Meydan TV işi: istintaq yekunlaşıb, yeni ittihamlar irəli sürülüb, daha bir nəfər həbs edilib
“Meydan TV işi” üzrə istintaq yekunlaşıb
Bakı Şəhər Baş Polis İdarəsində aparılan “Meydan TV işi” üzrə istintaq başa çatıb. Təqsirləndirilən şəxslərə qarşı Cinayət Məcəlləsinin səkkiz maddəsi ilə ağırlaşdırılmış ittihamlar elan olunub.
İttihamlar sırasında qanunsuz sahibkarlıq, cinayət yolu ilə əldə edilmiş əmlakı leqallaşdırma, qaçaqmalçılıq, vergidən yayınma və sənəd saxtalaşdırma halları qeyd olunur. İş materiallarının Bakı Ağır Cinayətlər Məhkəməsinə göndəriləcəyi gözlənilir.
2024-cü il dekabrın 6-da “Meydan TV”-nin əməkdaşları Ramin Deko (Cəbrayılzadə), Aynur Qənbərova (Elgünəş), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı saxlanılıblar. Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb və barələrində açılmış cinayət işi “Meydan TV işi” adlandırılmağa başlayıb. Daha sonra bu işlə bağlı jurnalistlər Şəmşad Ağa, Nurlan Libre və Fatimə Mövlamlı, Ülviyyə Əli də həbs ediliblər.
“Meydan TV” bəyan edir ki, bu həbslər onların tənqidi fəaliyyətlərinə görədir.
Aşağı sıra: Ülviyyə Əli, Xəyalə Ağayeva, Fatimə Mövlamlı, Aynur Elgünəş, Aytac Taqdıq, Aysel Umudova
Yuxarı sıra: Ramin Deko, Əhməd Muxtar, Ülvi Tahirli, Nurlan Libre, Şəmşad Ağa, Natiq Cavadlı
“Əməkdaşlarımızı azad edin!”
Meydan TV-nin redaktoru Orxan Məmməd elan edilən ittihamlar və yeni həbslərə münasibət bildirib.
“Bütün ittihamları rədd edirik. Bu günlərdə işə əlavə şəxsləri qoşmağa çalışırlar. Eyni zamanda “Meydan”la heç bir bağlılığı olmayan Ülvi Tahirovun “Meydan TV” işinə birləşdirilməsi hakimiyyətin jurnalistlərə atdığı böhtanın dairəsini genişləndirdiyini göstərir. Repressiyalar azad mətbuatı dayandıra bilmir, lakin hakimiyyət hər gün öz tarixinə yeni qara ləkə atır. Əməkdaşlarımızı azad edin!”
- Bazar günü həbslər – “Meydan TV işi” üzrə 7 nəfər həbs edilib
- Azərbaycan Milli Mətbuatının ən çox jurnalist həbsi ilə qeyd olunan 149-cu ili
- Azərbaycanda yeni tendensiya – qadın jurnalistlər də həbs olunur
Avqustun 27-də fotojurnalist Əhməd Muxtar da “Meydan TV işi” üzrə saxlanılıb və məhkəmənin qərarı ilə barəsində 40 günlük həbs qətimkan tədbiri seçilib.
Meydan TV rəhbərliyi Əhməd Muxtarın redaksiya ilə əlaqəsinin olmadığını bəyan edib:
“Əhməd Muxtarın bizimlə heç bir əməkdaşlığı olmayıb”.
Həbs olunan jurnalistlər özlərini təqsirli bilmir, jurnalist fəaliyyətlərinə görə cəzalandırıldıqlarını bildirirlər. Hüquq-mühafizə orqanları isə məsələ ilə bağlı əlavə açıqlama verməyib.
“Meydan TV işi” üzrə istintaq yekunlaşıb
