iki qardaş restoranlarda, şənliklərdə gitarada ifa ediblər. Lakin bir il sonra Cəlal ailə vəziyyəti ilə bağlı Azərbaycana qayıdıb, Cəmil isə indi də İspaniyada yaşayır.
“Caz mənim dünyagörüşümdür”
Səxavət çox danışmağı sevməsə də, caza həvəsin onda haradan qaynaqlandığı ilə bağlı sualımızı cavabsız qoymadı:
– Özümdən böyük qardaşlarım o vaxtlar dünyanın məşhur gitaraçılarının kasetlərini dinləyəndə mən də qulaq asıb zövq alırdım. Caz mənim dünyagörüşümdür, həyata baxışımdır. Məsələn, Alla Puqaçovanın “Миллион алых роз” (Milyon qızılgül) mahnısını ifa edib, arada öz təəssüratımı cazla improvizə edirəm. Sanki həmin dünyaya daxil olub, təəssüratımı bölüşürəm.
Səxavətin şəklini çəkməyə də onu güclə razı sala bildik, həm də öyrəndik ki, onun heç vaxt mobil telefonu da olmayıb, çünki gitaranı danışdıran bu qeyri-adi adam özü haqqında heç vaxt danışmaq istəməyib.
