BMT-də Rusiyanın bu qurumdakı nümayəndəsinin vəfatı ilə bağlı kədər ifadə edirlər

BMT Təhlükəsizlik Şurası və təşkilatın baş katibi Antoniu Quterreş qurumdakı Rusiya missiyasının rəhbəri Vitali Çurkinin vəfatı ilə bağlı kədərləndiyini bildirib.

“Təhlükəsizlik Şurasının üzvləri 40 ildən çox zamanını Rusiyanın diplomatik xidmətində keçirmiş, 10 ildən çoxdur ki, BMT-də Rusiya missiyasına rəhbərlik edən və fevralın 21-də 65 illiyini qeyd edəcək olan səfir üçün kədərlənir”, – BMT TŞ-nın məlumatında deyilir.

“Görkəmli diplomat, daimi nümayəndə Vitali İvanoviç Çurkinin qəfil vəfatı ilə bağlı xəbər məni sarsıtdı və kədərləndirdi”, – Antoniu Quterreşin bəyanatında deyilir. BMT baş katibi yazıb ki, “onun vəziyyəti anlaması, ustalığı və dostluğu” üçün darıxacaq.

Aİ-nin xarici işlər və təhlükəsizlik siyasəti üzrə Ali nümayəndəsi Federika Moqerini rusiyalı həmkarlarına və Rusiya xalqına başsağlığı verib.

Rusiya Federasiyasının BMT-dəki daimi nümayəndəsi Vitali Çurkin fevralın 20-də Nyu Yorkda qəflətən dünyasını dəyişib.

BMT-dəki Rusiya missiyasının ofisində olduğu zaman Çurkinin vəziyyəti qəfil pisləşib. Diplomatı xəstəxanaya aparıblar və o, orada keçinib. Ölümün dəqiq səbəbi haqda hələlik danışılmır.

“Görkəmli Rusiya diplomatı iş başında ikən dünyasını dəyişib. Vitali İvanoviç Çurkinin doğmalarına və yaxınlarına dərin hüznlə başsağlığı veririk”, – Rusiya XİN-in saytında dərc olunmuş məlumatda deyilir.

Vitali Çurkin 2006-cı ildən Rusiyanın BMT-dəki nümayəndəsi idi. O, əksər vaxtlarda gərgin müzakirələr və Təhlükəsizlik Şurasındakı həmkarlarının kəskin tənqidləri şəraitində ardıcıllıqla 2008-ci il müharibəsi, həmçinin Krım və Ukraynanın şərqindəki münaqişə ilə bağlı məsələlərdə Kremlin mövqeyini müdafiə edib.