“Abzas Media işi” üzrə həbs edilənləri artıq 12 ilə qədər həbs gözləyir
“Abzas Media işi” – 7 yeni ittiham
“Abzas Media işi” üzrə həbs edilən daha 4 nəfərə qarşı yeni ağırlaşdırıcı ittihamlar irəli sürülüb. İndi onları 8 ilə qədər yox, 12 ilə qədər azadlıqdan məhrumetmə cəzası gözləyir. Avropa Jurnalistlər Federasiyası (EJF) bəyanat yayaraq beynəlxalq ictimaiyyəti Azərbaycanda haqsız yerə həbsdə olan 23 jurnalist və media işçisini azad etmək üçün Azərbaycan hökumətinə təzyiqləri artırmağa çağırıb.
- Vladimir Putin Bakıya rəsmi səfər edib
- “Meta” Rusiyada yaradılmış Gürcüstan, Ermənistan və Azərbaycanı hədəfləyən yüzlərlə təbliğat hesabını silib
- Putinin Azərbaycana səfəri gözlənilir. Bakıdan şərh
EJF COP29 kimi tanınan BMT-nin İqlim Dəyişikliyi Konfransı ərəfəsində mərkəzi Almaniyanın Bonn şəhərində yerləşən BMT-nin İqlim Dəyişikliyi üzrə Çərçivə Konvensiyasının (UNFCCC) katibliyini Azərbaycan da daxil olmaqla bütün COP ev sahiblərinin beynəlxalq insan haqlarına əməl etməsinə və bundan jurnalistlərə və vətəndaş cəmiyyəti fəallarına senzura tətbiq etmək üçün bəhanə olaraq istifadə edilməsinin qarşısını almağa çağırıb.
Bəyanatda qeyd edilib ki, Avropa Şurasının Jurnalistikanın Müdafiəsi Platforması Azərbaycanda sırf işini yerinə yetirdiyinə görə həbs edilən jurnalistlərlə bağlı 23 faktı sənədləşdirib. Onların arasında “Abzas Media”nın altı əməkdaşı – Ülvi Həsənli, Sevinc Vaqifqızı, Məhəmməd Kəkalov, Nərgiz Absalamova, Hafiz Babalı və Elnarə Qasımova var.
“Biz müstəqil media orqanının 6 jurnalistinin azad edilməsi tələbi ilə başladılan #FreeAbzasJournalists kampaniyasını açıq şəkildə dəstəkləyirik. Eyni zamanda Azərbaycanda haqsız yerə həbs edilən digər 17 media işçisinin də dərhal azadlığa buraxılmasını tələb edirik”, – EJF baş katibi Rikardo Qutyerrez deyib.
Avqustun 19-da “Abzas Media” müstəqil internet nəşrinin direktoru Ülvi Həsənli, baş redaktoru Sevinc Vaqifqızı, reportyoru Elnarə Qasımova və araşdırmaçı jurnalist Hafiz Babalıya qarşı 7 ağır maddə ilə ittiham irəli sürülüb.
İndi onlar Azərbaycan Cinayət Məcəlləsinin 192.3.2 (külli miqdarda gəlir əldə etməklə qanunsuz sahibkarlıq), 193-1.3.1 və 193-1.3.2 (mütəşəkkil dəstə tərəfindən cinayət yolu ilə əldə edilmiş gəlirləri leqallaşdırma), 206.4 (mütəşəkkil dəstə tərəfindən qaçaqmalçılıq), 320.1 və 320.2-ci (sənədləri saxtalaşdırma və saxta sənədlərdən istifadə), həmçinin 213.2.1-ci (qrup şəklində vergidən yayınma) maddələri ilə ittiham olunurlar.
Vəkillərin sözlərinə görə, Ülvi Həsənli, Sevinc Vaqifqızı və Elnarə Qasımova ittiham aktını imzalamaqdan imtina ediblər.
Daha əvvəl “Abzas Media işi” üzrə digər təqsirləndirilən şəxslərə: direktor müavini Məhəmməd Kekalov, jurnalist Nərgiz Absalamova və iqtisadçı Fərid Mehralızadəyə də oxşar ittihamlar irəli sürülüb.
Xatırladaq ki, “Abzas Media işi” üzrə həbs edilən iqtisadçı ekspert Fərid Mehralızadə bu nəşrlə heç bir əlaqəsinin olmadığını bildirib. “Abzas Media”nın hazırkı rəhbərliyi də bəyanat yayaraq, nəşrin Mehralızadə ilə əməkdaşlıq etmədiyini açıqlayıb.
İndiyədək “Abzas Media işi” üzrə həbs edilənlərin hamısına qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq) maddəsi ilə ittiham irəli sürülmüşdü və onları 8 ilədək müddətə azadlıqdan məhrumetmə cəzası gözləyirdi. Yeni ittihama görə isə media təmsilçiləri və iqtisadçı 7 ildən 12 ilə qədər həbs təhlükəsi ilə üz-üzədirlər.
Nəşrin direktoru Ülvi Həsənli ötən il noyabrın 20-də həbs edilib. Həmin gün “Abzas Media”nın ofisində axtarış zamanı 40 min avro aşkar edildiyi bildirilib.
Direktor müavini Məhəmməd Kekalov eyni gündə, Sevinc Vaqifqızı isə noyabrın 21-də, daha sonra isə nəşrin əməkdaşları Nərgiz Absalamova, Elnarə Qasımova və araşdırmaçı jurnalist Hafiz Babalı həbs ediliblər.
“Abzas Media işi”ndə nəşrə aidiyyatı olmayan şəxslər də həbs edilib – hüquq müdafiəçisi Anar Məmmədli, meclis.info portalının baş redaktoru İmran Əliyev və iqtisadçı ekspert Fərid Mehralızadə. Daha sonra Anar Məmmədlinin işinin icraatı ayrılıb, İmran Əliyevlə Fərid Mehralızadənin isə “Abzas Media işi” üzrə istintaqı davam edir.
İş üzrə həbs edilənlərin hamısı ittihamları rədd edərək, peşə fəaliyyətlərinə görə təqib olunduqlarını bildiriblər.
Beynəlxalq jurnalistləri müdafiə təşkilatları Azərbaycan hakimiyyətini həbs olunan jurnalistləri dərhal azad etməyə və müstəqil mediaya təzyiqləri dayandırmağa çağırıb.
Hüquq müdafiəçiləri “Abzas Media işi”ndə həbs olunanları siyasi məhbus kimi tanıyırlar.
