Azərbaycanda müxalifətçi bacısının intim görüntüləri ilə şantaj olunur
Azərbaycanda növbəti seks-qalmaqal baş verib: Fransada yaşayan müxalifətçi Məhəmməd Mirzəli bacısının intim videoları ilə şantaj edilib. Bu haqda müxalifətçi özü məlumat verib.
Məhəmməd Mirzəli YouTube kanalında bildirib ki, onu bacısının intim videosu ilə şantaj ediblər.
“Mənim WhatsApp-ıma göndərilən videoda bacımın əri ilə intim görüntüləri əks olunub. Kimsə onların yataq otağına kamera yerləşdirib”, – müxalifətçi qeyd edib.
Onun sözlərinə görə, daha sonra onunla yenidən əlaqə saxlayıblar və susmağı təklif ediblər: “Əks halda məni bu kadrları yaymaqla hədələdilər”.
Məhəmməd Mirzəli kimdir?
27 yaşlı müxalifətçi bir neçə il əvvəl Azərbaycanı tərk edib və Fransaya yerləşib. Mirzəlinin sözlərinə görə, o, Göyçay şəhərində əsgər ölümlərinə qarşı etiraz aksiyası təşkil edəndən sonra onu təqib etməyə başlayıblar.
Mühacirətdə yaşadığı müddətdə Məhəmməd Miurzəli Azərbaycan hakimiyyətini sərt tənqid etməyə başlayıb. Bundan sonta onun ailə üzvlərinə qarşı təzyiqlər başlayıb.
Müxalifətçinin bacısının əri narkotik saxlamaqda ittiham olunaraq saxlanılıb. Onun bəzi qohumları polis idarəsində ondan imtina ərizəsi yazıblar – Azadlıq Radiosu xəbər verib.
İntim videolar müxalifətə qarşı silah kimi
Azərbaycan hakimiyyətinə qarşı açıq çıxış edən müxalifətçilər və jurnalistlər dəfələrlə intim xarakterli videolarla şantaj olunublar.
Jurnalistlər Xədicə İsmayıl, Qan Turalı, Natiq Ədilov, Qənimət Zahid, Azər Əhmədov, müxalifətçi Kəmalə Bənənyarlı bu cür şantaja məruz qalanların sadəcə bir hissəsidir.
2014-cü ildə sevgilisi ilə Bakıya gələn azərbaycanlı müxalifətçi, ABŞ vətəndaşı Səid Nurinin başına gələn hadisə xüsusi qeyd olunmalıdır. Səid Nurinin sevgilisi ilə qaldığı oteldə gizli kamera ilə çəkilən intim xarakterli görüntüləri sosial şəbəkələrdə yayımışdı.
Bir neçə gündən sonra Səid Nuri Bakını tərk etmək istədiyi zaman isə Azərbaycan hakimiyyəti istintaqı başa çatdırılmamış cinayət işinə istinad edərək onun ölkədən çıxışına qadağa qoymuşdu. ABŞ Dövlət Departamentinin məsələyə müdaxiləsindən sonra problem aradan qalxmışdı.
Sosial şəbəkələrdəki şərhlər
Məhəmməd Mirzəliyə qarşı şantaj sosial şəbəkələrin Azərbaycan seqmentində qızğın müzakirələrə səbəb olub.
Xarakterik şərhlərdən bəziləri:
“Bəli, Məhəmməd Mirzəli söyür, təhqir edir. Amma o fiziki şəxsdir. Ona qarşı isə bunu yüksək instansiyalar edir. Bu siyasətdir. Bəsdir, insanların şəxsi həyatına burnunuzu soxdunuz. Seks ayıb deyil. Bunu gizlincə çəkmək ayıbdır. Bu cinayətdir”.
“Niyə insan sevişməkdən utanmalıdır? Bütün bəşəriyyət bunun məhsulu deyilmi? Hakimiyyət uzun illər insanları intim videoları ilə şantaj edirlər. Bu, ən alçaq hərəkətlərdən biridir”.
“Onlar onun bacısının (!) yataq otağında (!) kamera yerləşdiriblər, onun öz əri (!) ilə intim görüntülərini çəkiblər və bu video ilə gənci şantaj edirlər. Hakimiyyətin digər gənc tənqidçiləri kimi onun da cibinə narkotik atıb tuta bilmirlər, satın ala, ya da Elmar Hüseynov, Rafiq Tağı kimi öldürə bilmirlər, bir çox digərləri kimi onu da şantaj etmək qərarına gəliblər. Biabırçılıqdır!”
