Gürcüstan: İsa peyğəmbər haqda zarafata görə ultra-millətçilər jurnalistə hücum edib

Polis ultra-millətçi “Gürcü marşı” hərəkatının Tbilisidə “Rustavi 2” telekanalı qarşısında təşkil etdiyi etiraz aksiyasında iştirak edən altı nəfəri saxlayıb.

DİN-in məlumatına görə, bu altı nəfər “xırda xuliqanlıqda” və polisə tabe olmamaqda ittiham olunur.

“Gürcü marşı”nın üzvləri martın 19-da teleşirkətin binası qarşısında toplaşıblar ki, tele-aparıcı Georgi Qabuniyanın İsa peyğəmbərlə bağlı söylədiklərinə etirazlarını bildirsinlər.

Apardığı “Postskriptum” tele-şousunda ağacların Acariya və Quriyadan milyarder Bidzina İvanişvilinin dendroloji parkına köçürülməsi haqda süjetini təqdim edərkən, Qabuniya deyib ki, “İsa peyğəmbər iki min il əvvəl İsrailə din gətirdiyi zaman yanılıb, o, Acariyaya gəlməli idi, çünki burada onu çarmıxa çəkməzdilər, regionda xaç düzəltmək üçün ağac qalmayıb”.

“Gürcü marşı”nın təmsilçiləri bu zarafatı “dindarların hisslərinə təhqir” adlandırıblar. Onlar teleşirkətin girişində Qabuniya və “Rustavi 2”-nin hüquqşünası Tamta Muradaşvilinin olduğu avtomobilin qarşısını kəsib, onlara ərazini tərk etməyə imkan verməyiblər.

Daha sonra jurnalistlərin iştirakı ilə çaxnaşma baş verib. Nəticədə “Gürcü marşı”nın nümayəndələri Muradaşvili və Qabuniyanın içində olduğu avtomobili zədələyib, idman jurnalisti David Eradzenin burnunu qırıblar.

Eyni zamanda baş direktor bildirib ki, jurnalistin İsa peyğəmbəri dilinə dolaması şirkət rəhbərliyinin də xoşuna gəlməyib və Georgi Qabuniyaya töhmət verilib – teleşirkət yanında Etika Şurası belə qərar qəbul edib.

“Telekanal adından hissləri təhqir olunan bütün dindarlardan üzr istəmək istəyirəm, jurnalist Georgi Qabuniyaya bu bəyanına görə töhmət elan olunub”, – Qvaramiya bildirib. Bununla belə o vurğulayıb ki, üzrxahlığının jurnalistlərə hücum edən şəxslərə aidiyyatı yoxdur və o, həmin şəxsləri İsa Məsihin davamçısı hesab etmir.

Qvaramiyanın  üzrxahlığından sonra sosial şəbəkədə yeni qalmaqal qopub: çoxları dünyəvi ölkədə İsa peyğəmbərlə bağlı zarafata görə üzr istənilməsini yolverilməz hesab edib, çünki bu, azad ifadə sərhədlərini zorlayır.

“Dini hisslər mövcud deyil. Bu termin DTK-da uydurulub və bugünkü Rusiyada ondan repressiya aləti kimi çox istifadə edirlər. Buna görə də, bu termindən istifadə eləmək Rusiyanın diktə etdiyi eyni qaydalarla oynamaq deməkdir”, – filosof Levan Qambaşidze Facebook səhifəsində yazıb.

“Rusiya yönlü ultra-millətçilərin aqressiv davranışından sonra İsa peyğəmbər haqda zarafata görə üzr istəməklə “Rustavi 2” dini mövzularla işləyən bütün jurnalistlər üçün təhlükəli presedent yaradıb. Bu üzrxahlıq onların fəaliyyətinin məhdudlaşdırılması üçün səbəb ola bilər”, – dini mövzularla işləyən jurnalist Levan Sutidze deyib.

İnsidentlə bağlı “zorakılıq” və “əmlakın zədələnməsi və ya məhv edilməsi” maddələri ilə cinayət işi qaldırılıb, bu da 100 saatdan 180 saata qədər ictimai faydalı əmək və ya 1 ilə qədər islah işləri, yaxud da 1 ildən 3 ilə qədər azadlıqdan məhrumetmə ilə cəzalandırılır.